Биыл – ел Тәуелсіздігінің 25 жылдық мерейтойы. Жиырма бес жылда тапқанымыз бен жоғалтқанымызды елеп-екшеу – әрбіріміздің азаматтық парызымыз. «Гүлстан» республикалық ғылыми-танымдық, көпшілік журналының бас редакторы, «Өсімдіктер әлемі» оқу-әдістемелік кешенінің авторы, Қазақ Ұлттық Аграрлық университетінің профессоры Гөзел Құлжабаева өзінің азаматтық ұстанымы – елдегі орман қорының көбейтуіне атсалысу деп біледі.

«Еліміздегі орман қоры – 4-ақ пайыз. Қазақстан – жер көлемі бойынша әлемдегі тоғызыншы алып ел деп кеудемізді кереміз. Алайда, сол ұлан-ғайыр жердің қаншама пайызы көгалдан­ды­русыз жат­қаны, топырақтың күн­нен-күнге эрозияға ұшыра­ға­ны бізді көп алаңдата қоймайтындай. Ата-бабаның бізге қалдырған аманаты – жер болса, ол жерді біз өзімізден кейінгі ұрпаққа қалай сақтап отырмыз деген сауал бізді қатты тол­ғандыруы керек. Әрине, тек қа­на ойланып-толғанып отыра бер­мей, осы мәселені қалай ше­шеміз деген сауалдың да жауабы табылуы тиіс. Бұл орайда мен көп сөзге бармай, әуелі өз ауылымның айналасын орманға айналдырсам деп шештім», – дейді Г.Құлжа­баева.

Осылайша, Гөзел Құл­жа­баева­ның бастамасымен Басши ауыл­дық округіне қарасты ауылдар мен мектептерде жалпы аумағы 52 гек­тар жасыл аймақ қалыптасыпты. 2011 жылы Қарағайлыбақ (2 га.), Көктерек бағы (7 га.), 2013 жы­лы ҚР халық артисі Нұрғали Нү­сіпжановтың құрметіне алма ба­ғы (5 га.), 2015 жылы «Батыр ана» (10 га.) саябағының ресми ашылу рәсімдері өтіпті. Ал 2011–13 жылдары Кербұлақ ауданының Басши ауылындағы Райымбек атындағы, Нұрым және Аралтөбе ауыл­да­рын­дағы орта мектептердің ауласы «Гүлзар» қоғамдық бірлес­тігінің бас­тамасымен жасыл желекке бө­ле­ніп, сәндік бұталар, жеміс ағаш­тары, кактус алаңымен, әр түрлі гүл­дермен көмкеріліпті.

Аталған бақтарды аралап, ауыл маңындағы орман-тоғайды кө­ріп қайтуға Алматы мен Тал­ды­қорғаннан арнайы барған зиялы қауым өкілдері, қаламгерлер мен жур­налистер Кербұлақ ауданының Бас­ши ауылында өткен бірқатар іс-шараларға қатысып қайтты.

Әуелі Нұрым ауылында «Гүл­зар» саябағы және балаларға ар­нал­ған ойын бағы ашылды. Туған ауы­лын көркейту мақсатында әсем Алматысын қиып, ауылға көш­кен азамат Ерлан Құлжабай бас­шылық ететін «Жасыл аймақ» же­кеменшік тақырыптық бақ­та­ры­на арнайы барған қонақтар – ақын Оразақын Асқар, Бауыржан Жақып, Алмат Исәділ мырзалар, те­лежурналист Гүлмария Барманбекова, «Гүлстан» республикалық ғы­лыми-танымдық, көпшілік жур­­­налының PR менеджері Батима Қабдолданова, журналистер Ай­наш Есали, Бауыржан Кари­пов­тар ағаш екті. Белгілі ақын Оразақын Асқар ауылдағы ағайын­ға ақ батасын берді.

