Жұрт тыныш болсын!
Бүгінде бүкіл қазақ елі, қазақ елін танып-білгісі келетін төрткүл дүниенің әр түкпіріндегі барша жұрт ерекше зер салып, жіті назар аударып отырған бір шындығы бар. Ол қазақ елінің жаңа Президенті Қасым-Жомарт Тоқаевтың ел басшысы ретіндегі алғашқы сапарларын қалай бастап, қайда баратыны және алғашқы кеңес-жиындарда қандай бағыт-бағдар ұстанатыны, не айтатыны жайында.
Бұл орайда ел басшысы өзінің Президент лауазымындағы алғашқы сапарын киелі Түркістаннан бастап, Түркістан – тек қазақ халқының ғана емес күллі түркі жұртының қасиетті мекені, аса жауапты сәттер мен күрделі саяси шешімдер қабылдайтын уақыттарда тәу ететін қасиетті орын – сан ғасырлық адамзат шежіресінің куәгері және өркениет жауһары екенін бүкіл әлемге тағы бір паш етті.
Облыс әкімдерімен өткен кеңесте әкімдерге халыққа жақын болуды, жұртты мазалаған мәселелерге жедел жауап қайыруды тапсырды. Барлық деңгейдегі әкімдерге қатысты бұл тапсырма шенеуніктерге халықпен қарым-қатынастың дереу жаңа форматына көшуді, ашық және шұғыл әрекет етуді жүктейді.
Бұрынырақта, әлеуметтік желілерде ара-тұра айтып жүрген:
– Бізге даңғазалықты доғарып, ысырапшылдықтан арылу қажет…
– Ең алдымен, қазақ тілін және орыс тілін оқыту жүзеге асырылуы тиіс. Біздің балаларымыз үшін мұның мәні зор. Содан кейін ағылшын тілін үйретуге болады, – деген ой-тұжырымдарын тағы да нақтылап, қадап-қадап тұрып ашық айтты…
Ырым Кененбай,
«Құрмет» және «Парасат» ордендерінің иегері
(Толық нұсқасын газеттің №15 (3649) санынан оқи аласыздар)