Танакөз Толқынқызы. Жақсылық ауа сияқты, сезілмейді
09.10.2019
64
0

«Қазақ әдебиеті» vs Пруст сауалы

Танакөз Толқынқызы

Танакөз ТОЛҚЫНҚЫЗЫ, ақын

Адамның басты қасиеті не деп ойлайсыз?

– Сүйе білу, кешіре білу, жамандыққа да жақсылықпен жауап қайтару.

 Ер азаматтың басты қасиеті ше?

– Сөзінде тұру.

 Бақыт деген ұғымды қалай түсінесіз?

– Еркіндік. Абсолютті шындықпен үндестікте өмір сүру. Сүйе білу.

 Сүйікті әдеби кейіпкеріңіз кім?

– Антуан де Сент Экзю­перидің «Кішкентай ханзада» ертегі повесті

 Ең басты кемшілігіңіз не?

– Адамның қатесі мен кемшілігін бетіне айтамын.

 Бос уақытыңызда немен айналысасыз?

– Бос уақыт деген түсі­нік жоқ. Спортпен, бимен, аудиокітап тыңдаумен, пси­холо­гиялық кітаптар оқумен, музыка және біртуар адамдар жайлы түсірілген деректі фильмдер мен көркем фильм­дер көру, медитация жасау т.б.

 Өмірге екінші рет келсеңіз, кім болуды қалар едіңіз?

– Саяхатшы болар едім.

 Қандай елде өмір сүргіңіз келеді?

– Еуропада өмір сүре алар едім. Мүмкін Жаңа Зеландияда. Бірақ бір елде тұрақтап қалғым келмейді. Тайганы, Антарктиданы, әлемдегі таңғажайып табиғаты бар кез-келген мемлекетті аралап өмір сүруді армандаймын.

 Қандай ерекше қабілетке ие болғыңыз келеді?

– Көрінбейтін тылсымды көрінбейтін түйсікпен сезетін, қабылдайтын, мойынсұнатын қасиетке ие болғым келеді.

 Қандай сәттерде осалдық танытасыз?

– Сүйген, ғашық болған сәттерімде өзімнің табиғатыма қарсы бола тұра, көп жерде шегінемін.

«Ғайыпқа сену» дегенді қалай түсінесіз?

– «Ғайыпқа сену» дегенді тылсым дүниелерге сену деп білемін. Ғылым түсіндіріп бере алмайтын табиғат тылсымдары өте көп.

 Егер өнертапқыш болсаңыз, не нәрсені ойлап табар едіңіз?

– Үйді өзі жинайтын, жуып тазалайтын және оны адамнан да артық атқаратын роботты ойлап табар едім.

Не нәрседен жиіркенесіз?

– Екіжүзді, жағымпаз, суайт, сөзінде тұрмайтын, принципі жоқ адамдардан.

 Сіз үшін ең ұнамсыз тарихи тұлға кім?

– Алаш арыстарының соңына шам алып түсіп асқан, атқан абақтыға қамаған, қазақ халқын жер бетінен жойып жібергісі кеп жаныққан қандықол Ста­лин және оның командасы.

 Жиі айтатын қанатты сөзіңіз?

– «Қуған жетпейді, бұйыр­ған кетпейді».

 Көзіңізге жиі жас аласыз ба?

– Әрине.

Үнемі есіңізде жүретін Абайдың бір сөзі

– «Кеше бала ең, келдің ғой талай жасқа,

Көз жетті бір қалыпта тұра алмасқа.

Адамды сүй, Алланың хикметін сез

Не қызық бар дүниеде одан басқа».

Қазіргі адамдардың бойынан қандай қасиеттер жоғалып барады?

– Ешқандай. Жақсы адамдар көп. Тек жамандық көзге бадырайып көрініп тұрады. Ал жақсылық ауа сияқты сезілмейді.

 Біздің заманымыздың мықты ақыны кім? Мықты жазушысы ше?

– Олар бар. Олар тірі. Олар ортамызда жүр. Олар мені күн сайын таң қалдырады. Атын атай алмаймын. Көргенде өздеріне айтамын.

 Жас қаламгерлердің бойынан қандай артықшылықтар мен кемшіліктерді көріп жүрсіз?

– Ешқандай. Жас ақында кемшілік болмайды. Оларға бәрі жарасады. Сонысымен олар жас.

ПІКІР ҚОСУ

Ваш e-mail не будет опубликован.

Пікір