Халықтың әл-ауқатын арт­тыруға бағыт­талған тұрақты экономикалық өсу жобалары аясында ауылшаруашылығында атқарылып жатқан жұмыс нәтижесін ауылдың бүгінгі келбеті мен тұрғындардың тұрмыс-тіршілігінен көруге болады.

Биыл Жамбыл облысында ауыл тұрғындарының өмір сүру сапасы мен әл-ауқатын жақсартуға бағыт­талған жобаларға бюджет­тен 17,3 миллиард теңге бөлінген. Қазына қаржысы ауылдарда әлеумет­тік және инженерлік инфрақұрылымдарды дамыту, ауыл халқының әлеумет­тік игіліктер мен мемлекет­тік қызмет­терге қолжетімдігін қамтамасыз ету және көпшілік үшін жайлы орта қалыптастыру міндет­терін шешуді көздейді. Осы мақсат­та «Ауыл – ел бесігі» бағдарламасы бойынша екі жүзге тарта жоба қолға алынбақ. Оның ішінде 2 білім беру, 2 денсаулық сақтау, 10 мәдениет және 8 спорт нысанының құрылысы жүргізіледі. Алты білім беру ошағы күрделі жөндеуден өткізіледі, сондай-ақ электрмен жабдықтау, жылумен қамтамасыз ету жобаларын іске асыру көзделген. Жалпы ұзындығы 198 шақырым болатын ауыл көшелерін орташа жөндеуден өткізу жоспарланып қойған. Өткен жылы 15,8 миллиард теңге бөлінген «Ауыл – ел бесігі» жобасы аясында 103 ауылдық елді мекенде үш жүзден аса инженерлік-инфрақұрылымдық жоба іске асырылған. Нәтижесінде 8 дене шынықтыру және сауықтыру кешені, 2 дәрігерлік амбулатория мен 6 мәдениет үйінің құрылысы аяқталып, елді мекендердің әлеумет­тік-мәдени жағдайы уақыт талабына жақындай түсті. Сонымен қатар бір спорт, бір денсаулық сақтау және бір білім беру нысанының қазандығы қайта жаңғыртудан өт­ті. Екі білім беру, 1 денсаулық сақтау, 3 мәдениет орны нысандары күрделі жөндеуден өткізіліп, ұзындығы 298 шақырымды құраған ауыл көшелеріне орташа жөндеу жұмыстары жүргізілді.
Ауыл халқын жұмыспен қамту шаруашылық салаларының дамуына, кәсіпкерліктің кең қанат жаюына байланысты болмақ. Осы мақсат­та қолға алынған «Ауыл аманаты» жобасының аясында биыл облыста 1700-ге тарта жұмыс орнын құру жоспарланған. Бұл жобаны іске асыруға бөлінген 10,5 миллиард теңге қаржыға 1 200 өтінімді несиелендіру арқылы мүмкін болмақ. Жоба талаптарына сәйкес бөлінген қаражат­тың 50 пайызы мал сатып алуға, қалған жартысы ауыл шаруашылығы кооперативтерінің қажет­тігі мен азамат­тардың жеке кәсіп ашуына жұмсалатын болады. Атап айтқанда, мал шаруашылығы саласында 5,2 млрд теңгеге 911 өтінім несиелендіріледі. Өсімдік шаруашылығындағы жобалар үшін 5,3 млрд теңгеге 289 өтінім, жеке кәсіпті жолға қою мақсатында 1031,0 млрд теңгеге 116 өтінімді қаржыландыру жоспарланған.
Былтыр облыста аталған жобаға бөлінген 24 миллиард теңге қаржы толығымен игерілді. Ауыл шаруашылығының түрлі саласында жұмыс істеп, кәсібін дамытуды көздеген азамат­тардан түскен 4 073 өтінім мақұлданып, несие қаражаты берілген, төрт мыңнан астам жұмыс орны ашылып, ауыл халқының төлем қабілетін көтеруге ықпал еткен.

Рымтай КӨКЕНАЙҚЫЗЫ