Бішкектегі Қырғыз Ұлттық ғылым академиясында Қырғызстанның қоғам қайраткері, қарымды қаламгер О.Ибраи­мовтың орыс тіліндегі «Айтматов – империяның соңғы жазушысы» атты кітабының тұсаукесері өтті. «Жәмила», «Алғашқы ұстаз», «Қош бол, Гүлсары», «Жанпида», «Боранды бекет», «Көктөбедегі кездесу» (Қ.Мұхамеджановпен бірге жазған) секілді әңгіме, повесть, роман, пьесаларымен әлемді мойындатқан Ш.Айтматовтың шығармашылығы мен өмірінен сыр шертер бұл еңбек Халықаралық Түркі ака­демиясының қолдауымен жарыққа шықты.

Қырғыз елі Ш.Төреқұлұлының ту­ға­нына 90 жыл толуына орай­лас­ты­рыл­ған мерейтойды кең көлемде атап өт­пек. Бұл кітапты сол айтулы күнге тар­ту деп түсінген жөн. Аталмыш ең­бек­те Ш.Айтматовтың өскелең ұрпақ­қа қалдырар өнегесі, көпшілікке бей­мәлімдеу қырлары жатық тілмен әсер­­лі әңгімеленген. Түркі ака­де­мия­сының президенті Д.Қыдырәлі жазу­шы мұрасын зерттеу бауырлас ха­лықтардың арасындағы әдеби-мәдени бай­ланысты одан әрі нығайта түсетіні туралы айтып, О.Ибраимовтың осы ең­бегі үлкен үдеден шыға алатынын ес­кертіп: «Түркі академиясы Айт­ма­тов­тың аманатын ұмытпай, осынау ба­ғытта іргелі жұмыстар бастап кетті. Адам­заттық мәселелерді көтерген заң­ғар жазушының туындылары түбі бір түркі жұртын биік мақсаттар маңына топтасуға қызмет етеді деп сенеміз», – деді. Жиын барысында жазушының іні­сі, мұқым Қырғыз еліне мәшһүр гео­лог И.Айтматов пен қарындасы Р.Айт­матова ойларын ортаға салса, С.Раев, А.Акматалиев, Ж.Тентиев, А.Эр­кебаев, Ж.Сааданбеков, т.б. ға­лым­дар мен қаламгерлер баяндама жасады. Ал, «Айтматов – империяның соңғы жа­зушысы» атты кітаптың авторы О.Ибраимов: «Ұлы жазушының бол­мыс-бітімін, шығармашылық күш-қуа­ты турасында көзі тірісінде онымен етене араласқан адам ретінде көрген-түйгенімді жазуға тырыстым. Еңбегімді елеп, оның көзіқарақты оқырманға жол тартуына себепкер болған Түркі ака­демиясына алғыс айтамын», – деді. Ол шараға Қазақ елінің атынан Б.Ыбы­райым, Ж.Шаштайұлы, Н.Ораз сияқ­ты жазушылар қатысты. Қырғыз ғы­лым академиясының президенті, ака­демик М.Жұматаев бастаған Қыр­ғызстанның зиялылары игі бастаманы қол­дағаны үшін қазақ ұлты мен Ха­лық­аралық Түркі академиясына ри­за­шылығын білдірді.