БҰҚАРАЛЫҚ САНАНЫҢ КЕСІРІ НЕМЕСЕ ҰЛТ АЛДЫНДАҒЫ ЖАУАПКЕРШІЛІК
«Жақсы адам алысты жақын етер» деген Сүйінбай талай тарланның ірі мінезіне, аталы сөзіне сүйсінген ғой. Ал: «Екі жақсы қас болмас, екі жаман дос болмас» деген Бұқар бабам да адам қадірін бір кісідей-ақ білген-ді. Сұхбаттасың «жақсы» деген сөзге лайық болса, жанында өткізген бір сағатыңның өзі құндыздан да құнды болмақ. Бірлік пен толеранттылықты насихаттаушы Ассамблея Қазақ топырағын басып жүрген қаншама ұлт пен ұлыстың басын қосқан ұйым болғанымен де, тұлғатанумен айналыспайтыны белгілі.Бізге «сарам», яғни адам (кәріс тілінен аударғанда) қымбат! Соның бірі – ақын, драматург, киногер Лаврентий Сонмен жолығып, қойылған біраз сұраққа жауап алғанымызда сарайымыз кеңи түскендей күй кештік.
Лаврентий СОН,
драматург, ақын,
кино-сценарийші
– Қырқыншы жылдары жер аударған көптеген ұлыстардың тағдыры әрқилы болды. Соның ішіндегі кәрістердің Қазақ жеріне көшіп келгендегі ахуалы есіңізде ме?..
– Кәріс халқы Қиыр Шығыстан Қазақстан, Өзбекстан, Түркменстанға 1938 жылы толықтай көшіп болған. Сол кездері: «Кәрістер 48 сағаттың ішінде Благовещенск, Владивостоктан қоныс аударсын» деген жарлық шыққан. Сөйтіп, кәрістер тауар таситын вагонмен күн-түн жүріп, белгіленген жеріне жеткен-ді. Жолда біразы шейіт болғанына қарамастан олар көшіп келген мекеннің аты – Бастөбе еді. Сол кездегі жеркепе орны әлі күнге дейін сақталған. Қыстан аман-сау шығып көкке ілінген соң өзімен бірге алып келген күріш ұрығын Үштөбе маңына сеуіп, еңбек ете бастады. О жақ тұзды әрі тастақ демесеңіз, Қараталдың көмегі зор болды… Мен 1941 жылы тудым, ал кәрістердің Қазақстанның әр өңіріне көше бастауы 1949 жылдан басталды. Бала кезім алаңсыз әрі қызық өтті дей аламын. Қатты қиналып, зәбір көрген кезім есімде жоқ. Соған қарағанда, кеңқолтық қазақтар өте бауырмашыл болды ғой деймін. Матадан жасалған допты бірге теуіп, кешке кір-қожалақ боп үйге қайтатынбыз. Ол да бір дәурен еді, шіркін. Ағам марқұм әпенде еді. Төртеуміздің (мен, ағам, екі әпкем) метіркемізбен төрт оқуға түсіп, төрт диплом алған. Бүгіндері міне ата боп үйде отырмын. Бір ұл, бір қыздан бес немере сүйдім. Ұлым Санкт-Петербургте, ал қызым Алматыда тұрады. Екеуі де қаржы саласына барды. Қызым Қазақфильмде продюсер ретінде жұмыс істеп жүр. Жалпы, біз қазақтар де, кәрістер де Шығыс халқы болғандықтан олардың өмірге деген көзқарасы, ұстанымы, канондары дәстүрден әсте алыстамайды. Ең басты теңірқазығы – үлкенді сыйлау, кішіні ренжітпеу, еңбек ету, сабырлы болу. Орыстарды ренжіткім жоқ, бірақ олар ағылшындар сияқты. Тікбақай келеді. Өсіп-өнген соң ата-анасын ұмытып, кей жағдайда қарсы шығады, қатты сөйлейді, күш көрсетеді. «Қарға тамырлы қазақ» деген сөз бар, соны кәрістерге де қатыстыра айтуға болады. Туған-туыс, жақын-жуықты түгендей келгенде кәрістер де бір-біріне бауыр, аға, іні, әпке, қарындас боп шығады. Одан кейін неге екені белгісіз, Біз кәрістер немістермен жақындығымыз бар сияқты!.. Тағы бір нәрсе… Өзге елге барғанда кәріс көрсем қуанамын. Бұл ұлтшылдықтан туындаған дүние емес, бір бейсана деңгейіндегі сезім секілді. Мысалы, қазақ Қытай немесе Моңғолияға барып өз бауырын көрсе: «Ассалаумағалейкум!», – деп амандасып, шаттанатынындай ғой. Егер де сен белгілі бір ұлтпен тығыз байланыста болмасаң, онда уақыт өте келе өзіңді де ұмытасың. Өйткені, басқалардың Құдай берген мінезі, дәстүрі, өзіне ғана тән дүниетанымы болады емес пе?! Соларды зерттей жүре Жаратушыға жақындайсың! Мен осындай бір түйінге келдім.
