ҚАЗАҚТЫҢ ҮШ ТОТЫСЫ
Алматы қалалық кітапханалар жүйесіне қарасты №29 кітапхана-бөлімінің оқу залында «Қазақтың үш тотысы» атты әдеби-сазды кездесу кеші өтті. Кеш қонақтары – жазушы, «Алаш» әдеби сыйлығының лауреаты Шәрбану Бейсенова, жазушы Сара Латиева, Маркиза Базарбаева және «Мектеп мерейі» журналының редакторы Заря Жұманова.
Шараға №40 мектептің 10-11 сынып оқушылары, ұстаздары, кітапхананың оқырмандары қатысты. Оқушылар ақын-жазушылардың шығармаларына талдау жасап, өлеңдерін мәнерлеп оқыды. Жазушылардың өмір жолдары, өзара достығы, шығармаларындағы кейіпкерлері, алдағы жазатын шығармалары туралы сұрақтар қойылып, оқырмандар кешті қыздыра түсті. Жазушылар да өздерінің жазушылыққа қалай келгендерін айтып, болашақ тағы жазатын шығармалары жайындағы жоспарларымен бөлісті.
Осы кешке орай кітапханада «Курстас, қанаттас қаламгерлер!» тақырыбында кітап көрмесі ұйымдастырылып, ақын-жазушылардың кітаптары, аудармалары, журнал беттерінде жарық көрген мақалалары қойылды. «Қазақтың қыздарына қайран қалам» атты слайд жасалып, экран арқылы оқырманға көрсетілді. Бірнеше конкурстың жүлдегері Олжас Арманұлы «Махамбеттің жебесі», Н.Тілендиевтің «Әлқисса» күйлерін күмбірлете тартып, келген қонақтарға тарту етті. Кеш соңында жазушылар оқырмандарға қолтаңба таратты.
Қуаныш ИСАБЕКОВА,
кітапхана меңгерушісі.