Ғабит Мүсірепов атындағы қазақ мемлекеттік академиялық Балалар мен жасөспірімдер театрының ұйымдастыруымен  балалар спектакльдерінің «Алтын сақа» атты фестивалі өтті.

Жастар театры жетпіс жылдық мерейтойына орай, жеті шараны  қолға алған еді. Соның бірі – балалар спектакльдерінің фес­тивалі болатын. Фестиваль аясында жеті бірдей спектакль көрермен назарына ұсы­ныл­ды. Олардың арасында «Алтын сақа», «Нау­рыз-думан», «Алтын мүйізді киік», «Мау­гли», «Томпақ» секілді балаларға ар­­­­­налған қойылымдар бар. Балалар қойы­­­лымдарына, драматургияға жаңа сер­­­пін беруді көздеген фестивальдің ашылу салтанатында баспасөз өкіл­дері­мен кездескен театр ұжымы балаларға ар­­налған театр қойылымдарының мән-маңызына тоқталып өтті.

«Бұл – ел театры тарихында балаларға арналған тұңғыш фестиваль. Ішкі фестиваль болғандықтан, көрермен назарына біздің театрда қойылып жүрген спектакльдер көрсетіледі. Фестивальді ұйым­дас­тырудағы басты мақсат – актерлардың ше­берлігін шыңдау және ертегілерге не­гіз­делген театр қойылымдары арқылы жас көрермендерді ұлттық рухта патриот­тық тәрбие беруге күш салу. Балалар дра­матургиясына қалам тартқысы келіп жүр­ген жастарға ықпал ету. Жоспар бойын­­ша фестивальді республикалық дең­гейде ұйымдастыру көзделген еді. Бірақ қаржы дағдарысына байланысты ол жүзеге аспады. Бірақ біз «ақша жоқ» деп қарап отырмай, ішкі қаржымыздан жүл­делер тағайындадық. Жалпы, жүлде қоры – 700 мың теңгені құрады. Әр ата­лым­ға 50-100 мың теңге көлемінде ақ­шалай сыйақылар қарастырылды. Бо­ла­шақта фестивальдің ауқымы да, жүлде қоры да бұдан да көлемді болар деген үміттеміз», – деді өз сөзінде Ғ.Мүсірепов атындағы қазақ мемле­кеттік академиялық Балалар мен жасөспірімдер театрының директоры Сәбит Әбдіхалықов. Театрдың көркемдік жетекшісі Мұрат Ахманов бұл фестиваль­дің бір жағынан жастарға сер­пін беретінін айтса, екінші жағынан театр артистеріне де қолдау болатынын жет­кізді.

Расында да театр ұсынған «Алтын сақа» фестивалі – бұрын-соңды театр та­рихында болмаған дүние. Театрдың іш­кі фестивалі болғандықтан, жүлде де театр артистері арасында сарапқа салынды. Мәселен, «Көрермендер көзайымы» номинациясын «Маугли» спектакліндегі Табаки рөлі үшін Ербол Ыдырысов алса, «Эпизодтық рөлдегі актерлік шеберлігі үшін» «Алдар көседегі» рөлімен Мөлдір Қонысқызы иемденді. «Ең үздік дебют» Динара Нұрболатқа тиесілі болды. Әмина Өмірзақова атындағы «Ең үздік әйел бей­несі» Нұргүл Мыңғатоваға, Қасым Жә­кі­баев атындағы «Ең үздік қосалқы рөлдегі ер адам бейнесі» Жомарт Зейнәбілге, Ақ­қағаз Мәмбетова атындағы «Ең үздік әйел бей­несі» Динара Абдуллинаға, Байділда Қал­таев атындағы «Ең үздік ер адам бей­несі» Мерей Әджібековке бұйырды. Театр мерекесіне орай ұйымдастырылған бұл фестивальдің көрермен үшін қажет дүние екенін мойындауымыз керек.

Театрдың Әдебиет бөлімінің мең­геру­шісі Бақыт Беделхан балалар қойы­лымын қою және балаларға арнап спектакль жазу­дың қиындығы мен кедергілеріне арнайы тоқталып өтті: «Біздің драматург­теріміз шығарманы баланың деңгейін түсінбей, өзінше жазуға бейіл. Яғни ақылды басымызбен аспанға қарап әңгіме айтқымыз келеді. Екінші жағынан, несін жасырамыз, балаларға арналған дүние жазу қиын­ның қиыны. Халқы­мыздың ауыз әде­биетін, ертегі-аңыздарын қараңыз, қа­зақ балаларының қойылым­дарына сұранып тұрған шығарма көп. Өзін ақын, жазушы, драматург санайтын әріптес­тері­мізге сол ертегі-әңгімелердің желі­сін­де, балалар туралы спектакль, пьеса жазып беріңізші десең, «Мен сонда балаларға арнап шығарма жазуым керек пе?», – деп тәкаппарсиды. Драматургтерге қомақты сый­лықтар беріліп жатса, жастарды өзі­міз­дің де тәрбиелеуімізге мүмкіндігіміз бар. Мәселен, біздің балалар мен жасөс­пірім­дер театры Бекзат деген інімізді осы ұжым­да арнайы даярлық­тан өткізіп, қа­зір Қыздар университетінде тәжірибе ретінде қойылым қойғалы жүр. Осылайша, балаларға, жастарға арналған дү­ниенің ауқымы мен мән-маңызын жас драматургтерге сіңі­ре алсақ, оның өзі үлкен жетістік дер едім», – деген ойымен бөлісті.

Балалар мен жастар театры, Қазақстан Рес­публикасы тәуелсіздігінің 25 жылдығы мен Желтоқсан оқиғасының 30 жыл­ды­ғына арнап жаңа қойылымдар даярлап жат­қанын да тілге тиек етті.

Қ.СЕРІКҚЫЗЫ.