Жылжыған жылдар адамның санасына салмақ қосып, өмірлік тәжірибемен бірге ақыл-ойыңды да толықтыра түседі. Өткен жылдарды саралай салмақтасаң неше түрлі пенделерді еске алып, жақсы мен жаманды жіпке тізесің. Солардың ішінде тоқсан пайызына ортақ мінез – Абай айтқан «жарқылдаған өмірге» алданып, қайтсем көзге түсемін, қайтсем атымды шығарамын, қайтсем кітабымды қалдырамын, қайтсем еңбегім еленеді деп өліп-өшіп, есі-құты қалмай шапқылап жүрген пенделерді жиі көргеніңді еске аласың. Ондайлар ешкім оқымайтын болса да бірнеше кітабын шығарады, айтары болмаса да жиі-жиі телехабарлардан көрініп, танымал болады, ешкімге ешқандай себеппен пайдасы тимейтін «ғылыми еңбектер» де жазып шығарады, атақ алады, кеудесіне де орден-медальдар қадатады. Сонысына қарап қарапайым халық көзі тірісінде ондайларды сыйлайды, еңбегі зор екен деп құрметтейді. Ұшпа бақтың буымен олар біраз жерге жетіп, төрде шалқайып, аттыға жол, ауыздыға сөз бермей, өмірдің мәні осы екен деп алданады. Бірақ өлген соң бағы ұшып, жетістіктерінің бәрі жасанды екені ашылып жатады…
Ал өмірдің шын мәні неде? Біздіңше, өмірдің ең басты мәні – жан-тәніңмен қалап, сүйген ісіңде шеберліктің шыңына жетсең және одан ләззат алсаң – өмірдің мәні сол ғой деп ойлаймыз. Осыған жетсең атақ та, даңқ та өзі келеді. Көзің тіріде келмесе өлген соң табады. Тіпті өлген соң да ұзақ жылдардан кейін табылып, кей адамдардың есімдері жарқырап қайта туып жататыны да бар. Мұндай адамдардың отбасылық бақыты да көл-көсір болып жатады. Қоршаған ортаңдағы құрмет пен бедел, қадір мен қошемет, ізет пен иба да арылмайды.
Хас шеберлікке жету үшін адамның бойында табандылық, алған беттен қайтпайтын қайсарлық, еңбекқорлық сияқты асыл қасиеттермен бірге көрінгенге елтімейтін, елігіп-желікпейтін қорғасындай зіл салмақты мінез бен жанашырлық бойынан үнемі табылатын мейірімді, жанашыр жүрек керек. Соңғысының неге қажеттігін көп адам ұға қоймайды, өйткені мейірімді жүректің шеберлікке қандай қатысы бар деп ойлайды. Ал өмірде қатып қалған қатты мінезден ешқашан қасиет шықпайтынын, тек қана жүрегі жылы адамдардың бойынан осы асыл қасиет табылатынын көріп жүрміз. Абайдың «үш-ақ нәрсе адамның қасиеті: ыстық қайрат, нұрлы ақыл, жылы жүрек» дегені содан. Қайрат пен ақылдың неге керек екенін білетін жұрт «жылы жүректің» не үшін керектігін біле алмай қалатыны бар. Алайда жылы жүрек болмаса сезімнен жұрдай адам күйкілік пен шикіліктен аса алмай, өмірдің мәнін ұға алмайды.
Міне, осы аталған қасиеттің бәрі бойынан табылып, өз ісінде шеберліктің шыңына жеткен, борышына қара тырнағына дейін адал болып, өмірдің мәнін түсінген бір адам туралы әңгіме қозғағалы отырмыз. Ол адамның есімі Ержұман Смайыл ағамыз.
Ер ағаң журналистиканың қара нары, ғалым Бауыржан Омарұлының сөзімен айтқанда «кәтепті қара нар». «Егемен Қазақстан» газетінде табан аудармай отыз жылға жуық басшы қызметте болып, зейнет жасына дәл толған күні жұмысын қалт қойған жалғыз адам. Осыдан-ақ оның артына ешнәрсе қалдырмай, барлық күшін, қуаты мен қауқарын өзінің сүйікті ісіне сарқа жұмсағанын біле беріңіз. Борышқа адалдық дегеннің жарқын үлгісі осындай-ақ болар.
Ерағаң өз шығармашылығымен тереңдеп айналысқан жоқ, тек журналистері мен басқа да қызметкерлерінің жақсы жазуына, міндеттерін дұрыс атқаруына барлық жағдайды тудырып, жұмысты жіті ұйымдастырып, өз ісінде шеберліктің шыңына жетуіне баулыған хас шебер, орны айрықша ұстаз, қамқор аға, қайырымды жан.
