Қазақстан Жазушылар одағы мен Еуразиялық Топ (ERG) бірлесіп, бірнеше жылдан бері Республикамыздың өндіріс орындарында еңбек етіп жүрген жұмысшы қауымның арасында «Шеберлер Елі» атты дәстүрлі әлеуметтік-шығармашылық жобасын табысты өткізіп келеді.

Ұйымдастырушы тараптар биыл атал­­ған жобаны жандандырып, «Шебер­лер Елі-16» атауымен Еуразиялық Топ­тың (ERG) жаңа әнұраны мен еңбек ада­мының мәртебесін паш ететін көп­сериялы фильм сценарийіне арнайы бай­қау жариялады. Жуырда Еуразиялық Топтың қоғаммен байланыс және пиар бө­лімінің мамандары мен қазылар алқа­сы арнайы бас қосып, байқау барысын талқылап, жұмыс  жоспарын пысықтады. Жиынды, жобаны үйлестірушілердің бірі, Қазақстан Жазушылар одағы Орыс әдебиеті кеңесінің жетекшісі, ақын Любовь Шашкова жүргізіп отырды. Еркін пікір алмасу түрінде өткен басқосудан кейін қазылар алқасы мүшелерінің бай­қауға қатысушыларға арналған вебинар-кеңесі бейнетаспаға жазылып алынды. Байқау шарттары түсіндірілген бейнежазба барлық өндіріс орындарына тара­ты­лып, байқауға қатысушыларға арнайы көрсетілетін болады.

Компанияның жаңа әнұраны бай­қауының орыс  тіліндегі  нұсқасы бойынша қа­зылар алқасы: ақын, жазушы, әде­­­­биет­танушы, қазылар алқасының тө­­­р­а­йы­­мы Татьяна Фроловская; ақын, әде­­­­биетші Римма Артемьева. Қазақ ті­лін­­де­гі поэзия  бойынша Қазақстан Жа­зу­­­шы­лар одағы басқармасы  төра­ғасы­ның орынбасары, «Қаламгер-меdiа» ор­талы­ғы­ның директоры, ақын Жанарбек Әшім­жан; ақын, аудармашы Алмат Исә­діл.

Компанияның тыныс-тіршілігі мен еңбек адамын насихаттайтын жаңа көп­се­рия­лы фильмнің қазақ-орыс тіл­дерін­дегі сценарийіне жарияланған байқау­дың қазылар алқасы: жазушы-драматург, сценарист, ҚР еңбек сіңірген қайраткері, қазылар алқасының төрағасы Шахимарден Құсайынов; сценарист, режиссер Владимир Тюлькин; жазушы, публицист Василий Шупейкин.

Қазіргі кезге дейін компания ән-ұра­ны кәсіби шеберлігі жоғары ақын­дар­­дың жаз­ған мәтінімен орындалып жүр. Де­ген­мен, бүгінгі заман – жаңа талап-мін­деттер жүктеп отырғандықтан, байқауды ұйымдастырушылар – «компания әнұра­ны тың мазмұнда, жаңа си­патта жа­зылуы тиіс» деп ұйғарып отыр. Еңбек адамының мәртебесін арт­тыруға ба­ғыт­талған болашақ фильм сценарийінің нұс­қасы да шынайы ең­бекке араласып, өн­дірісте адал тер төгіп жүр­ген шығар­машыл жандардың қаты­суымен түзіл­мек. Сондықтан бұл бай­қау­­ға бұған дейін «Шеберлер Елі» ак­ция­­сына белсене қатысып, жүлделі орын алып жүрген, тек қана компанияға қарасты өндіріс ошақ­тарында жұмыс істейтін шығар­ма­шыл адамдар қатыса алады. Компания басшылығы өз ән­ұраны мәтіні мен жаңа фильмнің сце­нарийін жазуға өзінің шы­ғар­машы­лық потенциалын тартуды ұйғаруы – ұтым­ды шешім деп қабылда­ғаны­мыз жөн.

Үстіміздегі жылдың 15 қарашасында қо­рытындылануға тиіс  биылғы «Шеберлер Елі-16» акциясының мақсаты – еңбекқор адамдардың арасынан сөзі шешен, ойы жүйрік, әдебиет пен өнерге жа­қын дарынды жандарды анықтап, олар­ға әлеуметтік жағынан да, рухани тұрғыдан да қолдау көрсету. «Өлеңге әркімнің-ақ  бар таласы» демекші, қатар­дағы жұмысшылардың ішінде де талант­ты жандар баршылық. Бұған біз жыл сайынғы «Шеберлер Елі» акциясын өт­кізу кезінде талай мәрте көз жеткіз­генбіз. Өйткені, өндірістің қиындығы мен қы­зығын, зауыттар мен кен орын­дарын­дағы еңбектің өте ауыр екенін сол жерде тер төгіп жүрген жандардан артық еш­кім білмейді.

Жаңа мазмұндағы компания әнұра­ны мен еңбек адамы туралы түсірілетін фильм сценарийіне жарияланған бай­қау­дың талап-шарттарына қысқаша тоқ­талып өтсек.

• Тәуелсіз еліміздің индустриалды қуа­тын арттыруға атсалысудың маңыз­ды­лығын;
• Компанияның корпоративтік мақ­сат-мүдделерін;
• Еуразиялық Топтың (ERG) мүм­кін­діктері мен жетістіктерін;
• Еңбек Адамының беделі мен қаді­рін;
• Бір отбасы ретінде бір шаңырақ ас­тында, бір өндірісте қызмет етіп жүр­ген көпұлтты жұмысшылар қауымының ынтымақ-бірлігін;
• Металлург, кенші, энергетик сынды өндіріс орындарындағы мамандық ие­лерінің еңбекқорлығын дәріптеп, ұрпаққа үлгі ету.

Алып зауыттар мен шахталарда ауыр жұмыс атқарып жүрген қарапайым ең­бек  адамдарының арасындағы әдебиетке жа­қын, қалам ұстаған талантты жандар­дың шығармашылық ізденістерін талғам та­ра­зы­сына салған «Шеберлер Елі» атты игі шара бірқатар ірі өндіріс аймақтарын­да жоғары деңгейде табысты өтіп ке­ле­ді.

Жоба басталған төрт жылдан бері бай­қауға 700-ден астам адам қатысып, жиырмадан астам қаламгер Еуразиялық Топқа енген еліміздің бірқатар өндіріс орындарында болып қайтты. Жоба аясында байқауға қатысушылардың таң­даулы шығармалары мен өндіріс ошақ­та­рында болған қаламгерлердің оч­ерк­­тері мен еңбек адамдарымен сұх­бат­тары енген «Шеберлер Елі» және «Ше­берлер Елі: Бір шаңырақ астында» ат­ты қос кітап жарық көрді. Биылғы бай­қау да өзінің нәтижелі  жемісін беріп, егемен еліміздің еңсесін көтеретін еңбек адамының  абырой, мәртебесін  асқақ­тата тү­седі деп сенеміз.

Балжан  БЕЙСЕНБЕК.