Алматыдағы Ұлттық кітапханада көрнекті жазушы-драматург, ҚР Мемлекеттік сыйлығының лауреаты Дулат Исабековтің Ресейдің «Художес­твенная литература» баспасынан шыққан 4 томдық таңдамалы шығармалар жинағының тұсаукесер рәсімі өтті.

Тұсаукесер рәсімінде алғашқы сөзді Қазақстанның Халық жазушысы, КСРО Мемлекеттік сыйлы­ғы­ның лауреаты Ә.Нұрпейісов алып, Д.Исабековтің шығар­ма­шы­ғының ерекшелігі жайында сөз қоз­ғап: «Әуелі жазушының «Сүйек­ші» деген шығармасын оқыдым. Өзі­ме жаңа ұғым аштым. Сондық­тан осы шығарманы шын жүре­гім­мен қабылдадым. «Дерменесі» қат­ты ұнады. «Қарғын» романы – жас­танып жатып оқитын кітабына ай­налды », – деп жаңа томдықтың лен­тасын қиды. Көрнекті ақын-жазу­шылар Смағұл Елубай жүргіз­ген отырысқа академик, ҚР ҰҒА пре­зиденті Мұрат Жұрынов, көр­нек­ті жазушы қаламгерлер Бек­сұлтан Нұржеке-ұлы, Темірхан Ме­детбек, Әлібек Асқар, мәдениет­танушы-ғалым Мұрат Әуезов, сыншы, филология ғылымының док­торы Дандай Ысқақұлы, ақын Қазыбек Иса, мәдениеттанушы Әлия Бөпежанова, ақын,Қазақстан Жазушылар одағы басқарма төр­-
а­ғасының орынбасары Маралтай Райымбекұлы, т.б. көптеген зиялы қауым өкілдері қатысты. Шара барысында жазушы, ҚР Мемлекет­тік сыйлығының иегері Бексұлтан Нұржеке-ұлы: «Кеңес заманында қазақ драматургтарының шығар­ма­ларының өзге театрларда сахналануы сирек құбылыс болатын. Соң­ғы уақыттарда Дулаттың пьеса­сын Лермонтов театрынан көрдім. Қойылымды жұртшылық үлкен қо­шеметпен қабылдады. Бұл – тәуел­сіздіктің бір жылуы болса, екін­­ші­ден – таланттың көзге көрі­нуі, оны басқалардың қабылдауы. Шын та­лантқа ешкім тосқауыл бо­ла алмайтынын ол дәлелдеді. Мәс­кеуге ба­р­ып, спектакль қою мүмкін емес еді. Мәскеу Дулатты сахналады. Еш­кімнің арнайы тапсырма беруі­мен, нұсқауымен жасалынып жат­қан жұмыс емес, Мәс­кеу өзі мойындап, өзі ұсыныс жасады. Ол аз­дай, Лондонда, Кореяда шығар­ма­лары қойылды», – деді.
Кітаптың 2 томына – прозалық, 2 томына – драматургиялық шы­ғар­малар енген. Жазушының жи­нақ­тағы «Гауһар тас», «Үндемес», «Біз соғысты көрген жоқпыз» және «Қабылан» атты шығармалары кейін­гі жылдары ағылшын тіліне ау­дарылып, кітап болып Лондонда жа­рық көргені белгілі. Торт том­дықтағы бірқатар пьесалары Ресей, Болгария, Түркия, Англия, Баш­құрт­стан сияқты алыс-жақын ше­тел сахналарында қойылып ке­ле­ді.