1990 жылдардың басында «Егеменді» Шер-ағаң басқарып, ешқандай әкімшілік ресурстарды пайдаланбай-ақ таралымын 200 мыңнан асырғанын бүгінгі күні қалам қамшылағандардың бәрі біледі. Рас, ол кезде еркін жазуға, шектеусіз ширығуға мүмкіндік туған заман болды, соған сай қазақ журналистикасының қарым қуаты да айқын көрінді. Бірақ басқа басылымдар «Егемен» сияқты 200 мыңнан асып, айды аспанға шығарған жоқ… Оқитын халық негізінен «Егеменді» іздеп кетті. Әрине, Шер-ағаңның аты мен заты да халықтың жүрегіне жол табуға жол ашты, бірақ бас редактор белгілеген бағдардан таймай, журналистердің қалың көшін бұйдасынан жетектеген орынбасары Ер ағаң еді. Соның бәрін Ер ағаң жердің тартылыс күші сияқты үн-түнсіз, ың-шыңсыз атқарып жүре беретін.
Ержұман аға қаламында қуаты бар, санасында сарайы бар талай жасты осы 30 жылға жуық уақытта «Егеменнің» табалдырығынан өзі аттатты. Осы жолдардың авторын да сонау, қиыр терістікте, еліміздің шетіндегі, желдің өтіндегі Қызылжар қаласында жүрген жерінен шақырып, бірден сенім білдіріп, шолушы қылып алған еді. Жасыратыны жоқ, «Егеменге» де басқа басылымдар секілді кейбіреулер тамыр-таныстықпен орналасып жатады. Ол енді өмір заңы ғой, мұндайды қазекең мойындамай, ат-тонын ала қашып, ерін мойнына алып тулайтыны да болады. Бірақ шындық солай және ол жалғыз қазақта емес, басқа халықтарда да болып жатады. Алайда Ер ағаң басшы болып жүрген жылдарда газетке жаңа тұрпатта ой айта алатын жастар келіп, жаңа тыныс, соны леп соққан. Ер ағаңның «Егемен» мен «Жас Алаш» та басшы болғанда қызметке алған шәкірттері шетінен «сен тұр, мен атайын» дейтін жойқын журналистер болып шықты. Мәселен, Қайнар Олжай, Нұртөре Жүсіп, Ермұрат Бәпи, Еркін Қыдыр, Бауыржан Омарұлы, Қыдырбек Рысбекұлы және т.б. қазақ ой-өрісінің алдыңғы қатарға дамуына үлес қосып жүрген ақтаңгерлер.
Ер ағаңның асыл қасиеті – ол тек шын сөйлегенді ұнататын. Жан тазалығының бір көрінісі сол ғой. Қандай ащы болса да шыныңды айтсаң, ол түсіністікпен қарайтын, ал өтірік айтып, алдағың келсе ол бірден сезіп, аза бойы қаза тұрып, қатты ашуланатын еді.
Бірақ Ер ағаңның ашуы… зілсіз болатын. Кейбір қыздарымыз аға ұрсып жатса біз күліп тұратынбыз деп қазір еске алады. Ал Ер ағаңның қыздарға жасаған қамқорлығын айтқың келсе, арнайы бір кітап жазуға болады. Ойсыз жүргенде түсіне бермейміз, ер адамның бойындағы асыл қасиеттің бірі – қолынан келгенше әйел қауымына қамқорлық жасау ғой. Өйткені, қанша жерден мықты болса да, әйел шіркіннің жаны нәзік, әрқашан қолдау мен қорғауға зәру болып жүреді. Бірақ соны көп еркектер біле бермейміз, кейбір бастықтар тіпті қыздармен ұстасып, жүрегіне қаяу түсіріп, соңына түсіп жатады. Ал Ер ағаң соны түсініп, олардың бәрін қолдайтын, жас қыздарды тіпті қанатының астына алып, қорғайтын. Қолы жұмыстан сәл босаса материал басатын барлық қыздарын жинап алып, шәй ішіп, қарбыз сойып, мәз қылып, әңгіме айтқызып отырушы еді. Жарқын-жарқын сөйлеп, жарқырап күліп отыратын қыздарымыз да ибасы мен инабатынан айрылмайтын. Көңілді қыздар көрікті де болып кетеді екен, сол кезде қыздарымыздың арасында «Сұлулар сайысын» өткізсе ғой, қайсы жеңер еді, Жанар ма, Сәлима ма, Әсел ме, Айнұр ма, Мәншүк пе, Ләйла ма… деп ойланып қалатынбыз.