– Кәріс тілін ұмыта қоймаған шығарсыз?
– Негізінен, білемін. Кәріс тілі хангунмаль және коремаль боп екіге бөлінеді. Біреуі жазбаша, біреуі ауызша стильді ұстанған. Кәріс тілінде 44 әріп бар. Бұдан бөлек хангыль деген бар. Ол 4 мың иероглифтен тұрады. Оны жаттап, үйрену өте қиын.
– Бергі жақтағы кәрістер мен арғы жақтағы кәрістердің айырмашылығы неде?
– Бірінші тілінде. Оларда көркем тіл әлі сақталған, ал біздікі диформацияға ұшыраған. Біз оларға қарағанда жан-жақты, көп қырлы (полифониялық) екенбіз. Себебі, біріншіден, бізде шетелмен байланыс өте күшті, екіншіден, ұлт пен ұлыс көп, үшіншіден, қызмет бабымен жан-жақты көре аламыз. Ал ол жақта бір жұмысқа тұрақтадың ба, болды, Қытайдағыдай зейнетке бір-ақ шығасың. Екіншіден, психологиясында. Олардың мінезі тұйықтау келеді де, тар профильді мамандық иесі көп. Сондықтан болар, өз саласынан басқаға бара алмайды. Өмірге икемсіздік мәселесі туындайды.
– Бізге қазақтарға кәріс, жапон, қытайды ажырату қиындау…
– Қытайларды бірден тани кетемін. Көздері өткірлеу және мінезі тік келеді. Және сөйлесіп отырған адамды әңгімесіне аса үлкен мән бермейді. Біз кәрістер сұхбаттасымызды қалайда ыңғайсыз жағдайға қалдырмаудың амалын іздейміз. Бұл жағынан бізге жапондар жақын. ВГИК-та Казуо Окада деген жігітпен оқыдым. Атасы ағылшын болғандықтан бойы ұзын еді. Кинорежиссер Михаил Ромм курсын бітіріп шықты. Қазір оның өз студиясы бар және Токиода тұрады.
Біз өз арамызда шартты түрде алғанда, Оңтүстік кореялықтарды хангусарам, Солтүстік кореялықтарды чосонсарам, ал шетелдегі кәрістерді коресарам деп бөлеміз. Сарам – адам деген сөз. Бүгіндері: «Социалистік бағытты ұстанған Солтүстік Корея дамып кетті» деген көзқарас бар. Айналып келгенде, бәрін экономика шешеді. Сол арқылы барып саяси ұстаным қалыптасады. Осы арада, адамдар тек қана экономикамен ғана шектелмей рухани жағын да мықтау керек. Адам бойында Отанға деген махаббат болмаса, ол саясаттың құрбаны болып кетеді. Фашизм солай туған. Гитлер немістерді ұлтшылдықпен ауырта келіп, ұлы соғысқа дайындады. Оның артын немен біткенін тарихтан білесіз. Ал сондай саяси тұрақсыз, рухани жағынан әлсіз елді жаулап алу оңай. Барлық нәрсе ана сүтімен және отбасындағы тәрбиеге байланысты. Тәрбие дұрыс берілмеген жағдайда ол қауіпті қаруға айналады. Ондай «мәңгүрттерді» кез келген бағытқа бұра салсаң болғаны, кете береді. Сондай бір келеңсіздікті пайдаланып кететін астыртын топтар, кландар, ұйымдар бар.
