АДАЛ ЕҢБЕК ИЕСІ
Екеуміздің таныстығымыз сонау өткен ғасырдың екінші жартысында басталған болатын. Содан бері тонның ішкі бауындай сырласып, ой бөлісіп, пікір алмасып дегендей сәттеріміз көп болатын. Осы орайда қаншалықты маңызды әңгімелерді бастап айтқанмен, әңгімеміздің көбісі сол баяғы ғылымның құпиясына ауыса беретіндігін сезетін едім. Өйткені, профессорды мол білім бекемдеп алған. Әңгімесін ой түбінен көтеріп ойланып айтатынына қайран қаласың. Онымен осылай сөйлесу, бірге болу ойыңды өсіреді, жан-жағың кеңейгендей сезімде боласың. Көпшілік уақытта оның осындай кең ой-өрісіне ілесе де алмай, тек тыңдай бергім келетіндігін жасырмаймын.
Академик Ғалиолла Төлендіұлының ғылым даңғылына шығуы мен оның осы жолда өсуіне зер салсақ, ол жастық шақтан бастап-ақ алдына мақсат қойып, іздену нәтижесінде жүйелі түрде келгенін аңғару қиын емес. Бұл мектеп қабырғасында, шамасы 9-10 сыныптарда болса керек, сол кездегі «Социалистік Қазақстан» (қазіргі «Егемен») газетінің редакциясына сұрау жолдап, Қазақтың ауылшаруашылығы институтының агрономия факультетіне қалай түсуге болады, қандай пәндерден емтихан тапсырады, жатақханасы, кітапханасы жақсы ма, спорттың қандай түрлері, көркемөнерпаздар үйірмесі қалай деген көптеген сауалдар қойып хат жазғанын, одан көп кешікпей өзінің көңілі толатын жауап алғанын ерекше бір сезіммен айтқаны есімде. Мен осыдан бастап өзімді-өзім қамшылап, осы салаға еңбек етуді мақсат еткенім рас деп қояды Ғалекең. Бұл дегеніңіз «болар бала басынан», «болар істің басына, жақсы келер қасына» деген өнегелі нақыл сөздерге сыйымды, мектеп оқушысының алда тұрған оқу – ғылым деген сапарға аяқ алысы.
Академик досым өзі бір шабыты толып сөйлегенде сондай оқытушы – профессорларға, ғылым саласында жүрген ғалымдарға, жалпы оған алғаш рет қол ұшын бергендерге алғысының шексіз екендігін, оларды мақтан ететіндігін үлкен адамгершілік ниетпен айтып отыруы да ақылды, парасатты, кішіпейіл жандарға тән қасиет.
Студент кезден бастап ғылым саласына жол сілтеп себепші болған, ғылыми жетекшісі болған, биология ғылымдарының докторы, профессор, Кеңестер одағының ғылымына еңбегі сіңген қайраткері Ағыбай Алмасұлы Алманиязовты ұстазым деп мақтан тұтып жадыраған кездерін көп көрдім. Әсіресе, оның өсімдіктердің цитологиясы мен цитоэмбриологиясы бойынша берген ілімдерін ерекше бағалап, айрықша мақтаныш сезіммен басқаларға жеткізе білуінің өзі осы ғалымға ғана жарасатын мінез. Өзі де менің осы кездерге дейінгі ғылым саласында қандай да бір жетістігім болатын болса, соған себепші болған, қолтығымнан демеп, жол көрсеткен осы кісіге ерекше ризамын, рахметім орасан үлкен деп отырады.
Кейінгі 20-25 жылдай Ғалиолламен дос-жолдас, әріптес дегендей бірге келемін. Көпшілігінде бас қосу отырыстары да болады. Осындайда тілек айту, тост айту дегендер де шындық қой. Сондайда Ғалиолланың ешкімге ұқсамайтын сол үй иесі жөніндегі өзінің адал тілегін, ақ көңілін айта алатын, ерекше, өзіндік бір қабілетке де бай екендігін байқап отырамын. Оның сөздері қазіргі біздің заманымыз туралы басталып, сол кездерде қалай өмір сүрудің керекті заңдылықтарын барлығымызға да, үй иесіне де ортақ екендігін қабыстыра отырып өзінің табиғи ойымен жеткізіп отырады.
