«Қазақстанның жалпыұлттық киелі орындары» жобасы тағы бір тарихи нысанмен толықты. Еліміздегі тарихи-мәдени ескерткіштердің бірі – Байзақ батыр кесенесі аталған жоба аясында Қазақстанның 100 киелі нысанының тізіміне қосылды.

Киелі Әулиеата өңіріндегі халықты отырықшыландыруға көп күш жұмсаған Байзақ Мәмбетұлы Қоқан хандығы мен Ресей империясына қарсы ұлт-азаттық көтерілісті ұйымдастырушы ретінде тарих­та қалған кесек тұлға. Байзақ Мәмбетұлы датқа Қоқан отаршыларының айтқанына көнбей, қазақтардың мүддесін қорғай оты­рып, тәуелсіз саясат жүргізуге ұмтылады. Отаршыларға қарсы күресте Кенесары Қасымұлының сенімді серігі ретінде әйгілі болады.
Тарихи нысанға инфрақұрылым тарты­лып, туристік аймаққа айналдыру бағы­тында бірқатар жұмыстар қолға алынып жатыр. Сондай-ақ, кесене маңын жарық­тандырып, айналасын қоршау жұмыстары да жүргізілді.