Жуырда халық ақыны Молдабай Жолдыбаевтың «Шапағат» атты тұңғыш жинағы жарық көрді. Молдабай – Кеңес өкіметі орнағаннан кейін халық жауы ата­нып, он жыл түрмеге қамалып, Сібірге айдалған тұлға. Кітапты ақынның ұрпағы Мұрат Молдабайұлы, жиені Анархан Сәкенқызы құрастырып, бас­тырып шығарды. Редакторы Салтанат Әлиакпарқызы. Кітапты құрастыруда М.Әуезов атындағы әдебиет және өнер институтының қолжазба бөлімінің қыз­меткерлерінің еңбегін ерекше атап айтқан жөн.
Молдабай ақын туып-өскен Сұраншы батыр ауылында осы кітаптың тұсау­кесер салтанаты өтті. Жиынды баспагер, ақын Манарбек Ізбасар кіріспе сөзбен ашып, жүргізді. Жазушы, тарихи тұлғаларды зерттеп жүрген тарихшы Нағашыбек Қапал­бекұлы баяндама жасады. Жамбыл ауданы әкімінің орынбасары Дастан Шалтабаев, ардагер журналист Жұмаш Арғымбаев, Олимпиада тұңғыш чем­пионы Жақсылық Үшкемпіров, әл-Фараби атындағы Қазақ Ұлттық университетінің профессор-ғалым­дары Арықбай Ағыбаев, Анарбай Бұлдыбаев, филология ғылымының кандидаты Тоқтар Әлібек, Жам­был музейінің директоры Мәулен Қожашев және басқалар сөз сөйлеп, естеліктер айтты. Ауыл өнер­паздары мен ақын ұрпақтары концерттік бағдарлама әзірлеп көрсетті. Молдабай Жолдыбаев жүл­десі үшін қазақша күрес және футболдан жарыс ұйымдастырылды.

С.ӘШІМОВА.