Ғалиолла достың мансап дегенді, жалған беделді, жасанды жасалатын құрмет пен қошеметті өте жат көріп, оның не қажеті бар дегенін де талай естідім. Бұл кісінің бүкіл болмысы, жаратылысы тек еңбек және ғылымнан көп хабары бар жандармен тығыз байланыста жүретінінің өзі көп жайттан хабар берсе керек. Ғалиолламен сөйлесу, әңгімелесу өте жеңіл. Кәдімгі бірге туған туыстай, әрдайым жұмсақ, кішіпейіл, адамға жағымды, жатық мінезін айтсаңшы. Сондықтан да онымен әңгімелесу , сырласу кездерінде басқа бір ой ойлау, бір нәрсені бүгіп қалу ол кісіге жасалған қиянат сияқты болып тұрады. Бұл кісі дегеніңіз кіммен болсын тез сөйлесіп кететін қасиеті, сөзін тыңдата білетін қасиеттеріне қызығамын. Мәселе, адамның жасында емес, білімі мықты болса өзін көрсете білетіндігін көзіммен осы академик Ғалиолла Төлендіұлынан көрдім. Кезінде Мұхтар Әуезов «Әлкей Марғұлан академик емес, ол сол академияның өзі», – деген екен. Менің осы кейіпкерім осы нақыл сөзге тура келіп, тура тұтас академия сияқты. «Құнды сөз құнарлы ойдан шығады» дегендей-ақ оның әрбір жүргізген ғылыми еңбектерінің жүйелі екендігі байқалады, өйткені, оның ойлау қабілеті бұлақтың бастауы сияқты тың. Меніңше, әрбір ғалым ел игілігі үшін істеліп жатқан жұмыста сыналуы керек сияқты. Әрбір адам ұлт мүддесін жоғары қойып, өз ісіне адал болуы үлкен қасиеттердің бірі екендігін академик Ғалекең әу бастан-ақ жүрегінде мықтап бекіткендігі көрініп тұрады.
Академик Ғ.Мейірман лауазымды қызметтерде көп болған кісі, санап айтуға да өте қомақты, Республикамыздың Ауыл шаруашылығы ғылым академиясының академик хатшысы, көптеген ғылыми-зерттеу институттарының директоры, директордың орынбасары, бірқатар ғылыми-зерттеу институттарының бастауыш партия ұйымының хатшысы, сол мекемелердің бөлім меңгерушісі болып қызмет жасағаны біздің көз алдымызда.Сол кездерде де айналасындағы адамдардың ар намысына тимей, ерекше бір эмоцияға берілмей, дипломатты түрде ой бөлісетінін достары, әріптестері жиі тілдеріне тиек етеді.
Академик Ғ.Мейірманның биология ғылымдарының ең күрделі саласы – селекция оның генетикалық негіздері мамандығына сонау өткен ғасырдың 70-80 жылдары келгенін көрген едім. Ол уақыттарда ауылшаруашылығы дақылдарының генетикалық зерттеулерін бастауда өте қиын кезеңдер болатын. Ғылыми-теориялық білім беретін әдебиеттер, оқулықтар өте аз, тіпті болмаған да еді. Шетелдік әйгілі генетик ғалымдардың өздері де белгілі бір зерттеу жүйелеріне келе алмай, әр түрлі пікірлерде болатын.
Осыған қарамастан, Ғалиолла Төлендіұлы селекциялық, оған қарасты генетикалық зерттеулерді өте ыждағатты, ынталы түрде бастағаны әлі есімде.
Академик Ғалиолла Төлендіұлының ерекше екпін түсіріп айтатын еңбектерінің ішінде өзінің саналы ғұмырының көбісін арнаған, осы күнге дейін қол үзбей айналысып келе жатқан саласы – жоңышқа дақылының селекциясы мен генетикасы.
Жоңышқаның биологиялық құрылымы, генетикалық қасиеттері мен белгілері, жалпы табиғаты өте күрделі дақыл. Зерттеу тәжірибелері мен методикалық әдістемелерге бағына бермейтін өзіндік ерекшеліктері бар өсімдік. Табиғатта жоңышқаның диплоидты, тетраплоидты, гексаплоидты түрлерінің болуы ғылыми жұмыстардың нәтижелі болуына көптеген қиындықтар тудырады. Өйткені, әрбір генетикалық түрдің (генотиптің) өзінің бейнелеген өсу ортасына байланысты тек сол ортада ғана өзінің потенциалды мүмкіндіктерін көрсете алатын қасиеті болады.
