ЖАҢАРҒАН «ТҮРКІСТАН ТАРИХЫ»
Ел Тәуелсіздігінің 25 жылдығына орай «Әзірет Сұлтан» мемлекеттік тарихи-мәдени қорық-музейі «25 жылдыққа – 25 шара» жоспарын бекіткен болатын. Жыл басынан Жұма мешіті музейі, Қожа Ахмет Иассауи кесенесіндегі Асхана, Құдықхана бөлмелері музейге сай абаттанды.
Музейдің ашылу салтанатына конференция жұмысына қатысушылар, қала әкімінің кеңесшісі Ж.Ибрагимов, қалалық музей өкілдері мен басшылары, музей қызметкерлері және БАҚ өкілдері қатысты.
Халықаралық ЮНЕСКО ұйымы тарапынан 2016 жыл – «Иассауи жылы» деп белгіленуі мен Ел Тәуелсіздігінің 25 жылдығы мерейтойы аясында ҚР Мәдениет және спорт министрлігі «Әзірет Сұлтан» мемлекеттік тарихи-мәдени қорық-мұражайы «Қожа Ахмет Иассауи мұрасы мен ілімінің зерттелу мәселелері» тақырыбындағы халықаралық ғылыми-тәжірибелік конференциясын ұйымдастырды.
«Әзірет Сұлтан» қорық музейінің директоры Ж.М.Әубәкір конференцияны ашып, қатысушыларға сәт-сапар тілей келе Мәдениет және спорт вице-министрі Ақтоты Райымқұлованың құттықтау сөздерін жеткізді.
Ахмет Иассауи атындағы халықаралық қазақ-түрік университетінің бірінші проректоры М.Куталмыш мырза конференция қатысушыларына алғысын арнап, Иассауи мұрасының адамзат игілігіне айналуына ғалымдардың сүбелі үлес қосатынына сенім білдірді.
Конференция аясында көптеген іс-шаралар атқарылды. Солардың бірі – Қожа Ахмет Иассауи кесенесінің Ақсарай бөлмесіндегі «Ақиқат жолын үлгі еткен даналар мұрасы» тақырыбындағы кітап көрмесі.
Көрмеде мұражай қорындағы сақталған көптеген құнды көне баспа және қолжазба кітаптар қойылды. Сонымен қатар, жазба жұмыстарында пайдаланылған этнографиялық бұйымдар – шырағдан, сиясауыт секілді байырғы ата-бабаларымыздың тұтынған заттары көрерменге ұсынылды.
Мұражай қорында Иассауидің танымал шәкірттерінің көптеген шығармалары сақталған. Тақырыпты ашу мақсатында Қасиетті Құран кітаптары, Мұхаммедке (с.ғ.с) қатысты жазбалар, Ханафи мәзхабының негізін салушы, «Фикһул Акбар» еңбегінің авторы Әбу Ханифа секілді ғұламалардың шығармалары қойылды.
Аталмыш жиынға Англия, Түркия, Ресей, Өзбекстан, Тәжікстан, т.б. шетелдерден және отандық иассауитанушы ғалымдар қатысты. Атап айтсақ, пленарлық мәжілісте Қожа Ахмет Иассауи мұрасы және ілімін зерттеумен айналысып жүрген белгілі отандық және шетелдік зерттеушілер баяндама жасады. Конференция соңында Қожа Ахмет Иассауи мұраларының зерттелуіне сүбелі үлес қосып жүрген ғалым, зерттеушілерге сертификаттар тапсырылды. Қомақты екі томдық конференция жинақтары барша қонақтарға үлестірілді. Қонақжай Түркістанның мерекелік дастарханы барысында да қонақтар тарапынан ыстық ықыласқа толы тілектер айтылды.
Сонымен қатар, осы шара аясында «Әзірет Сұлтан» мемлекеттік тарихи-мәдени қорық-мұражайы жанынан «ИАССАУИ МҰРАСЫ» атты республикалық мәдени-танымдық жаңа газет өз оқырмандарына жол тартты. Алғашқы таралымы 2000 данамен жарық көрген газет «ҚОЖА АХМЕТ ИАССАУИ МҰРАСЫ МЕН ІЛІМІНІҢ ЗЕРТТЕЛУ МӘСЕЛЕЛЕРІ» атты халықаралық ғылыми-тәжірибелік конференциясында көпшілік қауымның назарына ұсынылды.
300 мыңдай тұрғыны бар Түркістан аумағындағы 180-ге жуық мәдени-архитектуралық, зайырлы-діни орындар, 24 мың жәдігер бұл күнде қорық мұражай есебінде. Өлкенің өткенінен құлағдар етіп, халқымыздың салт-дәстүрінен, әдет-ғұрпынан, тамыры терең тарихынан сыр суыртпақтайтын мұндай газет қалың оқырманның сұранысын қанағаттандырары сөзсіз.
А2 форматындағы газет айына бір рет жарық көріп тұрмақ.
«Әзірет Сұлтан» қорық-музейінің
баспасөз қызметі.