Елбасы тапсырмасы бойынша «Нұр Отан» партиясының ұйытқы болуымен алғаш рет өткізілген «Ұлы дала» республикалық шығармашылық байқауы өз мәресіне жетті.

Салтанатты іс-шараға партия Төрағасының Бірінші орынбасары Мәулен Әшімбаев және белгілі ақын-жазушылар мен зиялы қауым өкілдері қатыс­ты. Партия Төрағасының Бірінші орынбасары Мәу­лен Әшімбаев жас ақын-жазушыларды қолдауға бағыттал­ған мұндай жобалардың алдағы уақытта да жалғасатынын жеткізді. Партия мен Қазақстан Жазушылар одағы бірлесіп ұйымдастырған байқауға 18 бен 40 жас аралығын­дағы қаламгерлер қатысты. Шы­ғар­маларды қабылдау мерзі­мінің қысқалығына қарамастан 400-ден астам еңбек келіп түскен. Нәти­же­сінде бес аталым бойынша жеңім­паздар мен жүл­дегерлер анық­талды.
«Проза» аталымы бойынша 1-орынды «Құдық басындағы екеу» шығармасымен Мақсат Мәлік иеленді. «Поэзия» аталымы бойынша 1-орынды Жа­нат Жаңқашұлы еншіледі. Бұл аталым жүлде­гер­лерінің қатарында «Қазақ әдебиеті» газетінің әдеби қызмет­кері, талантты ақын Батырхан Сәр­сенхан да бар. «Драматургия, көркем фильмдер мен телехи­кая­лар сценариі» аталымында жақын­да ғана «Қа­зақс­тан» ұлттық телеар­на­сынан көрсетілген «Кейкі мерген» телехикаясының сце­нариін жазған Сержан Зәкерұлы үздік деп танылды. «Балаларға арналған шығармалар» аталы­мында «Ұлы даланың жеті қыры» өлеңдер топтамасының авторы Бауыржан Қарағыз­ұлы жеңімпаз атанды. «Публицистика» аталымы бойынша 1-орын – Мақпал Жұ­машевада (шығар­масы – «Көк бөрі тотемі»). Барлық жеңімпаз­дар мен жүлдегерлерге қомақты қаржылай сыйақы­лар тағайын­далды: 1-орынға – 1,5 млн., 2-орынға – 750 мың, 3-орынға 500 мың теңгеден берілді.