– Ресейдегі және Әлемдегі өнер адамдарын дайындап шығаратын мықты оқу орны – ВГИК-те оқыған екенсіз. Соған қарай, киноға келгеніңіз де заңдылық сияқты көрінеді. Енді әңгіме ауанын өмірден өнерге қарай бұрсақ…
– 1968 жылы ВГИК-ті бітірген соң, Алматыға оралып, Ш.Айманов атындағы Қазақфильм киностудиясына әдебиет бөлімінің Кәріс театрына көркемдік жетекші ретінде қызметке тұрдым. Оған дейін Свердловск радиотехникумында оқығам. Оны 1961 жылы тәмамдаған соң жолдамамен Барнауылға жіберді. Ол жақта кемелер жасайтын. Бір күні Мемлекеттік филармония 64 адамнан тұратын академиялық капеллаға конкурс жариялады. Бас, баритон, тенор дегендей, мен екінші қатардағы бас боп жұмысқа тұрдым. Сөйтіп, екі қызметті қатар алып жүрдім. Күндіз кеме жасаймын, кешке хорда ән айтамын. Бұған қоса, «Капитандар клубының» төрағасы болдым.
– Бүгіндері ән айтасыз ба?
– Жоқ, неге екенін білмеймін, жасым ұлғайғандықтан ба, ән салуға ұяламын (күледі). Ол кезде баламыз ғой, басында музыкалық сауатым аз болды. Мүлде жоқ десем де болар. Табиғи дарынның арқасы, сол. Кейін мықты ұстаздардан дәріс алып, сольфеджио үйрендім. Үлкенді-кішілі концерт, фестивальдарға шығып, орын алып жүрдік. Сөйтсем, бізді теледидардан көрсетіпті. Жұмыстан тыс кезде өлең, әңгіме жазып жүрдім. Сөйтіп, «Ленинская смена» қазіргі «Экспресс К»-ға шап-шағын туындым жарық көріп, бір күнде-ақ танымал болып шыға келдім. Сол газеттен: «ВГИК-ке жас дарындарды алып жатыр» деген хабарламаны көріп, көлемді әңгімемді жіберіп ем, бірден грантқа түстім. Қуанышымда шек жоқ. Институт 600 адамнан 10-ын ғана таңдап алды. ВГИК-қа түстім, енді жұмысты қайтемін? Барып бастыққа бір ауыз айтып едім, қолхат беріп, арқамнан қағып шығарып салды. Ол кезде қызметке тұру да қиын, шығу да қиын. Әйтеуір, жолым жеңіл болды. Өнер институтының емтихандары өте қиын еді. Бірақ бағыма қарай ұстазым мықты әрі беделді кісі еді. Әлгі конкурсқа жіберген шығармамның кеме жасайтын зауыт қызметкерлерінің өмірі туралы еді. Сөйтсем, оны бәрі оқып: «Мынандай жас жігіт бұндай қиын дүниені қайдан біледі, қалай игерді?», – деп таң қалып жүр екен (күледі). Оқуды үздік бітірген мен үшін ендігі мәселеге Отанға оралып, жұмысқа кіру болды. Қазақ киноиндустриясы дүрілдеп тұрған кезге тап болдым. «Қыз-Жібек», «Транссібір экспрессі», «Атаманның ақыры», «Тақиялы періште», «Менің атым Қожа» сияқты кинолар жарыққа шығып, көрермен көзайымына айналған уақыт қой. Мен жақсы бір ортаға, өнерді шын сүйген мамандардың ортасына түстім. Тапсырыс алып, тегін жазып беремін. Бәрі мені аяп: «Мына балаға ақша керек жоқ қой деймін, иә?!» – депті. Бірақ мен қандай тәжірибе жинап жүргенімді ешкім білген жоқ. Елдар Оразбаев түсірген «Транссібір экспрессінде» генерал Ямагутидің рөлін сомдадым. Менімен бірге атақты Олег Табаков пен Захаровтар ойнады. Мен сол киноның редакторы болып істедім, ал сценрийін Андрей Кончаловский жазған еді. 2011 жылы «Жерұйық» фильмі шықты. Режиссері Сламбек Тәуекел, сценарийші мен болдым. Кино көрерменге ұнады деп ойлаймын. Бұл кинода қазақ топырағына жер аударылған барлық ұлыстардың тағдыры бар.
