Мирас МҰҚАШ: «ҮЛКЕН МЕКТЕП – ӨМІРДІҢ ӨЗІ»
– «Иә, өмір салттары өзгеше. Және бұлардың әжелері де – қалалық қой…» деген жолдар бар әңгімеңізде. 90-жылдары жаппай урбанизациялану кезеңінде ауыл тұрғындары қалаға ағылып, ризығын іздеді. Бірақ, меніңше, сол халық қалалық өмірге толық бейімделе алмаған сияқты. Жалпы, бізде қала психологиясы қалыптасып үлгерді ме?
– Бұдан он жылдан аса бұрын жазылған «Жер мен көк» деген әңгімемде осы жәйттің шет жағасын айтыппын. Мұнда:
«…Бірақ күндердің күнінде бұлар мекендеген көрікті шахтерлер қалашығы да бомба түскендей біртіндеп қирауға айналған. Тұрғындары күн сайын үдеріп көше бастаған. Өйткені мұндағы екі үлкен шахтаның екеуі де жабылған еді. Сөйте-сөйте, пошта үйі де жұмысын тоқтатты. Қазір оны да бұзып алып жатыр». Сөз – атамекеніміз Ақшатау деген кеніш туралы еді. Кезінде әлемде сирек кездесетін металдар шығарған өндіріс ошағы. Осындағы өзге ұлт өкілдері жер жүзінің түкпір-түкпіріне аттанды. Америка, Австралия, Германия, Израиль, Ресей, Украина, Белоруссия асқандары бар. Ал жергілікті жұрттың көпшілігі іргелес Қарағанды мен Теміртау, Балқаш қалаларына ауысты.
Айтпағым, осы көрініс Қазақ елінің талай жеріне тән.
Жалпы, «қала психологиясы» дегенде алып өндіріс ошақтары, ірі индустрия, үлкен құрылыс орындары, қасаң тәртіп, реттілік, қарбалас тірлік елестейді. Мұндай қалада арқаны кеңге салып, босаңси алмайсың. Ал бізде болса, айнала төңірек кілең сауда-саттық, жаппай базар… Ауылдан келушілердің дені жеке көліктерімен кісі тасумен айналысады, тіршілік күйттеп, өзге де ұсақ шаруамен шұғылданады. Негізінен, өз еріктері өздерінде. Сол себептен, әлі де өтпелі кезеңде жүрміз бе деп пайымдаймын. Әзірше қазақ ортасында қала психологиясы бекіп болды дей қою қиын.
– Әйтсе де, әңгімеңіз жылы аяқталыпты. Негізгі кейіпкерлерге оралуыңыз да әсерлі. Аяулым әдемі келіншек болыпты. Аман табысты кәсіпкерге айналса керек. Ал қатыгез Малик қайда? Оқырман Малик туралы да білгісі келеді.
– Малик те сол шағын бизнес саласына кеткен секілді. Есейген кезде ұшырасып қалған сәттеріміз де бар. Бұлар – «отырықшылдыққа» бұрынырақ бейімделген нағыз қала балалары ғой. Әке-шешесі бас пайданы күйттеуге ерте баулыған, таныс-тамырға сүйеніп, қулық-сұмдықпен сыбайласа тіршілік кешуге әуелден төселген ағайындар тобынан. Ал анау безбүйректік, өлермендік мінезінің бұл кәсіпте тигізген пайдасы да ересен болуы ғажап емес. Өйтпесе, өзінен де өткен азулы бақталастары «жұтып» қояды. Ал істерінің ғұмыры қаншалықты ұзақ болады – ол басқа мәселе шығар…
Жазушының көздейтіні, негізінен, ізгілік идеалдары болса, мұндайда Малик сияқты кейіпкерлерді аттап өте алмайсың. Оны қойып, қоғамда небір қаныпезер баскесерлер де жүреді. Бірақ олар да аспаннан түскен жоқ, қоғамның өз «жемісі». Зұлымдықпен, әділетсіздікпен арпалыса жүріп, сондайлармен қатар ғұмыр кешуіңе тура келеді. Өйткені өмірдің өзі қатыгез.
– «Аула» әңгімесінде нәзік лиризм лебі сезіледі. Меніңше, жазуды поэзиядан бастаған секілдісіз?
– Жоқ, жазуды өлеңнен бастадым дей алмаймын. Қайта, осы Поэзия әлеміне дендеп кіре алмай жүргенімді кемшілігім бе деп те ойлап қоямын. Өлеңді жазу бір басқа, жақсы жырды сүйсініп оқуға деген құмарлықтың өзі таптырмайтын ғажайып қасиет сияқтанады.
– Әңгімеде «қосмекенді» балалық көрініс табады. «Жазушы болу үшін бақытсыз балалық шақ керек» деген пікірмен келісесіз бе?!
