Ғасырды жырлаған ақын 70 жаста
16.06.2017
1424
0

Айтарым көп. (Несі мін?!)
Бір сөзім жоқ жасырын.
Бесігім бе? Бесігім…
Жиырмасыншы ғасырым, –
деп жыр­лаған көрнекті ақын, драматург, Қазақстан Республикасы Мем­лекеттік сыйлығының лауреаты, Қазақстан Республикасының ең­бек сіңірген қайраткері Нұрлан Ора­залин мерейлі 70 жасқа толды.
Ақынның мерейтойына орай өт­кізілген шығармашылық кеші 13 мау­сым күні Алматы қаласын­дағы Абай атындағы қазақ мем­лекеттік ака­демиялық Опера және балет теат­рында өтті.
Оқырманға ой салып, көкейде­гіні дөп басқан ақынның ке­­шіне зиялы қауым өкілдері, жергілікті және шетелдік ақын-жазу­шы­лар, өнер, мәдениет қайраткерлері қа­тыс­ты. Елбасы Н.Ә.Назар­баевтың құттықтау хатын ала келген қала әкімі Бауыржан Байбек ақынның қо­ғамдағы, саясаттағы сіңірген ең­бегін айта келіп: «Есімі елімізге кеңі­нен танылған ақын және бел­сен­ді қоғам қайраткерісіз. Еңбекке ара­ласқалы бері баспасөз, мәдениет пен өнер салаларында жауапты ­қыз­меттер атқардыңыз. Қала­мыңыз­­­дың қарымымен, ұйым­дас­тыру­шылық қызметіңізбен мем­ле­кетіміздің өсіп-өркендеуіне үлес қостыңыз. Өлеңдеріңіз қазақ оқыр­мандарының ойынан шығып қана қоймай, бірқатар бауырлас халық­тардың тілдеріне аударылды», – деп шығармашылығына тоқ­талды. Сонымен қатар, Қазақстан Рес­публикасының мемлекеттік хатшысы Г.Әбдіхалықова, Мәжіліс төра­ғасы Н.Нығматуллин, Сенат төра­ғасы Қ.Тоқаев та қуанышқа ор­тақтасып, жүрекжарды тілек­терін жолдаған екен. Оларды депутаттар Қ.Сұлтанов пен А.Бижанов жеткізді.
Сахнаға шыққан Қазақстанның Халық жазушысы, Еңбек Ері, аса көрнекті ақын Олжас Сүлейменов, сондай-ақ, Қазақстан­ның ха­лық әр­тісі, Мемлекеттік сыйлық­тың лауреаты, Еңбек Ері Асанәлі Әшімов ізгі ние­тін білдіріп, аға мен іні ара­сындағы ілтипатты қазақы дәс­түрмен көрсетті. Т.Жүргенов атын­да­ғы Қазақ Ұлт­тық Өнер Ака­демия­сы­ның студент­тері ақын­­ның отты жырларын мәнер­лей орындап, тыңдарман қауымның жүрек сезі­мін тербегендей болды.
Алматы облыстық Сүйінбай атындағы филармония мерей­тойлық кешті сазбен тербеді.

М.Қуатқызы.

ПІКІР ҚОСУ

Ваш адрес email не будет опубликован.

Пікір