«Қазақстанның қалыпты саяси жүйесін орнықтырудағы институттық реформалар»
04.08.2017
537
0

Жуырда Елбасы Н.Ә.Назарбаев ұсынған бес институционалдық реформаны жүзеге асыру бағытында М.О.Әуезов атындағы Әдебиет және өнер институтында «Қазақстанның қалыпты саяси жүйесін орнықтырудағы институттық реформалардың ролі» атты «Дөңгелек үстел» өтті. Институт өткізген іс-шараға ғылыми-зерттеу институттарының басшылары мен бас ғылыми қызметкерлері, ЖОО оқытушы-профессорлары, магистранттар мен PhD докторанттар, журналис­тер, т.б. қатысты. Шараны Институт директоры, ҚР ҰҒА академигі У.Қ.Қалижан «Президент және институттық реформалар» тақырыбындағы баяндамасымен ашты. Мекеме басшысы өз баяндамасында Президент Н.Ә.Назарбаевтың «Нұр Отан» партиясының XVI съезінде ұсынған бес институттық реформасының маңызына тоқталды.

Өркениетті отыз елдің қата­рына қосылу идеясымен үндесіп жатқан «Ұлт жоспары – 100 нақты қадамдағы» жоспарлар Қазақстанды күрделі сынақтар­дан алып өтетініне және біртұтас азаматтық қоғам қалыптас­тыратынына сенім білдірді. Президент ұсынған реформалар­­дың маңызын айрықша атап көрсеткен У.Қалижан: «Біз үлкен қоғамдық-саяси, рухани-әлеу­мет­тік реформалар кезеңінде өмір сүріп отырмыз. Мемлекет басшысы Н.Ә.Назарбаев жаңа басқару жүйесін ұсынды. Үкімет пен Парламенттің өкілеттіктерін кеңейтіп, Президенттің әлеу­мет­тік-экономикалық процес­тер­ді реттеудегі қызметіне тән қырықтан астам өкілеттіктерді заң шығарушы және атқарушы билікке беріп отыр. Осылай ел дамуының жаңа бағыт-бағдары айқындалу үстінде. Оған Н.Ә.Назарбаевтың: «Қазақс­тан­ның Үшінші жаңғыруы: Жаһан­дық бәсекеге қабілет­тілік» атты Қазақстан халқына Жолдауы куә. Бұл – Қазақстанның жаңа дәуірі басталды деген сөз. Сон­дықтан да Елбасы базалық құндылықтарды сақтай отырып, Төртінші өнеркәсіптік революцияны жүзеге асыруға бейім Мемлекеттік саясатты ұсынды.
Елбасының «Болашаққа бағдар: рухани жаңғыру» атты мақаласы ұлттық программалық даму кезеңдерін белгіледі. Бұған Нұрсұлтан Назарбаев ең әуелі өзі ұзақ дайындалды. Адам­заттың өркениет жолынд­ағы із­деністерін өлшеді, өз ұлтының ізін кесті, жоғын іздеді. Ол жи­һангез адамдай көне кітаптарға, ұлт шежіресіне үңілді. Осылай үштаған ұлттық реформа ор­нықты. Біріншісі – экономика, екіншісі – саяси реформа, үшін­шісі – рухани жаңғыру. Бұл ор­ныққан, қалыптасқан үштік Қазақстанның ұлттық біре­гей­лігі­нің кепілі болмақ», – деп ой қорытты. Қазақстанның үшінші жаңғыруы тұсында ұлт бірлігі мен жалпыадамдық құнды­лықтарды нығайтуда Елбасы ұсынған саяси реформалардың маңызы жоғары деп бағалаған ғалымдар осы тақырып аясында бірнеше баяндама жасады. Экономика Институтының директоры, ҚР ҰҒА академигі, э.ғ.д., профессор Ә.Ә.Сатыбалдин «Реформаның экономикалық негіздері» баяндамасында қазіргі әлемдік нарықтағы Қазақ­станның экономикалық диверсификациясы мен жа­һан­дық дағдарыстың ұлттық эко­но­­микаға ықпал ету жағ­да­йын­да Президент Н.Назарбаев ұсын­ған «әуелі – экономика, сосын – саясат» қағидасының мәні­не кеңінен тоқталса, Философия, саясат­тану және дінтану институты директорының орын­басары, ф.ғ.д. С.Е.Нұрмұратов ұлттық және жалпыадамзаттық құн­ды­лық­тарды сақтап, қорғай отырып, рухани жаңғыру мә­се­лелерін тілге тиек етті. Сонымен қатар, Ш.Ш.Уәлиханов атын­дағы Тарих және этнология инсти­туты­ның директоры, т.ғ.д., профессор З.Е­.Қабылди­нов «Тарихи сана және реформа», А.Байтұр­сынов атындағы Тіл білімі инс­титутының бас ғылыми қызмет­кері, ф.ғ.д., профессор
Ә.Жү­ніс­бек «Латын әліп­биіне кө­шу­дің жолдары», М.О.Әуезов атындағы Әдебиет және өнер институтының бас ғылыми қызметкері, Қазақстан халқы Ассамблеясы Алматы қалалық бөлімшесінің мүшесі, ф.ғ.к., доцент С.В.Ананьева «Ұлтаралық татулық – қазақ қоғамының алтын діңгегі» деген тақырыпта баяндама жасады. «Дөңгелек үстел» барысында
Ә.Марғұлан атындағы Археология институтының қызметкері А.Ә.Нұржанов та сөз кезегін алып, жалпыұлттық жаңғыру­дың үшінші кезеңінің тарихи мән-маңызына тоқталды. Ғалым рухани жаңғырудағы тарихи жәдігерлердің роліне айрықша назар аударып, өзі арнайы зерттеген Алматы, Жамбыл облыста­рындағы тарихи ескерткіштерді күтіп-баптау, қорғауға алу жа­йын­дағы ой-пікірлерімен бөліс­ті. Басқосу үстінде айтылған ой-тұжырым­дар еліміздің қа­лып­ты саяси жүйесін орнықтыру­дағы инс­ти­тут­тық реформалар­дың жүзеге асуында зияткерлік ортаның ерекше роль атқараты­нын атап өтті.

Айнұр АХМЕТОВА.

ПІКІР ҚОСУ

Ваш e-mail не будет опубликован.

Пікір