«ЕҢ ЖАҚСЫ ЕРКЕК» – ТАЛДЫҚОРҒАНДА
Жазушы-драматург, Қазақстанның еңбек сіңірген қайраткері Сұлтанәлі Балғабаев Талдықорған қаласындағы Бикен Римова атындағы Алматы облыстық драма театрымен ұзақ жылдардан бері шығармашылық байланыс жасап келеді.
Осының нәтижесінде театрда бұған дейін қаламгердің «Қыз жиырмаға толғанда», «Ең әдемі келіншек», «Біз де ғашық болғанбыз», «Ғашықсыз ғасыр» атты пьесалары сахналанған еді. Ал жақында театрда «Ең жақсы еркек» атты комедиясы көрермен назарына ұсынылды. Жаңа қойылымды сахнаға дайындаған режиссер – Қазақстанның еңбек сіңірген қайраткері Болат Ұзақов, қоюшы суретші – ҚР «Серпер» сыйлығының лауреаты Қарлығаш Шалабаева.
Спектакльде басты рөлдерді Қазақстанның халық артисі Алмахан Кенжебекова, Қазақстанның еңбек сіңірген қайраткері Әлихан Ыдрышева, ҚР мәдениет қайраткерлері Ғалия Темірбаева мен Мәкен Нұрмұхаметова сынды сахна шеберлері орындайды.
Сондай-ақ, қойылымда Т.Жүргенов атындағы Қазақ Ұлттық Өнер академиясын соңғы жылдары бітірген бір топ жас сахнагерлер де өз шеберліктерін жан-жақты көрсете білді.
Бүгінгі күнде отбасынан басталып, қоғамдық өмірімізге кең тарай бастаған кейбір келеңсіз жағдайларды тұспалды ой, астарлы әзілмен жеткізетін бұл спектакльді көрермен қауым жылы қабылдады.