Биыл ақын Жеңіс Қашқыновтың туғанына мерейлі 75 жыл толып отыр. Астанадан бастау алып, Қарағанды жерінде дүбірлеген ақын тойы жуырда ата қонысы Ақтоғайда жалғасын тапты.

Алыс-жақыннан жиылған меймандардың басын қосқан өнер мерекесі қазақ күресі сайы­сымен өрбіді. Себебі, Жеңіс Қашқынов са­налы ғұмырында спортты жанына серік ет­ті, қазақ және еркін күрестен Қазақстанның спорт шебері болды. Ақтоғай топырағынан да алғаш болып спорт шебері атағын алған адамның бірі. Сегіз қырлы, бір сырлы жанның өне­гелі өмірін жастарға үлгі еткен дәстүрлі ай­мақтық турнир жасөспірімдер арасында биыл бесінші мәрте өткізіліп отыр. Ақтоғай ау­даны әкімдігі ұйымдастырған жарысқа жүз­ге жуық жас өрен қатысты. 2006–2007 жы­лы туған жасөспірімдер арасындағы аймақ бірін­шілігінде 24 келі салмақ дәрежесінде – Қуат­бек Құмар, 27 келіде – Жанбол Ербол, 29 келі­де – Сабыржан Сәкенұлы, 32 келіде – Әбіл­мансұр Жанабек, 35 келіде – Нұрслан Сапарғали, 38 келіде – Сайран Секен, 42 ке­ліде – Асанәлі Серкебай, +42 келіде – Жан­нұр Боқанов қарсылас шақ келтірмей, жеңіс­тің тұғырына көтерілді. Барлық жүлдегерлер спорт шебері, ақын Жеңіс Қашқынов атын­дағы медальмен, бағалы сыйлықтармен мара­патталды. Балуандар бәсекесінен соң, ақын ру­хына арнап құран оқылып, ас берілді. Ме­рейтойдың келесі бөлігі Жеңіс Қашқыновтың 75 жылдығына арналған «Жыр-ғұмыр» атты әдеби-сазды кешке ұласты. Сөз зергерінің замандастары, ақын інілері жырдан шашу шаш­қан бұл күні мәртебелі поэзия салтанат құр­ды. Қаламгер мерейтойына орай Ақтоғай ау­даны әкімінің құттықтауын жеткізген Абы­лай Аманжолов аймақта өнерге үлкен қолдау жа­салып отырғанын тілге тиек етті. Қарымды қа­ламгер туралы көсіліп сөз қозғаған Ха­лық­аралық «Алаш» әдеби сыйлығының иегері, ақын Абзал Бөкен Жеңіс Қашқыновты туған жері еске алып, думанды кеш өткізіп отыр­ға­нына ырзашылығын білдірді.
Қазақстан Жазушылар одағының мүшесі, қа­ламгер Сүйіндік Жанысбай, ақынның қа­рын­дасы Сара Қашқыновалар да шалқар ша­быт иесін еске алып, шығармаларына ғы­лыми тұрғыдан зерттеу жасалатын уақыттың кел­генін айтты. Өңірдегі ақындар Мүсіркеп Сейдахмет, Руслан Нұрбай, Бағдат Мүбәрак, Ілияс Мұқай, Нұрдос Кәрімдер сахнада өлең­нен самал өргізгенде ақын қалыптастыр­ған мек­теп болашағының зор екеніне анық аң­ғар­ғандай болдық.
Жеңіс ақынның осы кеште Ескендір Ха­санғалиев, Темірәлі Бақтыгереев, Бағдат Ома­шев, Ибрагим Нүсіпбаев сынды компози­торлармен бірлесе жазған «Үш арыс», «Жүре­гінде халықтың», «Қазақ балуандары», «Ақ­тоғай», «Сүйдім сені» , «Қуыршақ» секілді ән­дері тыңдарман жұртшылыққа жол тартты. Кеш­ті қорытындылаған журналист-аудар­ма­шы, ақынның баласы Ернат Қашқынов сөз зер­герінің бай мұрасы, боямасыз болмысы жө­нінде сыр шертіп, келген қауымға алғыс біл­дірді.

Олжас ҚАСЫМ.