– Бүгіндері киноның көркемдік сапасының түсіп кетуінің себебі неде?
– Қазір капитализм заманы. Адамға ақша қажет. Сондықтан болар, ірі киностудиялар коммерциялық бағыттағы кинолар түсірумен әуестеніп кетті. Оның кесірі сапаның төмендеуіне алып келді. Қазір қазақ классикалық киноларын қатты сағынамын. Оған теледидардың тұтқасын ұстап отырғандар да кінәлі. Себебі, көрсететіндері арсыз күлкі, арзан шоу. Ал жақсы режиссерлер қалтасында қаржысы бар демеушілерге тәуелді болып қалды. Бұл тек өнердің ғана емес, мемлекеттің, мемлекеттік жүйенің қасіреті. Мысалы, мен көптеген сценарий жазған адаммын. Бірде жеке киностудияларға жолдаған едім, ұнатпады. «Бізге елді күлдіретін, жеңіл туындылар керек», – деді. Кино мен теледидар – идеологиялық құрал, кино – ұлттың айнасы. Руханият майданында жеңілсек, онда мемлекеттігімізден де, мына Тәуелсіздігімізден айырылып қалуымыз мүмкін. Бүгінгі адамдар кітап оқымайды. Себебі, ойланғысы жоқ. Одан да телехикая көріп, көзінің жасын сүрткенді дұрыс көреді. Адам ойланбаса, ол еріншек бола бастайды. Ал адам ерінсе, оның барлық қасиеті, қабілет-қарымы, күш-қуаты жоғалып, ұлт әлсірей бастайды. Кітап оқитын кісіні көрсем, қуанып қаламын. «Читающая нация» деген ұғым бар. Біз сол деңгейге жете алмай жүрміз. Жетсек, дамимыз. Батыста неге бұрынғыдай ұлы тұлғалар жоқ. Себебі, бәрі ұсақталып кеткен. Жекелеген адамдар бар, бірақ әлуетті топ жоқ. Бәрі бұқаралық сананың кесірі. Сондықтан шешілмеген мәселе өте көп. Киногершіліктен бөлек ағаштан бұйым жасағанды жақсы көремін.
– Бұл өнер кімнен дарыған?
– Әкемнен. Әкем керемет шебер болған. Жесір әйелдерге әр түрлі зат, мүлік-мүкәмал жасап береді екен. Сөйтсем, араларында бір гәп бар боп шықты (күледі). Тағы, әкем көп аңыз-әңгіме, әфсаналар біледі екен. Кеш батқан соң ел-жұрт әңгімесін тыңдауға жиналады екен. Әкем де, шешем де ерте кезде қайтыс болған-ды. Әлі есімде, Үштөбе станциясында шешені болсын, немісі болсын, орысы болсын кәрісше сөйлейтін. Себебі, уақытында ол жақта кәріс көп қоныстанған-ды. Бір ағам, екі әпкем бар. Ағам дүние салған, бір әпкем Алматыда, екінші әпкем Солтүстік Осетиядағы Маздок қаласында тұрады. Өмір деген қызық қой өзі. Бала кезде қазы-қарта, құрт, ірімшік, май, сүт, қымыз ішпейтінмін…
– Ал қазір ше?