Бұған қоса, Нұрым орта мек­те­бі ауласында Қазақстан Жазушылар одағының қолдауымен «Абай бағы» ашылды. Нұрым ауылындағы орта мек­тептің жаңа ғимараты аула­сындағы бұл баққа былтыр қазан айында 170 түп емен егіліпті. Биыл бұл бақты енді та­ғы 100 түп көп­жылдық бұталар көр­кейте түспек. Жүз түп ағашты Ал­матыдан келген құрметті қо­нақ­тар арнайы әзірленген орын­дарға мектеп оқу­шыларымен бірге екті. Бұл бақты Нұрым орта мектебінің оқу­шылары күтіп бап­тайды екен. Әр сыныптың өзіне тиесілі ағаш­тары мен гүлдері бар. Олар өсім­діктердің гүлденіп өсуін өз­дері қадағалайды. Осы арқылы оқу­шылар та­биғатқа, оның  құнды­лық­тарына құр­метпен қарауды үйренеді. «Абай бағының» ресми ашылу салтанатынан соң, қонақ­тар мек­тептің жаңа ғимаратын аралап, кітапханадағы арнайы көр­ме­ні тамашалап, мектеп оқу­шы­ла­ры­ның жатқа оқуында Абай өлең­дерін тыңдады. Нұрым орта мек­тебінің кітапханасына «ГҮЛ­ЗАР» қоғамдық бірлестігінің ұйым­­­­­дастыруымен 550 кітап сыйға бе­рілді. Айта кету керек, жеке кі­тапханаларынан  әдеби  кітаптарды ақын, Қазақстан Жазушылар ода­ғы басқармасы төрағасының бірінші орын­ба­сары Ғалым Жайлыбай, ақын Ора­зақын Асқар, жазу­шылар Шәр­бану  Бейсенова  және Заря Жұ­мановалар тарту етіпті. Ақын Бауыржан Жақып жеке кі­тап­ханасынан 40 кітапты мек­теп кітапханасына сыйға тарты.

Журналистерден құралған топ түс ауа Н.Нүсіпжанов атындағы жә­не «Батыр ана» саябағын, Көк­терек, Қарағайлыбақ аумағындағы орманды алқапты аралады.

Айғайқұм мен Алтынемел та­биғи қорығының іргесінде ор­на­ласқан Басши ауылы – ертелі-кеш боран үзілмейтін елдімекендердің қатарында. Ауылға ұйытқи соққан сол боранның жолына бөгесін үшін жасалған үлкен теректі орман қалқан болып, осы күні ауыл жұр­ты желдің саябырсығанын ай­тады. Әрі ауыл маңындағы жай­қалған орман бұл жердің эко­жүйесін де өзгертіп, жыл сайын түскен жапырақ шіріндісі арқылы то­пырақ құнарланып, қара то­пыраққа айналып, сәндік ағаштар мен гүлдерге қызылды-жасылды кө­белек қонып, алты ай жаз қыр­ғауыл секілді құстар ұя салатын, ал­ты ай қыста қояндар мекендейтін аймаққа айналып үлгеріпті. Осылайша бұл орман өңірдегі эко­ту­ризм­нің  де бастамасына айналмақ. Экотуризм демекші, Гөзел ханым бо­лашақта осы сала бойынша жә­не агротуризм саласы бойынша да Алматы облысы аумағында бір­қа­тар жобалар бастап, елдегі жасыл аймақтың көбеюіне атсалыссам деп отырғанын да айта кеткен аб­зал.

Журналистер тобы бұдан кейін Райымбек батыр атындағы мектеп пен Аралтөбе мектебінің ауласына отырғызылған әралуан ағаштар, гүлдер мен өсімдіктерді, жеміс-ағаш­­та­рын көріп, олардың түрлері мен ерек­шеліктері туралы сол мек­теп­тер оқушыларының әңгі­месіне қанықты. Қос мектеп­тің оқушы­лары Алматы мен Талды­қор­ғаннан келген қонақтарға арнайы даяр­ла­ған шағын концерттік бағдар­ла­маларын ұсынып, Абай өлең­де­рін және Абайға арналған өлең­дерді жатқа оқыды.

Сапар соңында «Гүлзар» сая­бағында Ерлан Құлжабайдың бас­та­масымен Басши ауылдық окру­гі бойынша жасөспірімдердің қа­тысуымен жыл сайын өткі­зі­ле­тін «Асығыңыз алшысынан түс­сін» сайысының марапаттау рәсімі өтті.

Бас жүлдені  Нұрым  ауы­лының, бірінші орынды Ақтөбе ауылы­ның, екінші орынды Басши ауы­лы­ның мектеп  оқушылары  жеңіп ал­ған сайыстың жеңім­паз­дарына ар­найы сыйлықтар тапсырылды.

Қарагөз СІМӘДІЛ.