Генетика мамандығында гетерозис деген құбылыс бар. Бұл биология ғылымындағы өте күрделі генетикалық құбылыс екендігін білетін ғалым Ғалиолла зерттеу жұмыстарын осы салаға бағыттағанынан ба, әйтеуір зерттеу қортындыларынан жақсы нәтижелер алып жүргенінің себебі осы әдісті қолдануынан екені рас.
Білім, ғылым саласында жан-жақты берекелі тірлік жасап жүргендіктен болар, ол үлкен-үлкен ғылыми конференцияларда, симпозиумдарда, конгресстерде топ жарып, тың пікірлер айта алатын шешендік, лекторлық қасиетін өз басым ерекше қастерлеймін.
Қай жерге, қай елге барса да академик Ғ.Мейірман көрген-білгендерін көңілінен өткізіп, екшеп біздің аудиторияға хабарлап отыратындығын айта кету абзал. Онда ол сол елде жүріп жатқан ауыл шаруашылығының әрбір салаларына қатысты жаңалықтарды елге жеткізіп, өзінің істеп жүрген зерттеулеріне қосып, кейінгі істелетін шаруаларға да ұсыныс беретін шешендігін айтпасқа болмайды. Бұл әрбір ғалымның қолынан келе бермейтін шаруа.
Жасыратыны жоқ, осы кездері ауылшаруашылығы ғылымы бойынша осындай жаңалығы, тың ойлары бар ғалым тек осы Ғалекең екендігі даусыз шындық. «Өзін ғана ойлаған жамандықтың белгісі, өзгені де ойлаған адамдықтың белгісі» деген халық даналығы осындай ерекше мінезі бар адамдарды нұсқаса керек. Ол өзіне дегеннен гөрі жұрт үшін қызмет істегенін күнде көремін. Бейтаныс кісілерге де ерінбей-жалықпай егісті қалай егу, күту, жинау керек деген агрономиялық көптеген сауалдарды түсінікті ғылыми тілмен түсіндіргенін көріп, қайран қалып, таңданатын кездерім көптеп кездеседі. Осындай әңгімелердің төңірегінде оның осы ғылымға деген соншалықты ынтасы мен махаббаты жатқанын аңғаруға болады.
Академик Ғ.Т.Мейірман көп жылдар бойы ауылшаруашылығы ғылымын басқару орталықтарында қызмет жасады. Оның ішінде Сыр өңіріне барып Қызылорда қаласындағы Қазақтың күріш ғылыми зерттеу институтын басқарғанын өзінің әріптестері үлкен жетістікке санайды. Мекеме басқаруда биік білімді, өнерді қажет ететіні белгілі. Өйткені, басқару деген көптеген адамдардың, үлкен ұжымның ақыл-ойларын, шешімдерін, қарама-қайшылықтарын білім мен ақылға салып қорытып, оны мақсатты бағдарламаларға жұмсау әркімнің қолынан келе беретін тіршілік емес. Мұндай жұмыстар жас кезінен бастап басқару стилін білетін өз қолтаңбасы бар Ғалиолла сияқты үлкен білікті, тәжірибелі азаматтардың ғана қолынан келеді.
Еліміздің барлық аймағындағы ғылыми зерттеу институттары мен тәжірибе станцияларының, тіпті жеке фермерлердің де баяғы әу бастан қалыптасуынан бастап, осы бүгінге дейін істеп жатқан бағдарламаларын толық біліп отыратынынан болар, үнемі сол өңірлерде жүрген мамандармен, ғалымдармен араласы өте тығыз.
«Жақсының жақсылығын айт, нұры тасысын» деген баталы сөзге лайықты осы азамат. Осындайда ол: «Уақыттың өлшемі осылай, сондықтан да мен әрбір жұмыс өзінің уақытында «базарлы ғой», – деп ойлаймын деп ағынан жарылып айтқан сөзінің өзі басқамызға үлкен өсиетті, парасатты жандардан шығатындығын айтуға тиіспіз.
