Белгілі жазушы-сатирик Мұхтар Шерімнің «Адамға ұқсайтын адам» атты сатиралық романының алғашқы томы Пәкістанда аударылып, жарық көріп, жақын күндері салтанат­ты тұсаукесері өтпек.

Бұл – бір ғана қаламгердің емес, тұтас қазақ әдебиетінің халықаралық деңгейдегі мерейін өсіретін маңызды оқиға.
​Қазақ сатирасы соңғы жылдары әлемдік әдеби кеңістікке сирек қадам басып жүргені белгілі. Ал Мұхтар Шерімнің шығармасының пәкістандық оқырмандардың қолына тиюі – ұлттық әдебиеттің жаңа белесі. Әлемнің тағы бір бұрышындағы оқырмандар енді қазақ қоғамының тынысын, бүгінгі заманның шындығын, өткір мысқыл мен уытты әзілді өз тілдерінде оқуға мүмкіндік алады.
​Жазушының сатирасы – жай күлдіру үшін жазылған шығарма емес, оның әр кейіпкері қоғамдағы мінез-құлықтың, мансапқорлықтың, мақтаншақтықтың, жемқорлықтың, екіжүзділіктің көркем бейнесіне айналған. Автор күлкі арқылы оқырманды ойландырады, ащы шындықты астарлап жеткізеді.
​Романдағы Төргебасардың Париждегі Эйфель мұнарасын сатып алмақ болуы немесе Сұмтайдың БҰҰ-ға арыздануы – сырттай қарағанда қиялға құрылған оқиғалар. Алайда осы әсірелеудің ар жағында бүгінгі қоғамдағы орынсыз даңғойлық, мансап үшін бәріне дайын психология, шексіз амбиция жатқанын аңғару қиын емес. Бұл – классикалық сатираның басты ерекшелігі.
​Жазушының «Біздің мақтаншақтар», «Әкімшіліктен келдім», «Ертегілер елі жасасын», т.б. көптеген туындылары да күлкі мен мұңды қатар өріп, қоғамдағы келеңсіз құбылыстарды өткір тілмен түйрейді.
​Пәкістандағы тұсаукесер сәтті өтіп, қазақ әдебиетінің абыройын асқақтата берсін. «Адамға ұқсайтын адам» романы әлемнің көптеген тіліне аударылып, оқырман жүрегінен орын алсын.
​Бұл – қазақ сатирасының ғана емес, қазақ әдебиетінің халықаралық аренадағы тағы бір жарқын жемісі!

Гүлсара БАЙДАНОВА