Алматыда Әбілхан Қастеев атындағы ҚР Мемлекет­тік өнер музе­йінде «Қазақ­станның кітап графикасындағы ұлт­тық эпос» ат­ты көрме ашылды.
Биыл Ә.Қастеев атындағы ҚР Мемлекет­тік өнер музе­йіне 90 жыл. Өнер музе­йінің 30 қаңтарда Президент Қ.Ж.Тоқаевтың қол қоюымен Ұлт­тық мәртебе атағын алуы айшықты мерейтоймен тұспа-тұс келіп отыр. Музей қорынан ашылған «Қазақ­станның кітап графикасындағы ұлт­тық эпос» көрмесі қос мерейтой аясында ұсынылған алғашқы бастама. Қазақ­станның ұлт­тық әдеби және көркемсурет мұрасының маңыздылығын атап көрсетуге, жас буынды шабыт­тандыруға әрі қолданыстан шығып бара жатқан кітап графикасын насихат­тауға бағыт­талған бұл көрмеде Қазақ­станның жетекші суретшілері жасаған графикалық туындылар, ұлт­тық эпостың қазыналарын сақтайтын сирек басылымдар орын алған. Сондай-ақ көрме кураторы Самал Мамытованың айтуынша, соңғы жиырма жылда көрмеге қойылмаған туындылар ұсынылған. Аталмыш көрмеде 90-ға жуық графикалық жұмыстар жинақталған.
Көрмеде Әбілхан Қастеевтің «Қобыланды батыр», Әубәкір Ысмайловтың «Қазақ халқының эпостық жырларына иллюстрациялар», «Қобыланды батыр» және «Алпамыс батыр», Константин Барановтың «Бозжігіт» пен «Айман-Шолпан», Евгений Сидоркиннің «Алпамыс батыр» және «Қыз Жібек» жырларына арналған графикалық парақтары мен иллюстрациялары бар. Олардың жұмыстары кейіпкерлердің эмоционалдық әсерлілігімен, жарқын мерекелік атмосферасымен және ұстамды монументалдығымен ерекшеленеді. Исатай Исабаевтың «Қобыланды батыр» эпосына жасаған иллюстрациялары аңызға айналған оқиғалардың драматизмі мен батырлығын жеткізеді. Әділ Рахмановтың «Ер-Тарғын» эпосына арналған туындылары композиция динамикасымен және графикалық техниканы меңгеру шеберлігімен таңғалдырады. Әлімхан Смағұловтың «Ақсауыт» жинағына арналған иллюстрациялары шеберлігімен және бейнелердің айқындығымен әсер қалдырады. Арсен Бисембиновтің «Қозы Көрпеш-Баян Сұлу» (1984) эпосына жасаған графикасы терең көркемдік ойға толы.
Көрмеде тек суретшілердің туындыларын тамашалап қана қоймай, өткен дәуірге еніп, қазақтың қанына сіңген мәдени мұрасымен танысуға болады. Мерейтой қарсаңында ұйым­дастырылған бұл көрме 21-сәуірге де­йін жалғасын таппақ.

Гүлайым ЖҰМАШ,
Тұран университеті