Академик Ғ.Мейірманның зерттеу лабораториясындағы аса ауқымды ғылыми жобаларының бірі – «Қазақстан Республикасында жемдік және мал азықтық шөптердің жабайы түрлері мен туыстарының генетикалық қорын сақтау» проблемасы. Бұл проблема мемлекет тарапынан Біріккен Ұлттар Ұйымының «Азық-түлік қауіпсіздігін сақтау» құжаттарына сәйкес зерттеу жүргізіліп келе жатқан үлкен көлемді зерттеулер. Мәселенің өзектілігі өте ауқымды. Табиғатта кездесетін жабайы өсімдіктердің көптеген түрлері мен туыстары мәдени өсімдіктердің генетикалық қоры екендігін ол бұрыннан білетін ғалым. Осы өсімдіктердің генетикалық қоры, қоршаған ортаға байланысты, ауа райының қолайсыз жағдайларына байланысты, түрлі өсімдіктерде болатын аурулардың әсерінен жылдан-жылға азайып, кейбірі жоқ болып кетудің аз-ақ алдында тұрған жағдайы бар екендігін білген ғалым, өзінің зерттеу лабораториясының мақсатты зерттеулерінің негізгі бір тарауы етіп зерттеуге алғанына, оған білікті мамандар мен ғалымдарды ұйымдастыруын айтпасқа болмас. Негізгі мақсаты жабайы түрлер мен туыстардың өзін қаз қалпында сақтау және кәдімгі мәдени селекциялық зерттеулерге пайдалану. Өсімдіктердің жабайы түрлерінің генетикалық құрылымында, қоршаған ортаның түрлі жағдайына (ыстыққа, суыққа, түрлі ауруларға) шыдамды гендерге өте бай келеді. Осындай пайдалы гендері бар жабайы түрлер мен туыстарды мәдени өсімдіктер сорттарымен будандастырып, жаңа гендері бар ұрпақтар алу. Мұны селекцияда бастапқы материал деп атайды. Бастапқы материалды пайдалану нәтижесінде өмірге жаңа сорттар пайда болады.
Профессор Ғ.Мейірманның осы проблемасы дүниежүзілік өзектілігі бар, экспедициялық өте ауқымды зерттеулер екенін, оның ішінде осыны ұйымдастыра, осы іске барлығымызды жұмылдыра білетін, білімді жетекшінің еңбегін ерекше атап көрсете білуіміз керек. Әр түрлі түрлерді, туыстарды сол күйінде сақтап қалу үшін жыл сайын сол әрбір түрдің, туыстың дәнін жинау, оны арнайы орындарда сақтау, жылма-жыл оны көбейту және сол өсімдікке тиісті систематикалық анықтама беру негізінде жүргізіледі. Жиналған осы өсімдіктерге үш тілде (қазақша, орысша, латынша) анықтама беріліп, алынған жерінің бойлық, ендік көрсеткіші, теңіз деңгейінен биіктігі, «seit coll» анықтамасы толық жазылып, «генетикалық қор» ережелеріне сәйкес құжатталып, ол шөпке паспорт беріледі.
Сондықтан болар, Ғалекең ғылым алдында да, ғалымдар алдында да, жастар алдында да әр кездерде беделі биік болып тұратындығы маған мақтаныш.
Ғалиолла бүкіл саналы өмірін ғылым жолына арнаған, соның ыстығы мен суығына байыпты қарап, үлкен төзіммен келе жатқан адам. Ғылым мен білімнің нәрін жұтқан ұрпақтар тобына жатады.
Ғалекең барлық уақыттарда да адамдарға үлкен сеніммен қарайтыны, кең жүректі жан екендігі әрдайым көрініп тұрады. Содан болар, еңбегі берекелі, нәтижелері көп, ғылым саласындағы талай асулар мен белестерден шаршамай өтіп келе жатқанына қуанамын.
Шәкәрім қажы: «Мейірім, ынсап, ақ пейіл, адал еңбек» осы төртеуі бойында болса, сол шын адам болады деген екен. Осы төртеуі де академик Ғ.Мейірманның бойында бар деп толық айта аламын. Бұл осы ғалымға берген табиғаттың сыйы деп есептеймін.
Кенебай ҚОЖАХМЕТОВ,
биология ғылымдарының докторы.