Өткен жұмада Алматы қаласында Қазақ­стан Жазушылар одағының Басқарма төрағасы Мереке Құлкенов ТҮРКСОЙ ұйымының Бас хатшысы Сұлтан Раевпен кез­десті.

Кез­десуде Мереке Құлкенов Қазақ­стан Жазушылар одағы мен ТҮРКСОЙ арасындағы байланыстың жылдан-жылға нығайып, жаңаша мән-мазмұнға ие болып келе жатқанын айтып, екі ұйым бірлесе атқарып жатқан жобаларға кеңінен тоқталды.
Сөз барысында Сұлтан Раев түркі әлемінің рухани құндылықтарының ортақ екеніне баса назар аударып, бірігіп қолға алатын шаруалар көп екенін тілге тиек ет­ті. ТҮРКСОЙ Бас хатшысы Алматыға үлкен миссиямен келгенін айтып, еліміздің ақын-жазушылары мен өнер қайраткерлеріне түркі әлемінің руханиятына сіңірген еңбектері үшін ТҮРКСОЙ-дың арнайы марапат­тарын тапсырды.
«ТҮРКСОЙ Алтын медалімен» қазақтың көрнекті ақыны, Мемлекет­тік сыйлықтың лауреаты Темірхан Медетбек пен белгілі актер, режиссер, Қазақ­станның халық артисі Досхан Жолжақсынов марапат­талды.
«ТҮРКСОЙ медалімен» жазушы Сәуле Досжанова мен белгілі ақын Бақыт Беделхан марапат­талды. Белгілі ақын Заида Елғондинова Қырғызстан Жазушылар одағының құрмет­ті мүшелігіне қабылданды.

Марапат иелері ТҮРКСОЙ ұйымына алғыстарын білдіріп, бұл марапат­тың тек жеке жетістік емес, қазақ мәдениеті мен әдебиетіне көрсетілген зор құрмет екенін атап өт­ті. Кез­десуге қатысушылар түркі халықтарының ортақ рухани құндылықтарын насихат­тау, туысқан мәдениет­тер мен әдебиет­терді одан сайын жақындастыру жолдары туралы нақты ұсыныстарын айт­ты.
Одақ төрағасы Мереке Құлкенов қазақ­тың аса көрнекті ақындары Қадыр Мырза Әлі, Тұманбай Молдағалиев және Жұмекен Нәжімеденовтің осы жылғы мерейтойларын түркі әлемі деңге­йінде атап өту туралы бастама көтерді.
Кез­десуден ке­йін құрмет­ті қонақтарға ауызашар берілді.