ҚАРЖЫЛЫҚ АҚПАРАТ ТАРАТУ ЖҮЙЕСІН ҚҰРУДЫ АРМАНДАЙМЫН
Бүгінгі таңда еліміздегі көптеген жастар шетелде білім алып, қайта оралған соң өз тәжірибелерін халық игілігіне айналдыруға кірісіп кетті. Варшава әлеуметтік және гуманитарлық ғылымдар университетінің 3 курс студенті Ғазиз ЖАҚСЫЛЫҚ та солардың қатарынан табылуды мақсат етеді. Осы уақыт аралығында бірқатар әлемнің дамыған елдерінде тәжірибе жинақтаған ол болашақта Қазақстанда Bloomberg сынды ірі қаржылық ақпарат тарату жүйесін құруды армандайды. Өз елін дамыту мақсатын алға қойған жасты Елбасы ұсынға «100 жаңа есім» жобасына кіруге лайық деп ойлаймыз. Жас маман өз саласының қазіргі замандағы ролін жан-жақты жеткізіп берген еді.
Ғазиз ЖАҚСЫЛЫҚ,
Варшава әлеуметтік және гуманитарлық ғылымдар университетінің 3 курс студенті
XXI ғасыр, технологияның дамыған дәуірінде көптеген мамандықтар келмеске кетіп, орнына жаңа, адам естімеген, айтылуы да қиын түрлі мамандықтар пайда болып жатыр. Менің түсінігімде мұны заңдылық деп ойлаймын. Ал біз, осы ғасырдың адамдары, сол жаңа заңдылықтарға бағынып, қабілетімізді шыңдап, жаңа білімді үйренуге талпыныс жасауымыз қажет.
Мен Бизнес және Медиа мамандығы бойынша оқып жатырмын. Бұл мамандық жаңа болмағанымен, елімізде енді ғана дамып келе жатыр. Яғни менің болашақ жұмысым – әлемде және елімізде болып жатқан экономикалық үдерістер мен трендтерді түсінікті тілмен халыққа жеткізу. Әрине, бұл үшін тек экономика мен бизнесті ғана емес, сонымен қатар журналистиканы да қатар алып жүруім қажет. Мұның адамзатқа қандай пайдасы бар? Жалпы адамдардың санасында экономика, бизнес, қаржы орталықтары, банк жүйесі дегенді естісе, онымен тек экономистер мен сол салаларға қатысы бар адамдар ғана айналысуы керек деген қате түсінік қалыптасқан. Оның үстіне түрлі экономикалық терминдердің қиындығы да бар. Бұл жердегі мәселе жалпы адамзатты экономист немесе банкир етіп шығару емес, олай мүмкін де болмас. Тек адамдарға өз қаржысын тиімді игерудің жолын көрсетіп, қаржылық сауаттылығын арттыру. Бұл – бір. Екіншіден, инвестицияға салынатын қаржылардың тиімділігін зерттеп, адамдардың қаржысының тиімді жұмсалуын қадағалау. Үшіншіден, түрлі БАҚ-та таралып жатқан экономикалық ақпараттарды сүзгіден өткізіп, шынайы мәліметтер тарату. Интернеттің даму қарқыны мен ақпарат көлемін ескерсек, бұл өте маңызды деп ойлаймын.
Қарап отырсам, қазір әлемде үлкен өзгерістер орын алып жатыр. Бұл өзгерістер экономиканы да, оның жеткізілуіне де өз әсерін тигізуде. Бұрынғы қаржы орталықтары саналатын Токио, Нью-Йорк, Лондон сынды қалалар өз позициясынан әлсіреп, Сеул, Дубай, Мумбай, Шанхай сынды жаңа қаржы орталықтары қарқынды дамуда. Географиялық тұрғыдан аталған қалалардың алыс екенін және олардан келетін ақпараттардың жылдам жетпейтінін ескерсек, бұл өз кезегінде өзіміздің қаржы орталығының құрылуына септігін тигізді. Астанада «Астана» Халықаралық Қаржы орталығы ашылып, мыңдаған адамдар еліміздің экономикасын дамыту жолында қызмет атқарып жатыр. Бұл орталықтың негізгі мақсаттары мен қызметтері жеке сайтта жазылған.
Осы орайда, алдыңғы қатарлы, экономикасы тұрақты елдерден үйренеріміз көп екенін түсініп, оқуымды Варшавада (Польша) жалғастырып, Стамбулда (Түркия) үлкен тәжірбиеден өттім. Екі жақтан жинаған білімім халық қажетіне жұмсалатынына сенемін және болашақта елімізде Bloomberg сынды танымал қаржылық ақпарат тарату жүйесін құрсам деймін.