«Жасыл экономикаға» жол салған университеттер одағы
04.08.2017
886
0

Әлем көз тіккен Астанадағы дүниежүзілік ЭКСПО-2017 көрмесі қыза түскен бұл күндері БҰҰ-ның «Академиялық ықпал» бағдарламасының тұрақты даму бойынша Жаһандық хабы болып табылатын әл-Фараби атындағы ҚазҰУ-да Жаңа Жібек жолы университеттері альянсімен бірге ұйымдастырылған «Future Life, Future Leaders» атты халықаралық жастар форумы өтті. Болашақтың энергиясы тақырыбын арқау еткен ауқымды шараға Қытай, Ұлыбритания, Түркия, Египет және ТМД елдерінің жүзден астам студенттері қатысты.

Жастармен қатар Алматыға шетелдік жоғары оқу орындары­ның басшылары ат басын бұрды. Мәртебелі меймандар ҚазҰУ-да алғаш рет өткен Жаңа Жібек Жолы университеттері альянсі­нің атқарушы комитетінің (UASR) кезекті отырысында бас қосты. Бұл – шетелдік әріп­тес­тердің әл-Фараби атындағы ҚазҰУ-ға артқан үлкен сенімінің дәлелі. Күн тәртібіне Жаңа Жібек жолын жаңғыртудағы университеттер жүргізген жұ­мыс­тардың нәтижелері, білім беру, ғылым және инновация саласындағы ынтымақтастықты тереңдетуге бағытталған жобалар шығарылды.
Әл-Фараби атындағы ҚазҰУ ректоры Ғалым Мұтанов алғы сөзінде халықаралық деңгейдегі аталмыш шаралардың маңыз­ды­лығына тоқталды. «Біз заман талабына сай нақты жобаларды құруға мүдделіміз. ҚР Президенті Нұрсұлтан Назарбаев пен ҚХР төрағасы Си Цзиньпиннің өзара келісімі нәтижесінде Қытай үкіметінің гранты бойынша ҚазҰУ-ға суперкомпьютер бері­ліп отыр. Оның негізінде біз Жаңа Жібек жолы университет­тері альянсінің халықаралық IT-технопаркін құру жұмысын бастап кеттік. Бұл университеттер альянсіне кіретін 130-дан астам ЖОО-ға онлайн білім беру, ірі бірлескен инновациялық жобаларды жүзеге асыруға зор мүмкіндіктер бермек», – деді ректор.
Жиынға қатысқан шетелдік әріптестер ҚазҰУ бастамасына үлкен қызығушылық танытып, қолдау білдірді. Ливерпуль уни­верситетінің проректоры Дайана Берч: «Халықаралық IT-тех­но­паркін құру – аса ірі әрі ауқымды жоба. Бұл білім мен ғылым саласындағы мемле­ке­т­а­ралық ынты­мақ­тас­тықты жаңа сапалы деңгейге көтеретін болады. Ливерпуль университеті әлемнің түрлі универ­си­тет­те­рімен, оның ішінде әл-Фараби атындағы ҚазҰУ-мен бірлесіп жұмыс істеуге мүдделі», – дей келе, ұлттық университеттің жо­ғары ғылыми-инновациялық әлеуетін атап өтті. Ал ҚХР-дың Алматыдағы Бас консулдығы­ның мәдениет пен білім жө­нін­дегі атташесі Ван Цин Пин бас­таманың Жаңа Жібек Жолы экономикалық белдеуін құру жө­ніндегі мемлекетаралық ауқым­ды жобаны жүзеге асыруға өз ықпалын тигізетінін айтты.
Сондай-ақ, отандық және шетелдік жоғары оқу орында­рының басшылары халықара­лық жастар форумына қатысқан студент-жастардың иннова­циялық зерттеу жұмыстарына баға берді. Гонконг поли­тех­никалық университетінің вице-президенті Ангелина Юн: «Студенттер өз жұмыстарын та­ныс­тыру барысында қуат көздерін сақтау және тұрақты даму үшін қандай жасыл технологиялар қолдануға болатын­ды­ғы жайлы айтты. Жастар бо­лашақ көшбасшылар ретінде, ең алдымен, бұқара халықты, оның ішінде жастарды қуат көз­дерін үнемдеуге үйрету маңызды деп санайды. Біз қуат көздерін сақтай білетін әрі жаңартылатын энергияны өн­діруді меңгерген көшбасшы­ларды тәрбиелеп шығаруымыз керек», – деп, шараның студент-жастардың өзара тәжірибе алмасу, мә­де­ниетаралық диалог пен тілдік байланысты арттырудағы ба­сым­дықтарын тілге тиек етті.
