Астанада Қазақстан Республикасының Мемлекет­тік кеңесшісі Ерлан Қарин 2024 жылғы мәдениет саласындағы мемлекет­тік стипендияны әдебиет және өнер қайраткерлеріне табыс ет­ті. Мемлекет­тік стипен­дия әдебиет пен өнер саласындағы 75 адамға берілді.
Олардың қатарында Әкім Тарази, Мырзатай Жолдасбеков, Төлен Әбдікұлы, Қойшығара Салғараұлы, Серік Тұрғынбекұлы, Алтыншаш Жағанова секілді көрнекті ақын-жазушылар бар.
Жыл сайын тағайындалатын бұл стипендия – мемлекет­тің әдебиет және өнер қайраткерлерін, шығармашылық қызметкерлеріне және жас дарындарға көрсетілген қолдауы мен қамқорлығының айғағы. Сондай-ақ олардың ұлт мәдениетін өркендетіп, әлемге танытуға қосқан елеулі үлесіне көрсетілген құрмет.
Мемлекет­тік кеңесші Ерлан Қарин Мемлекет­тік стипендия иегері атанған әдебиет, өнер қайраткерлерін құт­тықтап, шығармашылық табыс тіледі.

Алматыда Достық үйінде Мәдениет және ақпарат министрі Аида Балаеваның қатысуымен әдебиет пен өнер қайраткерлеріне мемлекет­тік стипендия табыстау салтанаты өт­ті.
Стипендияға ие болғандар қатарында Асанәлі Әшімов, Марфуға Айтқожа, Бексұлтан Нұржекеұлы, Кәдірбек Сегізбаев, Тынымбай Нұрмағанбетов, Сейфолла Оспан, Бибігүл Иманғазина, Ақұштап Бақтыгерева, Ханбибі Есенқарақызы, Смағұл Елубай, Зейнеп Ахметова және басқа да көрнекті мәдениет пен әдебиет қайраткерлері бар.
Шара барысында министр руханият­тың көшін алға сүйреп келе жатқан аға буынның лебізі мен ұсыныс-тілектерін тыңдап, олардың ел бірлігін нығайту және ұлт­тық құндылықтарды насихат­тау ісінде маңызды рөл атқаратынына сенім білдірді.
Стипендия иегерлері мемлекет­тің қаржылай қолдауы арқасында, шығармашылықпен алаңсыз айналысуға мүмкіндік алады. Бұл стипендия еліміздегі әдебиет және өнер саласының дамуына ықпал етіп қана қоймай, тың идеялар мен жобалардың іске асуына септігін тигізері хақ.