– Қарап отырсам, осы күнге дейін «қосмекенді» секілдімін. Әрине, ірі шаһарда туып-өскендіктен, кейбір «қалалық» әдеттерім болуы мүмкін. Бірақ бәрібір бүйрегім ауыл жаққа көбірек бұрады. Ол мінезімді кейбір қалалық ағайындарымның онша түсінбей де қалып жататын кездері бар.
Ал жазушылықты «бақытсыз балалықпен» байланыстырудың қаншалықты сәтті екенін білмеймін, дегенмен, қаламгерге мазмұнды, күрделі өмірбаян қажет екені даусыз. Біз, әдетте, жан жарамызды ешкімге көрсетпеуге тырысамыз, ол дұрыс та шығар. Тек шын жазушы: мен өзім керемет бақыттымын, төрт құбылам сай, қалған елдің мұң-қайғысында шаруам жоқ деп отыра алмайды ғой. Жазу үстінде қаны сорғалаған шындығыңды айтпай, көлгірсіп, ертегі айтуды әдет қылсаң, сөзіңе кім сенеді. Қаламгердің түрлі қайшылықты жағдайларды жан-жүрегінен өткізуі маңызды ма деп ойлаймын. Қарап отырсақ, әйгілі жазушылардың қай-қайсының да өмірлері қайшылықты екенін көреміз. Мысалы, зерттеуші Валерий Гейдеко: «Мир Бунина трагичен. Но по-своему трагичен и мир Чехова. Бунин раскрывал драматичность бытия трагически-возвышенно. Чехов обыденно и «заземленно», – депті. (Гейдеко В.А. А.Чехов и И.Бунин. – М. «Советский писатель», 1987 г. Ст. 191).
Қазақ әдебиетінің Алтын дәуірін жасаған өзіміздің атақты алпысыншыжылдықтардың балалық шағы да соғыс тұсына сәйкес келіп, тас шайнап өскен ұрпақ екені белгілі. Олар өртеңге өскен гүл секілді өз басынан өткерген саналуан өмір көріністерін қалам ұшы арқылы халық қазынасына айналдырды. Бәлкім, «бақытсыз балалық» дегеннің жемісі сол ма екен…
– Жазушылар одағындағы бір отырыста жазушы Молдахмет Қаназ «Тынымбай ауыл әңгімесінен бүгінде адамзаттық тақырыпқа көтерілді», – деген сөз айтты. Жалпы, адамзаттық ойлау дегеніміз, сіздіңше, қандай ұғым?
– Меніңше, адамзаттық тақырып деген қарапайым ғана нәрсе. Ол үшін керемет бір асқақ ұғымдарды іздеудің ешбір қажеті жоқ. Біз де мынау алып Жер планетасындағы өзге де халықтармен тереземіз тең елміз. Егер қазақ жазушысы нағыз Қазақ болмысын, Қазақ табиғатын мейлінше шебер көрсете алса, әлемдік әдебиетке қосылған үлес деген – сол. Айталық, біз баспана мәселесі, жұмыссыздық ахуалы тек қазақ халқына тән деп ойлауымыз мүмкін. Ал мұндай ділгірлік өзге елдерде де, мәселен, Норвегия прозасында көптеп кездеседі. Қазақ бастан кешкен мұңды әлемнің басқа түкпірінде тұратын халықтар да кешіп отыр. Яғни адамзаттың мұң-мұқтажы ортақ. Тек тіршілік бояулары, өмір салты бөлек-бөлек. Ал қазақ жазушысының суреткерлік қолтаңбасы әлемдік қауымдастық назарына қалай жетеді – ол да басқа әңгіме.
– Жазушылар жайында «Әуезов мектебінің өкілі», «Бейімбет Майлин мектебінің өкілі» деген секілді пікірлер айтылып жатады. Сіз өзіңізді қай мектептің өкілімін деп есептейсіз?
– Бұл тұрғыда мені Жүсіпбек Аймауытов шеберлігі тамсантады. Одан өзіміздің алыптар тобынан бастап, бертінгі Әбіш Кекілбаев, Сайын Мұратбеков, Мұхтар Мағауин, Төлен Әбдік, Әкім Тарази, Тынымбай Нұрмағамбетов… ағаларымыздың бәрін де үлкен ұстаз тұтамын. Әлбетте, шама келгенше, белгілі әлемдік әдебиетке де көз қиығымызды салуға тырысамыз. Мұндайда, әрине, жиі аталатын Оноре де Бальзак, Николай Гоголь, Гюстав Флобер, Иван Тургенев, Лев Толстой, Федор Достоевский, Герберт Уэллс, Томас Манн, Франц Кафка, Уильям Фолкнер, Максим Горький, Альбер Камю, Габриэль Гарсиа Маркес, Эрнест Хемингуэй, Рюноскэ Акутагава… есімдері ойға оралар еді. Өз ойымша, осылардың ішінен Джек Лондон шығармалары қазақ табиғатына мейлінше жақынырақ сияқты. Сондықтан, мүмкіндігінше, осы кісіге көбірек ден қояр едім. Десек те, шығармашылықтағы басты ұстаз – өмірдің өзі шығар.
