ЖАСЫНДАЙ ЖАРҚ ЕТКЕН ҚАЙРАН РҮСТЕМ…
16.11.2018
1346
0

Қарашаның 10-13-і күндері Өскемен қаласында Мемлекеттік «Дарын» жастар сыйлығының лауреаты, режиссер, актер, ақын Рүстем Есдәулет атындағы IІ республикалық театр фестивалі өтті. Шығыс Қазақстан облыс әкімдігі, Шығыс Қазақстан облысы мәдениет, мұрағаттар және құ­жаттама басқармасы, Шығыс Қазақстан облыстық драма театры ұйымдастырған өнер байқауына Астана, Алматы, Қарағанды, Шымкент, Павлодар, Семей қала­ларының театрлары қатысты.

Фестивальдің ашылу салта­натында Қазақстан Жазу­шылар одағы Басқармасының төр­ағасы, ақын Ұлықбек Есдәулет: «Рүстем жаңашыл, жаң­а­лық­шыл бола­тын. Армандары көп еді. «Қазақ театрын қайтсем биік деңгейге көтерем?» деп жү­ріп, тіпті, өзін ұмытып еңбек етті. Рүстем үшін бірінші орында үнемі өнер тұратын. Өскеменге келіп тыңнан түрен салып, тосын, тың экспери­менттерге барды. Өнер әле­мінде өз сүрлеуін салуға ұм­тыл­ды. Сол үшін де әлі ешкім бас­паған, ешкім тәжірибесінде қолданбаған тосын шешім­дерге барды. Көрерменін өнердің өз тілімен таң­ғалдыруға жанын берді», – деп еске алды. Театр режиссері ретінде Рүстем Ес­дәулеттің «Атымды адам қойған соң», «Толғақ» сынды спек­такльдері талай бай­қауларда топ жарып, өзі жетекшілік ет­кен театр ұжымы бірнеше рет халықаралық байқаулардың жеңімпазы атанған. Қазақ труппа­сын басқарған жеті жыл ішінде 25 қойылым қойып үлгерген. Небәрі 31 жасында құйрықты жұлдыздай ағып түскен сан қырлы талант иесі ақын, актер, кинорежиссер ретінде де көпші­лікке жақсы танылған еді. Ол шығар­ма­ла­рында адам жаны­ның құпия­ларына те­рең бой­лауға тыры­сатын. «Бөрінама» жыр жинағы – соның бір дәлелі. Бұ­дан бөлек, өлеңдері «ХХІ ғасыр анто­логиясына» және басқа да ұжым­дық жинақтарға енген. «Лаве», «Обратная сторона» фильмдеріне түсіп, өзі де кино түсірумен айналысты. Оралхан Бөкейдің «Бес тиын» әңгіме­сінің желісі бойынша түсірген комедиясы 2007 жылы «Шәкен жұлдыз­дары» кино­фестива­лінде арнайы марапатқа ие болған. Рүстем Есдәулеттің осын­дай жарқын жолын ел есінде қалдыруды мақсат еткен фестиваль бары­сында мар­құмның өмірі мен шығарма­шылығы жайында «Бөрінама» деректі фильмінің тұсаукесері өтіп, сырлы есте­ліктер айтылды және спек­такльдерінен үзін­ділер көрсетілді. Өнер мен әдебиеттің тізгінін қатар ұстап, халқына адал қызмет еткен арда ұлдың есімі ешқашан ұмы­тыл­майды.

ПІКІР ҚОСУ

Ваш e-mail не будет опубликован.

Пікір