Дөңгеленген дүние көз тіккен ассамблея
28.04.2017
1482
0

Астанадағы Бейбітшілік және келісім сарайында Елбасы Нұрсұлтан Назарбаевтың қатысуымен «Жаңғырудың негізі – тұрақтылық, бірлік, келісім» тақырыбында Қазақстан халқы Ассамблеясының XXV сессиясы 26 сәуірде өткені белгілі.

Сессияда сөз алған Қазақстан хал­қы Ассамблеясының Төрағасы
Н.Назарбаев 2017 жыл тәуелсіз Қа­зақ­стан тарихында ерекше жыл бо­лып саналатынын атап өтті: «Жүйе­лі жаңғыру биыл біздің бүкіл жұмысымыздың өзегіне айналды. Бі­ріншіден, экономикалық жаң­ғыру­ды қолға алдық. Екіншіден, сая­си жаңғыруды бастадық. Үшін­шіден, рухани жаңғыруға кірістік. Бұған мен «Болашаққа бағдар: рухани жаңғыру» атты мақаламды арнағанымды білесіздер», – дей келе бағдарламалық мақаладағы негізгі міндеттерге назар аударды. «Ең алдымен болашақ қазақ­стан­дықтың болмысын айқындап, қан­дай болуы қажеттігін атап өттім. Біріншіден, ол – әлемдік бәсекеге қабілетті жасампаз тұлға. Екінші­ден, алдына нақты мақсаттар қойып, соған ұмтылатын прагматик, әрі реалист. Үшіншіден, ұлт­тық бірегейлікті нығайтып, ұлты­ның дамуын тежейтін барлық нәр­­селерден бас тартатын адам. Төр­­тіншіден, білімнің салтанат құруын ең маңызды іс санайтын, жаһандық білімнің шыңына шық­қан жан. Бесіншіден, тек эволюция­лық даму ғана халқының өсіп-өркендеуіне мүмкіндік беретінін жақсы түсінетін саналы азамат. Алтыншыдан, ол – түрлі тілдерді меңгерген, әлемнің үздік тәжі­ри­белерін алуға және заман талаптарына сай өзгеруге қабілетті, сана-сезімі ашық адам», – деді Нұрсұлтан Әбішұлы. Елбасы Қоғамдық сананы жаңғырту бағдарламасын іске асыру жөніндегі ұлттық комис­сия­ның роліне де ерекше тоқталып өтті. «Тұтас қоғам да, жеке азамат та бейбітшіліктің, тұрақтылық пен ке­лісімнің өздігінен келе салмайты­нын білуге тиіс. Мемлекет ұдайы этно­саралық және конфес­сияара­лық процестердің тамырын басып, жіті қада­ғалап отыр. Ұлттық бірлікті нығайта түсу үшін Қазақстан халқы Ассамб­леясы мен барлық мемлекеттік органдар тұрақты, күнделікті жұ­мыс жасауда», – деген Президент Қазақстан халқы Ассамблеясы мен мемлекеттік органдар алдына жаңа міндеттер қойды. Елбасы елімізде бейбітшілік пен келісімді сақтау үшін ерекше шешімдер қарастыруды тапсырды. Сессия барысында Мемлекет басшысы ақпараттық  жұмыстарға ерек­ше мән беріп, 2018 жылы Қазақстан халқы Ассамблеясының көп­функционалды мультимедиалық порталын ашуды, сондай-ақ «Қазақстан халқы» интерактивті тарихи картасын жасауды тапсырды. «Ел иесі – қазақтың мемлекет құраушы ретіндегі айрықша ролін ескере отырып жа­салуы тиіс электронды карта ежелгі қазақ жерінде сан түрлі ұлт өкіл­дерінің ұйысу процесін көрнекі және толық көрсетіп береді. Білім және ғылым министрлігіне ҚХА-мен бірлесіп ғылыми негізде осы инте­рак­тивті картаны жасап, келесі жылы «Алғыс айту» күніне орай тұсауын кесу­ді тапсырамын!», – деді Нұрсұлтан Әбішұлы. Сөзінің соңында Мемлекет басшысы барша қазақстандықтарды алдағы 1 мамыр  – Қазақстан халқының бірлігі күнімен құттықтап, бейбіт өмір, игілік пен бақ-береке тіледі.
Сессияда зиялы қауым және азаматтық қоғамның өкілдері, өңірлерден кел­ген делегаттар, ҚХА мүшелері, шетелдік қонақтар, жұмысшы маман­дық­тарының, жастар ұйымдарының мүшелері және басқалар сөз сөйлеп, Қа­зақстан дамуы мен тұрақтылық, өзара келісімге қатысты өз ой-пі­кірлерін білдірді.
XXV сессияның қорытындысында Ассамблея үндеу қабылдады. Онда бәсе­кеге қабілеттілік, прагматизм, ұлттық бірегейлікті сақтау бүкіл Қа-зақ­стан халқына тән қасиетке айналуы тиіс делінген. Сессия соңы
Елбасы қатысқан мерекелік концертке ұласты.

ПІКІР ҚОСУ

Ваш адрес email не будет опубликован.

Пікір