– Одан асқан дәмді нәрсе жоқ екен ғой. Мен кәрістерге: «Неге ең қиын жұмысты таңдап алғансыңдар», – деп қалжыңдаймын ғой. Күріш пен пияз өсіру қиямет-қайым ғой. Алты ай бойы су кешіп жүріп егесің, өсіресің, қарайсың, арам шөбін жұласың. Көбісінің аяғынан суық өтіп, жүре алмай қалғаны да бар. Ревматизм, артрит, полиартрит деген аурулар дайын тұрады ғой.
Одан бері біраз уақыт өтті. Қазақфильм өзгерді, Кәріс театры драмалық бағыт-бағдарынан ажырап, концерт, шоу, ән-би жаққа ауысты. Шынтуайтына келгенде, адамдар ақша қуып кетті. Драмалық театр мықты репертуар мен жақсы труппадан тұрады. Егер де репертуарлық саясат әлсіз болса, онда актер деген халық әр жаққа бытырап, жанбағыстың қамымен кетеді. Өкінішке қарай, уақытында өте мықты өнер ұйымы – Кәріс театры бүгіндері әлсіреп қалды. Және бір қызығы – осы бір ахуал өнердің барлық саласына ортақ.
– Бұның себебі неде?
– Бүгіндері Әлемдегі экономикалық кризис рухани дағдарысқа ұласып, ұлт ұстанымынан, басты бағдарын адасып қалды. Совет кезінде Партия деген бар еді. Ол коммунизмге, яғни «жарқын болашаққа» жету жолында барын салды. Сол кездері жалғыз партия, монопартия үстемдік құрғандықтан, бар нәрсе қадағаланды, мүлік, идеология, адам Жүйенің қарауында болды. Бірақ Қызыл империя құлады, құлдырады, жойылды, жоғалды. Енді қараңыз, жалғыз басқару жүйесін, белгілі бір үлкен орталыққа үйренген ел көп партиялы, поли-партиялық системаға өтті. Көппартиялы жүйе орнау үшін қоғам санасы жетіліп, өсу керек. Мәселен, Америкадағыдай, Консерваторлар, Либерал-демократтар, Республикандықтар деген сияқты. Біз дамушы мемлекетпіз, ал дамыған елдерде бірнеше партия уақыт өте келе қос партиялық басқару жүйесіне ауысады. Ондай деңгейге жету үшін әлі көп уақыт керек. Ол үшін демократия заңдылықтары толықтай орнап, мықты, жүйелі, сан саланың басын қосқан, рухани күш-қуаты ғаламат, идеологиясы айқын, діни-философиялық және этикалық нормаларға сай өмір сүретін, өз ділін, дінін, тілін, әдебиетін, мәдениетін, өнерін құрметтеп, шығармашылық пен ғылым-білімнің қара нарларына жағдай жасап, бар құндылығын алға қоятын басшылық орнағанда ғана қоғам да, ел де бәсекеге қабілетті боп, ішкі-сыртқы жағдайы тұрақталып, алдына қойған мақсат-мүддеге жете алмақ. Республика революциялық емес, эволюциялық жолмен даму керек. Қателіктер, келеңсіз жайттар болады, басқа тимей ештеңеге көзің жетпейді. Сондықтан ұрандатып, жалаулатып, шикі дүниені елге тықпалап, күштеп енгізудің қажеті жоқ деп ойлаймын. Қазақстан Орталық Азиядағы ең көпұлтты әрі қарқынды дамып келе жатқан мемлекет. Даму – Уақыттың меншігіндегі дүние. Егер де билік дамуды жеделдетсе, онда құндылық атаулысы саяси диформацияға ұшырайды. Бұл дегеніңіз, бағынатын нақты бір жүйе болмағандықтан әр адам ойына келгенін істеп, әркім әр түрлі жолмен тіршілік сүре бастайды. Бұның арты қылмыс, наркотрафик, Отанын