Елорда – білім ордасы
06.07.2018
583
0

Ғалымқайыр МҰТАНОВ,
әл-Фараби атындағы
ҚазҰУ-дың ректоры,
Қазақстан Республикасы
Ұлттық Ғылым Академиясының академигі


Әлемдегі кез келген мемлекет­тердің үш тірегі – білім-ғылымы, экономикасы, әдебиет-өнері екені әлімсақтан-ақ дәлелденген. Ел көк туын көтеріп, еңсесін тіктегеннен кейінгі жүзеге асырар мәселелер осы екенін әу бастан бағамдаған Елбасымыз білім-ғылымды ұлттық негізде қайта түпнұсқалауды қолға алғызды. Әрине ол қаншама оқы­мыс­тыларымыздың да қиыннан қиюластыра қызмет атқаруларына жөн сілтеген бағыт болды. Өйткені, балабақша тәрбиелеуші­сінен бастап, мектеп бағдарла­маларын, жоғары оқу орындары оқулықтары ғылыми педагоги­калық әрі ұлттық тағылымдық нұсқада қайта жасалуы тәуелсіз ел талабы еді. Бұл жұмыс республика­мыздың түкпір-түкпірлеріндегі ғалымдар мен оқу, оқыту ісінің ардагерлерінің араласуымен жүзеге асырылып жатқанымен, шындығында да басты шешімін, ел жүрегі Астанада тауып жатты. Астанадағы Назарбаев универ­ситеті, Назарбаев Зияткерлік мектептері – зор серпіліс көрінісі.
Кім де болса өз мемлекетін мадақтап, елінің астанасын үлгі тұтқысы келетіні табиғи заңдылық. Осы тұрғыдан келгенде, Астана – Қазақстанның білім мен ғы­лым­дағы зор әлеуетін қалып­тастырды. Расында да, бұрын қазақс­тан­дық­тардың қайсыбіреулері шетел­ден білім алуды армандайтын, соған ұмтылатын. Ал қазір шет мемле­кеттік қаншама жастар Қа­зақ­станнан, соның ішінде Астана оқу орындарынан білім алуға ат басын тіреуде. Әрі сол талапкер­лердің Қазақстан ғалымдарының беріп жатқан дәрістеріне ықылас­тана ынта қойып, сіздер­дегі ғылым көш ілгері, – дейтіндерін де естіп қаламыз.
Бүгінгі таңда Қазақстан сан-сала­лы ғылыммен әлемге айғақта­лып, өз көшін өзі түзеп отыр. Толассыз ізденістердің көздері де осында. Жапондық, ағылшындық, француздық, американдық, герма­ниялық, басқа да көптеген ел ға­лым­да­рының бәсекелестік бары­сын­да қазақстандық ғалым­дар­ды да, ғылымды да мойын­дай­тын­да­рын уақыт өзі көрсетіп отыр. Сырт жұрттан алатынымыз бар болса да, олардың бізден де үйре­нері мол екенін ұмытпағанымыз жөн.
Астана барлық саладағы үлгі қа­былдар ғана емес, тағылым, үлгі тара­тар орталығымыз болып отыр. Әсі­ресе білім мен ғылымның на­ғыз ордасына айналды.
Астананың 20 жылдығы – бү­кіл елдігіміздің торқалы тойы. Ел­басы Н.Назарбаевтың төл пер­зенті, Қазақ мемлекеттігінің басты си­мволы – Астанамыздың мерейлі тойы құтты болсын!

ПІКІР ҚОСУ