Ал дәл қазір маған «мен мынандай мектептің өкілімін» деу кішкене әбестік болар. Үлкен Әдебиет әлеміне жаңадан ғана бет бұра бастадық қой. Іздену үстіндеміз… Әрине, бұл бағыттағы пікіріміз әлі талай өзгеруі де ғажап емес…
– Болашақты жазу деген не?
– Сұрақ сәл түсініксіздеу екен. Ал мұны «жазушы не үшін жазады?» деп ұқсақ, орыс жазушысы Юрий Казаковтың:
«…сенің қолыңда ақиқат пен сөз құдыреті бар. Сондықтан өз сәтсіздіктеріңе, ісіңнің мандымағанына қарамай, ерен ерлік жасап, жұртты қуантуың керек, өмірдің жақсара түсетінін жалықпай айта беруің керек!» – деген сөзі ойға оралады. Адамзат баласы, жалпы, қай жағынан болсын, жан-жақты жақсара түсуі керек. Нағыз әділетке, адалдыққа, шынайылыққа ұмтылуы қажет. «Ізгілік дегеніміз – шындық», – дейді Василий Шукшин. Әйтеуір, Әдебиет ең алдымен Ұлттық мүддеге қызмет етуге тиісті деп санаймын. Өйткені мұңымыз басым елміз. Әрқайсымыз, шама келгенше, халқымыздың кемел келешегі жолында адал қызмет етуге тиіспіз деп ойлаймын.
– «Жетім шал» атты әңгімеңіз шығармашыл ортаны селт еткізіп, көпке танылуыңызға себепкер болды. Бүгінде өндіріп жазып жүрсіз бе?
– «Жетім шал» дүниесін он жасымда жазып ем. Ол да күнделікті өмірден көріп-білген, ойға түйген жәйттер болатын. Әрине, бастапқыда әңгіме жаза қояйын деген ниет болған жоқ, тек жанымды тербеп, қатты толғандырған бір көріністі дәптерге түсіріппін. Шағын ғана нәрсе. Соны бірде әкем кездейсоқ көріп, таң қалыпты. Кешкісін мектептен келсем:
– Мынаны өзің жаздың ба?! – деп сұрайды.
Ол әлгі жағдайды өзі де күнде байқап жүрген ғой.
– Иә, өзім жаздым…
Қуанып, соны ертеңіне белгілі газетте қызмет ететін танымал бір ағамызға көрсеткен екен, о кісі:
– О-о! Мынау керемет қой! Ертең балаңның фотосын алып кел, газетке міндетті түрде шығарамыз, – депті.
Содан, әдейі барып суретке түстім. Іштей қатты масаттандым. Өкінішке қарай, әлгі ағамыз істі аяқсыз қалдырды. Әне-міне деп ұзақ күттіріп жүріп, хабарсыз кетті. Сөйтсек, ол артынан «әй, осыны балаға әкесі жазып берген-ау» деп күдіктенген секілді. Онысын әкем де аңдағандай. Бірақ соңына түсіп қазған жоқ. Ренжіп, қолын бір сілтеді де қойды. Тек маған:
– Сен ештеңені көңіліңе алмай-ақ қой. Ондай-ондай болады. Түсінбесе, неғыласың. Жазуды жалғастыра бер, ақырындап оқы, ізден, – деді.
Әйткенмен, ұзақ уақыт мүлде қалам ұстамай кетіппін. Бетім қайтып қалды. Үлкендердің алдамшылығы қатты опындырған еді. Сөйтіп, ол әңгіме әбден есейген кезімде бір-ақ жарияланған. Міне, оның осындай «тарихы» бар…
Сұраққа келсек, қазір өндіріп жазып жүрмін деп айта алмаймын. Тіршілік түйткілдері қол байлайды. Бәлендей бап тілей қоймасам да, жазуға да белгілі көңіл күйі қажет сияқты. Әйтеуір, жүректе пісіп жатқан ойлар жоқ емес.
– Футболшы Аман, қатыгез бала Малик сіз әңгімелеген аулада болған балалар ма, әлде қиялдан туған кейіпкерлер ме?
– Бұл кейіпкерлердің бәрі өмірден алынған.
– Алда жаңа жинақ шығару ойыңызда бар ма?
– Ондай ойлар бар ғой. Дегенмен жиі-жиі кітап шығаруды мақсат тұтпаймын. Ретіне қарай көре жатармыз. Бізге алдымен мәртебелі оқырман құзырына ұсынатын шығарма сапасына баса назар аудару керек болар.
Сұхбаттасқан
Батырхан БӨРІХАНҰЛЫ