Жаһандану дәуірінің жастары ашық пікірталас алаңында жасыл энергия саласындағы өз идеяларымен бөлісе отырып, аймақтағы жастар арасындағы ынтымақтастық пен бірлестіктің мүмкіндіктерін, әлеуметтік инновациялар арқылы тұрақты қоғам қалыптастырудың мә­селе­лерін талқылады. Түрлі аймақтардан келген жастар 5 қала – Астана, Алматы, Пекин, Гонконг пен Сианьда жасыл технология құру идеясын ұсын­ды. Форумға қатысқан әл-Фа­раби атындағы ҚазҰУ-дың философия және саясаттану фа­культетінің 1-курс студенті Ерлан Шайхығали: «Барлық студенттер өз қаласын дамытуға арналған тұрақты даму идеясына негізделген жобаларын ортаға салды. Мен әріптесіммен бірге сүйікті қаламыз Алматыда тұ­рақты қоғамдық көлік жүйесін дамытуға арналған жобаны таныстырдым. Біздің жобамыз қоқыстан алынатын биоэтонол газын шығару және онымен жүретін қоғамдық көліктерді енгізуді көздейді», – дейді. Өз кезегінде Гонконг политех­никалық университетінің студенті Хармени Чанг ҚазҰУ қалашығынан алған әсерімен бөлісті. «Қалашық өте үлкен әрі жап-жасыл екен. Маған қатты ұнады. Біз ҚазҰУ технопаркінде жүзеге асырылып жатқан сту­денттердің жасыл технология бойынша жобаларына куә болдық. Студенттердің жұмыс­тары бізге ерекше шабыт сыйлады. Бұл шара мен үшін үлкен тәжірибе мектебіне айналды. Мен енді өз білімім мен күш-жігерімді болашақта қалай қолдануды білемін», – деді ол.
Айта кетерлігі, аталмыш шаралар қарсаңында ҚазҰУ-да ЭКСПО-2017 халықаралық көрмесін қолдау мақсатында Жаңа Жібек жолы университет­тері альянсімен бірлесіп ұйым­дас­тырылған «Жасыл технологиялар: Қазақстан мен Орталық Азия Ұлы Жібек жолы бойында» атты халықаралық жазғы мек­тебі ашылған болатын. Шілде айында Гонконг полите­хни­­калық университеті­нен бастау алған жазғы мектеп Қазақстан­дағы жетекші ЖОО-да өз жұмысын жалғастырды.
Мұндай кең ауқымды
халы­қ­аралық жазғы мектеп шарасы Қазақстан білім беру саласында тұңғыш рет өткізілді. Еуропа мен Азия ЖОО-ларында оқитын жүздеген студенттер мен магистранттар жазғы мектеп курстарына қатысуға ниет білдірді. Дәрістер мен пікір­таластарды әл-Фараби атындағы ҚазҰУ-дың үздік профессорлары мен шетелдік жетекші мамандар жүргізді. Студенттер жазғы мектеп аясында ҚазҰУ мен Колумбия университеті бірігіп ұсынған «MDP Global Classroom» бағ­дар­ла­масының ұйым­дас­тыру­­шылары өткізген «БҰҰ үлгісі – Жаңа Жібек жолы» атты кон­ференцияға қатысты.
Шара барысында шетелдік ЖОО басшылары мен сту­денттері Астанада өтіп жатқан ЭКСПО-2017 көрмесін тамашалау мүмкіндігіне ие болды.

ПІКІР ҚОСУ

Ваш адрес email не будет опубликован.

Пікір