Ер ағаңның қыздарға көрсеткен көп қамқорлықтарының бірін ғана айта кетпесе болмайды. Бір жылы Моңғолиядан оралған Сапаргүл деген қызымыз тұрмысқа шықты. Той Астанадан 250-300 шақырым жердегі, жолы нашар бір қазақ ауылында болуға тиісті екен. Күйеу жігіт те оралман. Қызымыз бәрімізге шақыру билетін бергенімен, жұрттың бәрі түрлі сылтау айтып, барғысы келмеді. Сол кезде Ер ағаң арнайы автобус жалдатып, ішіміздегі күміс көмей әншілеріміз бен сөзге шешен көсемдерімізді теріп алып, өзі бастап, тойға апарған еді. Сөйтіп, ауылдың атқамінерлері мен әкім-қаралары менсіне қоймаған тойға бір автобус болып, Астанадан арнайы, аспаннан түскендей болып «егемендіктер» кіріп келгенде жұрттың бәрінің естері шығып қалды. Өзін іздейтін жандар барын көрген қызымыз да қуанғаннан жылап жіберген. «Егемен» келеді деп неге айтпадыңдар, біз дайындалатын едік қой» десіп, жаңа ғана көк тірегендей шіреніп, төрде отырған әкім-қаралар да апы кіріп, күпі шығып, қызмет көрсетіп шала шабылып қалған еді…
Әрине, Ер ағаң тойсырап бара жатқан жоқ, ол тек өзінің ер мінезімен қанатының астындағы қарапайым қыздың шашбауын осылай көтеріп тастаған. Басқа бір бастық болса біреудің шашбауын көтермек түгіл, өзіне сый-құрмет тілеп, кергіп бітер еді… Мұндайдың жүздеген мысалын келтіруге болады, Ер ағаң алыс ауылға тұрмысқа шыққан бірде-бір қызының тойын атаусыз қалдырған жоқ, тіпті өзі бара алмай қалса жұмыстан босатып тойшыл топты жіберетін…
Қыздар дейміз… Ол ер-азаматтарға да соншалық қамқорлық жасап, басына күн туған жан болса, бірінші болып көмекке ұмтылатын. 2007 жылы Түркіменстанда іссапарда жүргенімде шешем қайтыс болып, дереу Ашхабадтан Алматыға ұшып келдім. Қазақстанда қатардағы журналистердің мекеме есебінен ұшақпен жүруіне болмайтындығына қарамай, Ерағаң телефонмен Астанаға ұшып келуіме рұқсат етті, ал мында жанар майына дейін толтыртып қойған өзінің мәшинесі күтіп алып, елге жеткізген еді… Мұндай жақсылықтарды қалай ұмытарсың?.. Ол барлық ұжым мүшелеріне де осындай қамқорлық жасайтын.
Кейде Ер ағаңның «әй, ертеңге монша жақтырам, келіңдер» деп жұртқа өзі хабарлап жүретінін де сағынышпен еске аламыз. Ал жұмыс бабымен бір керегіміз болып қалса, ол ешқашан қабылдау бөлмесіндегі апайды жұмсамай, тікелей өзі хабарласатын. Сондықтан бәріміз де ол кісімен тура, жиі араласатынбыз. Жүзге жуық журналистің бәрі де өз мұңдары мен мұқтаждарын оған тікелей айтуға үйреніп алған. Ер ағаң салған дәстүрмен берекесі берік, діңгегі мықты ұжымымыз ол кезде жылы ұядай еді.
Ержұман аға өзінің жұмысын шексіз сүйетін, түн ортасы ауа, кейде тіпті таңғы 5-ке дейін созылатын газетті сүзе қарап, көз майын тауысып аяқтап кетсе де ол таңғы сағат 9.30-да орнынан табылатын. Басқа бастықтардың бәрі 11-ден асқанда келеді, кезекші тіпті түстен кейін шығады, әрқашан орнынан табылатын жалғыз Ер ағаң ғана еді. Оның кезінде «өйтіңдер-бүйтіңдер, мынаны алыңдар, ананы салыңдар» деп команда бергіш байбатшалардың «шабуылы» да кемшін болды. Олардың шолтаңдай беретін ретсіз «шабуылын» тойтарып тастайтын Ер ағаңның батылдығы еді. Оқылуға болмайтын талай материалдарды ол өңдетіп, қырнап, мұртын бастырып қана бергізетін. «Өзгеріссіз басыңдар» дегенге ол пысқырмайтын, өйткені газетке жауап беретін өзі екеніне бекем еді. Кейде тіпті: «Ержұман ағаға ананы айтыңызшы, мынаны бергізіңізші» деп кейбір бастықтардың қоластындағы таныс қыздар өзімізге шығатын. Өзің неге айтпай-сың десек, ағай бізге ұрсады деп қорқатын еді… Сөйтіп, өз ісіне берік жан ешқандай шенеуніктің алдында ығысып, өз жұмысына өрескелдікпен араласуына жол бермеді. Сондықтан да газет оқылатын, оқырманды жалықтырмайтын.
