АБАЙДЫ ТАНЫП БОЛДЫҚ ПА?
Осындай тақырыптағы 16 тамызда «Қазақ әдебиетінде» шыққан Дина Имамбаеваның мақаласын оқып, еңбек ардагері әрі кәсіби саясаттанушы ретінде (8 жыл партия комитетінде лектор болған едім) өз пікірімді ортаға салсам деп едім.
Біріншіден, осындай түпкілікті, көкейкесті мәселені көтеретін жібі түзу мақала тұңғыш рет жарық көрді деуге болады. Әрине, қазір «Рухани жаңғыру: Болашаққа бағдар» туралы өте көп жазылып та, айтылып та жатыр. Өкінішке орай елден ерекше көрінейінші, басқалар айтпаған пікір білдірейінші деп кескінін көрсеткісі келетіндердің арасында тұшымды ештеңе айта алмайтындары да бар.
Екіншіден, рухани жаңғыру неден басталады, жаңа қоғамның құрылысшылары қандай болуы керек, жеке болмыстық дегеніміз не?
Абай адамның іштей түлеп, іштей есеймегенін қазақ жұртының бойындағы үлкен кемшілігі деп білген. «Шыға ойламай, шығындап қылық қылмайтындар» да осы іштей есеймеушілерден шығады ғой. М.Мырзахметов жасаған Абайдың толық адам туралы ілімі қазақ баласын рухани кемелдікке жетелейтін негізгі құрал екенін жас үкіметіміз әлі де болса түсініңкіремей жатқан болар. Біз ұрпағымызды көбінде алалығы жоқ, көрінген жерде сүріне бермейтін, тумай жатып болдырмаған, көңіліндегі жаз гүлін солдырмаған, сәл күштіге бағынбаған, сәл байлыққа табынбаған жартыкеш емес, бүтін жан болса дейміз. Ана сүтімен қазақ тілін меңгерген, халқымыздың салт-дәстүрін бойына сіңірген, қаршадайынан екіжүзділікті көрмеген, жалтақсыз-бұлтақсыз қимылдайтын баланың бүтіндігі кімді болсын қызықтырады емес пе?
Ал «жеке болмыстық» (идентичность) деген терминді қалай түсінуіміз керек? Жасыратыны жоқ, қазір қоғамтанушылар арасында бұл туралы ортақ тұжырымның жоқтығы байқалады. Мысалы, 1996 жылы «сәйкестілік» деп аталған бұл сөзге тағы да оншақты анықтама тіркелген еді. Бірақ бұл бір-біріне ұқсас қағидаттар өзара мүлдем кереғар, келіспестей тұжырымдар емес, тек қана дәлдігі келмей тұр. Мәселе өз болмысын түсінген адамның әлеуметтік ортамен қарым-қатынасында. Адам баласы әсерсіз, түйсіксіз отырмайды ғой. Оның естігенінен (туған тіліндегі анасының әлдиі), оқығанынан (дастандар, батырлар жыры), көргенінен (қазақтың салт-дәстүрі) тың хабар көп, сәбилік жасынан сонын бәрін қабылдайды, түйсінеді, есейген кезде көрген-білгенін қорытады, нәтижесінде өзінің жеке болмысы қалыптасады. Осы терминге 40 жыл бұрын түсініктеме берілген еді ғой, Дина Имамбаева жазғандай, неге біздің философтарымыз оны жасырып отыр? Мысалы, КСРО Ғылым Академиясының академигі В.Энгельгардт 1979 жылғы «Наука и жизнь» журналының 5-ші санында былай деп жазады: «Что понимается под термином «идентичность»? Если говорить предельно схематично, речь идет о понимании человеком собственной ценности в его взаимосвязях с социальной средой. Другими словами, идентичность – это понимание человеком своего места среди бесчисленного множества ему подобных, но и отличающихся от него человеческих существ; это понимание своего значения, ценности, в конечном счете смысла своего существования. Такое понимание определяется решением проблемы взаимоотношения единицы и множества, индивида и массы, человека и общества».
Қазақ – мемлекет құрушы ұлт дейміз. Жас мемлекет осындай жеке болмысы қалыптасқан және оны жоғалтпаған азаматтардан құралады, осы мәселені толығымен шешкеннен кейін ғана Қазақстанымыздың болмысы (идентичность) осындай еді деп айта аламыз. Ал біз, керісінше батысқа еліктеп, қазақты соған ұқсатамыз деп әуре болып жүрміз. Шын мәнінде бұл процестің өркениетті елдердегідей төменнен жоғары өткені дұрыс шығар деймін.
Асемхан МҰХАМЕДЖАНОВ,
саясаттанушы, Алматы қаласы Қоғамдық кеңесінің сарапшысы