сату, қашу, жемқорлық, ең маңыздысы, елдік сезімнің жойылуына алып келеді. Әр азамат саяси жауапкершіліктен айырылып, елді күйретіп тынады. Өте қорқынышты жағдай, иә?! Саяси жауапкершілік – азаматтардың елдік мүддеге, Қазақстанның дамуына үлес қосу деген сөз. Бәрі Қазақстан Бізге не береді екен деп күтеді, бірақ Біз оның өсіп-өркендеуіне бар күш-жігерімізді салуымыз қажет екенін ұғынып отырған ешкім жоқ. Тұрғындар санасындағы тұтынушылық психологиясымен іштей күресу қажет деген ойдамын. Өйткені, сен Қазақстанда тұратыныңды түйсінгенде ғана жүрегіңде патриотизм деген сезім оянады. Қазақстан деген не? Бұл – туған жерің, Отаның! Бас пайдасын ойлағандар бір нәрсе алып кетсек, жымқырып кетсек дейді. Меніңше, бұл дұрыс емес. Еңбек ет, өзіңді көрсет… Пайдаға кенелу кез келген кісінің бойында болатын мінез. Алайда, сол кеселмен күрескенде ғана адам атана аламыз емес пе?! Менің туған жерім Үштөбе, Отаным – Қазақстан. Қазақфильмде істеп жүргенімде шетелге көп шықтым. Қайда бармайын, мен өз елімнің өкілі ретінде сезініп жүрдім. Соның арқасында өзімді тәуелсіз әрі еркін екенімді ұғынатынмын. Бөтен елге жұмыс бабымен барған соң үйімді, отбасымды, Отанымды сағынатынды шығардым. Кейін ойлап қарасам, қазақтар айтатын «қарашаңырақ» деген сөз – өте терең ұғым екен. Шетелдіктердің маған, бала-шағама, еліме, Назарбаевқа қатысты қойылған барлық сұрағына сауатты, нақты, артық-кем сөз қоспай жауап беруді әркез мақсат тұттым. Қазақстанның тарихын, әдебиетін, мәдениетін, өнерін, әдет-ғұрпын, салт-санасын білуді міндет санадым. Онсыз Біз қалайша Қазақстан азаматы болып саналмақпыз?! Кез келген нәрсе бойға тіл арқылы сіңеді. Сол себепті, қазақ тілін үйреніп, мүмкіндігім келгенше қазақ тіліндегі кітаптарды оқуға тырыстым. Достарым: «Сен қазақша жақсы сөйлейсің!» – дегенде, мен: «Қайдам, бұның өзі маған аздық етеді. Қазақ тілінің терең, бай, ұлы екенін түсінген сәттен бастап, жерге деген махаббат оянды…», – деймін күліп. Досым Анатолий Ким айтпақшы: «Белгілі бір тақырыпқа барғың келсе толық игер. Егер де күшің жетпесе, барма», – деген еді. Қазақстан туралы көп нәрсе біліп-білмегенімді үйренудің арқасында саяси емес, рухани, психологиялық тұрғыдан өсе бастағанымды аңғардым. Әгәрәки, тілді білмесең онда сен сол елдің азаматымын деп айта алмасаң керек. Себебі, тіл арқылы қазақтың дәстүрін, қазақтың дүниетанымын, қазақтың тарихын, қазақ мәдениетін, қазақ мұрасын зерделей аласың. Өзгенің алдында ел намысын қорғап, ұялмай-қызармайсың. Өзбекстанда тұратын кәріс достарым бар. Өзбекше өте жақсы сөйлейді. Оған қоса заңын, тарихын, рухани мұрасын бір адамдай біледі. Жалпы, ұлт алдындағы жауапкершілік деген осы шығар. Және билік тарапынан бәріне ортақ талап қойылу керек. Мақсат – біреуді бөліп-жару емес, керісінше, ұлт мүддесін жүзеге асыру барысында барлық ұлыс ұжымдасып, бірігу.
Сұхбаттасқан
Әлібек БАЙБОЛ.