Қазақстан Республикасы Президентінің Архивінде алғаш рет өткен Meetup форматындағы ашық кездесу архив саласының мамандарын біріктірді. Еліміздің әр өңірінен 100-ге жуық архивші «Е-архив» жүйесіндегі құжаттардың құндылығын анықтау мәселесін талқылады.

Іс-шараға қатысушылар архив саласындағы ең өзекті тақырыптардың бірі – құжаттарға сараптама жүргізу жайын жан-жақты қарастырды. Негізгі баяндама жасаған Архив қорларын ұйымдастыру және сараптау қызметінің басшысы Гүлнар Мұқажанова құжаттардың құндылығы қалай анықталатынын егжей-тегжейлі түсіндірді. Ол құжаттың қалыптасу тарихынан бастап, оның ғылыми және практикалық маңызына дейінгі негізгі өлшемдерге тоқталды.
«Дәріс барысында сараптама жүргізудің негізгі қағидаттары егжей-тегжейлі қарастырылды. Атап айтқанда, қор құрушы ұйымның тарихы, құжаттардың қалыптасу және сақталу ерекшеліктері, олардың ғылыми және практикалық маңызы, сондай-ақ жүйелеу мен толықтық мәселелері талқыланды», – деді Гүлнар Мұқажанова.

Кездесудің ашық форматы қатысу­шыларға нақты тәжірибелік кейстерді талқылап, өзара тәжірибе алмасуға мүмкіндік берді. Мамандардың айтуынша, Meetup форматы – өзекті мәселелерді жедел әрі тиімді талқы­лауға, сондай-ақ кәсіби кері байланыс алуға мүмкіндік беретін ыңғайлы алаң.
Айта кетейік, Қазақстан Республи­касы Президентінің Архиві архив ісі бойын­ша ұйымдарға арналған оқыту семинарларын тұрақты түрде өткізіп келеді. Ал жаңа Meetup форматы Архив­тің әдістемелік жұмысындағы жаңа­шылдық болып саналады және кәсіби диалог алаңына айналуда. Биыл мұндай кездесулерді тағы бірнеше рет өткізу жоспарланып отыр.