Бекжан ТҰРЫС,
актер, Қазақстанның еңбек сіңірген қайраткері

---

Театр әлеміне қадам басып, өнер өмірін кеше бастаған кезеңдерден бері Әшірбек ағаны білетінмін, бірақ ол кісі бізді таныған жоқ. Мүмкін көзге түспеген болармыз. Қырыққа толған шағымда бенефис өткізуге бел будым, Әш-ағаны шақырдым. Сол күннен бастап Әш-аға мені тани бастады. Содан кейін барып Әш-аға менің көп ойындарымды көре бастады, одан кейін барып мен туралы жаза бастады, мен туралы айта бастады. Көрген жерде ақылын айтып, сәттілік тілеп тұратын.

Театрда мені режиссерлер кө­бінесе шалдардың рөлдеріне салып жүрді. Сол кезде Әшірбек Сы­ғай маған: «Әй, Бекжан сен үлкен амплуалы кең актерсің, сен қазір Ақанды, Ричардты, Сы­рымды ойнайтын кезің, бұл штампқа апарып соқтырады, сен осыдан қашсаңшы», – деп рен­жи­тін. Мен айтамын: «Әшірбек аға, менің ойнағым келмейді емес. Ақанды да, Сырымды да ойнағым келеді. Әри­не өз Ақанымды шығаратын едім. Өйткені мен дипломдық жұ­мысымда Ақанды ойнаған кез­де жаман ойнаған жоқ бола­тын­мын. Рөл берілген кезде жұ­мыс болғандықтан, жоқ мен ана­ны ойнауым керек деп бас тар­та алмаймын. Табиғатымда жоқ», – дедiм. «Сонда да осы жа­ғын ойластыр, штампта қалып қал­машы», – дедi.
Бірде Әуезов театрында Әше­кең өзі тәржімалаған «Жүрейік жү­рек ауыртпай» спектаклінің прье­мерасы өтті. Сол қойы­лым­дағы шалдың рөліне үш актер түс­тік. Сәбит Оразбаев, Құман Тас­танбеков және мен. Сәбит аға ой­нады, Құман аға ойнады енді ме­нің кезегім келгенде Әшірбек ағаға айттым: «Ағаңызбен досы­ңыздың ойы­нын көрдіңіз, енді мені де сынап көріңіз аға», – деп ем: «Көреміз, көре­міз», – деді. Көзді ашып-жұм­ған­ша спектакль де өте шықты. Кейін көргенде айттым: «Сәбит аға өз жасында, Құман аға да өз уа­қытында, мен жаспын қалай бол­ды «шалым» аға», – дедім. Сөйт­сем, Әшірбек аға: «Әй Бек­жан, сен шал боп туған адамсың ғой өзі», – дегені бар.
Әшірбек Сығай болмысынан сөз­ге шешен еді ғой… Ойының ора­лымы бөлек, өнер атты қа­сиет­ті ұғымды жүрегіне тұмар қы­лып таққан адам ғой. Сол сұлу сөз­деріне ғашық болатынмын.

---

Шашылып түскен тіркестер

– Аймауытовты телефонға бола ма? – дейді әкімшіліктен сөйлеп тұрған қыз.
– Аймауытовыңыз кім? Сұрап тұрғаныңыз Жүсекең Аймауытов болса, ол кісі әлдеқашан о дүниелік емес пе еді? – дейді театр директоры.
Таң-тамаша қалған хатшы қыз өзіне-өзі күбірлеп:
– Вот здорово, Аймауытовқа «звонда, звонда» дейді. Сонда қалай? – деп телефон тұтқасын тұғырына қоя салады.
«Аймауытов театрына звондап айтыңыздар, бүгінгі спектакльге әкім барады» дегенді шала түсінген хатшы қызға не дерсіз!

***
Белгілі режиссер Асқар Тоқпановты көре сала танымал драма артисі:
– Асеке, өткенде Сырымды қалай ойнадым? – деп тықақтап бол­мапты.
– Ой, ойнауын сен ойнадың-ау, ұялауын мен ұялдым ғой, – депті жұлып алғандай, табан астынан тауып сөйлейтін шешен режиссер.

Әшірбек Сығай.
«Ойын-оспақ, әзіл-сықақ десек те…».