Әл-Фараби атындағы ҚазҰУ-дің журналистика факультетінде Дүниежүзілік жазушылар күніне орай, Халықаралық ПЕН-клубтың қазақ­стандық бөлімшесінің президенті, Құрмет, Парасат ордендерінің иегері, қоғам қайраткері, әдебиет сыншысы, журналист Бигелді Қайырдосұлы Ғабдуллиннің студент жастармен кез­десуі өт­ті. Т.Қожакеев атындағы аудиторияда өткен кез­десуді Журналистика факультетінің деканы Қанат Әуесбайұлы жүргізіп отырды.
Темірбек Қожакеев кезінде осы төрде отырған қонақтардың барлығының дерлік ұстазы болғанын айта келіп, Бигелді ағамен бірге келген Сағымбай Қабашұлы, Қансейіт Әбдезұлы, Ләйлә Сейсенбекқызы, Бауыржан Өміржанұлы, Бақытжан Мұсаханұлы, Берекет Бақытжанұлы, Аманжол Боранбайұлы сынды меймандарды жеке-жеке таныстырып өт­ті.
Бигелді Қайырдосұлы ҚазҰУ-дің студент­терімен жүздесуге өзінің соңғы уақыт­та жазып бітірген бірнеше кітабын ала келіп, жекелей таныстыра әңгімелеп берді. Сонымен қатар ол еңбектерінің қашан және қалай жазылғанына тоқтала отырып, өзінің қызықты да қилы тағдырынан сыр шерт­ті.
«Ер жігіт­тің мойнында қыл арқан шірімес» демекші, ғұмырында өмірдің ащысын да, тұщысын да көрсе де еш мойы­мастан өзінің журналистік мамандығына берілгенін сезіндік. Әсіресе «Ұлы көш», «Біздің Әбе», «Қаңтар 2022», «Мораль», «СИЗО» сынды соңғы жазып шығарған кітаптарының әрқайсысының шығу тарихынан-ақ журналистік этиканы сақтай отырып, әрбір оқиғаны анық та айқын сурет­теп, жазғанын аңғардық. Бір ғана мысал, «Қаңтар 2022» шығармасын жазу үшін Бигелді Ғабдуллин еліміздің он алты облысын аралап шығып, 118 адамнан сұхбат алыпты. Оның ішінде, оқиға кезінде зардап шеккендердің де, полиция өкілдерінің де пікірлері бар, яғни ақпарат­ты беруде бір жақты кетпей, екі тараптың да пікірін берген екен. Мінекей, осы бір ғана детальдан-ақ, кезінде «Қазақ­станның үздік бас редакторы» аталымының жеңімпазы болған Бигелді ағаның биік болмысы білініп тұрғандай…

P.S: Журналист Бигелді Қайырдосұлының бүгінгі ағынан жарылған сұхбаты телефон шұқыламай беріле тыңдап отырғандарына қарағанда, студент­терге біраз ой салғандай болды. Өмірлік тәжірибеден сабақ алу артық болмас.

Дәурен Мақсұтханұлы