Ерағаң туралы әңгіменің бәрін өткен шақта айтып отырғанымыз, оның «Егеменге» істеп жүрген жылдарын еске алып жатудан ғой. Әйтпесе Ерағаң, құдайға шүкір, бақуат, бүгінгі күні жетіп, пісіп, 70-ті желкелеп отыр. Біраз жылдар дем алған соң жұмысқа шығайын деген екен, балалары «дем аласың, бізге де, өкіметке де сіңірген еңбегің жетеді, ендігі керек ақшаңды өзіміз беріп тұрамыз» деп аналарының жанына отырғызып қойыпты. Бұл да білгендік, балаға да көп еңбек сіңіріп, тер төккеннің ақталғаны. Бірақ бір қызмет қылмай, еңбек етпей Ерағаң отыра алар ма, ол енді өз ауылының тұрғындары туралы мақалаларын, барлық достарын еске алып «Достар еске түскенде» жинақтарын т.б. шығарды. Өзінің курстас досы, рухани інісі Ербол Шәймерденов марқұмның рухына да көп еңбек сіңіріп, алты томдық шығармалар жинағын құрастырып берді.
Ер ағаң «Егемендегі» ұл-қыздарының бөбектерін де ұмытпай «Балаларды қорғау күнін» сылтауратып, жалғыз өзі бір жылы үлкен мереке де жасап беріп еді. Дәндеген бөбектер сол күнді еске алып, 1 маусым жақындаған сайын ата тағы келе ме деп тосып жүреді…
Мектепті жақсы бітіріп, ҚазМУ-дің журналистика факультетіне алғашқы жылы түсе алмаған Ерекең 18 жасында әскерге алынып, Солтүстік теңізі флотында әскери міндетін атқарған. Бұл жай флот емес, нағыз ядролық зымырандары бар сүңгуір қайық еді. Ер ағаң сонда үш жыл бойы, бірнеше ай судың астында, үнемі жұмыс істегеннен қызып тұратын приборлардың ыстығынан ауасы қапырық болып кететін кемеде, қара терге түсіп жүріп міндетін атқарды.
Әскерден келе сала ол журфакқа тағы барады… Бірақ қарайыңқырып қалған басы, тағы да өте алмайды. Мұқият дайындалып, келесі жылы тағы барады… Қысқасы Ер ағаң журфакқа бесінші рет барғанда ғана түскен. Осы уақытта ол журналистікке қолды бір сілтеп, басқа оқуға түсіп кетуіне болушы еді, бірақ алған бетінен қайтпайтын табанды, туабітті қайсар мінез оны көздеген мақсатына жеткізбей қоймады. Ақыры студент атанып, оқыған деген былай болады деп ең үздіктердің қатарына ілегіп, мықтының мықтысы ғана қол жеткізетін лениндік стипендияны қанжығасына бөктеріп жүрген…
Бірге оқыған қыз-жігіттерге де ол әрдайым қамқор болып, бастарынан құс ұшырмаған. Сондықтан күні бүгінге дейін алпыстан асқан курстастарының бәрі онымен «Сіз» деп қана сөйлесіп, қатты сыйлайды. Ұжымдасулары да өте тығыз, барлық қуаныштар мен қайғыда бір жерден табылып, ынтымақтары жарасып тұрады. Соның негізгі ұйытқысы Ер ағаң.
Қорыта айтқанда, Ержұман Смайыл өмірдің мәнін ұғып, өз ісінің шырқау шеберлігіне жеткен, міндетіне адалдықтан айнымаған, сонымен бірге жүрегіндегі жылылық шуағын жанында жүрген жанның бәріне молынан шашқан абзал жан. Мұндай жандары көп болған кәріс, неміс, қытай секілді елдер әлемнің алдына шықты, қазаққа да осындай жандардың көп болғаны керек. «Қайтадан қайрылып, қауымға келмейсің, Барыңды, нәріңді тірлікте бергейсің. Ғибрат алар артыңда із қалдырсаң – Шын бақыт, осыны ұқ, мәңгілік өлмейсің» деген Шәкәрімнің адамға қойған талабын ол толығымен орындап келе жатқан жан. Президент сыйлығының тұңғыш иегері, Қазақстанға еңбек сіңірген қайраткер сияқты мемлекеттен алған атақтары да көп. Ал халықтан алған алғысы мен батасы жөнінен одан озған адам жоқ. Ағаның жетпістен желдіріп өтіп, апайымыз екеуінің жұбы жазылмай жүзге жетуін тілейміз.
Жақсыбай САМРАТ,
журналист