Шығыс өңірінің мамыражай, әсем табиғаты қашан да жаныңды шуаққа бөлейді. Тал, қайыңдары көкке өрлей өскен тауларынан асқақтық дарытып, сыңғырлай аққан бұлақтарынан сыр аулайсың. Көл жағасындағы көк желектері мен орман, тоғайларында сайраған құстар үнінен көкірегіңе күй ұялатасың. Осы өлкеде туып-өскендердің жайсаң жанды болатындары табиғат-ана әлдиінің өзгеге ұқсамас ерекшеліктерінен-ау деп ой түйесің.

Аталмыш өңірдің ауасын жұтып, суын кешкен, титтейінен биік армандарға құл­шы­ныс танытқан Ерболат Әлпиевтың қол созған межелерін уақытылы игеруі туған жер табиғаты берген нәрінен болса керек… Ол ата-ана тәрбиесі мен мектеп қабыр­ға­сын­­да жүргенде-ақ ал­ғыр­лығы мен бүр­ше­гел­­ді­гін таныта білді. Ұстаздары да Ерболат Сай­фоллаұлынан көп үміт күтті. Оқуға де­ген, сол оқығанын жан сарайында тоқуға деген ынта-ықы­ла­сы басқаша шәкірт сенім үдесінен шы­ғуға ұмтылды. Орта мектепті өз қа­­тарластарының алды болып тәмам­да­ған ол 1987 жылы Алматыдағы Қазақ ме­м­ле­кеттік ауылшаруашылығы институтына түсіп, оны «инженер-электрик» ма­­­ман­дығы бойынша ойдағыдай бітірді. Ал­­ғашқы еңбек жолын өзі туған Шығыс­ Қа­зақ­тан облысы, Зайсан ауданындағы элек­тр жүйесінде жай инженерліктен бас­тап, диспетчер, Оңтүстік аймағының дис­пет­чер­лік қызмет бастығы, Зайсан АЭЖ бас инженері, одан сол АЭЖ бас­тығы болды. Араға жыл салып Оңтүстік айма­ғының ди­ректорлығына тағайын­далды. Таңдаған өмір­лік мамандығы бойынша талай белестерден өткен ол енді «ШҚ АЭК» АҚ Пайдалану департа­мен­тінің директорылығына ауыстырылады. Келесі жылы  сол жағалау ай­ма­ғы­ның директорлығына бекітіледі. Ұйым­дастыру қабілеті жоғары әрі облыс бойынша халықты жарықпен қам­та­масыз етудегі тәжірибесі мол маман 2013 жылы Шығыс Қазақстан Аймақтық Энергетика­лық компаниясының Ай­мақ­тар бойынша басқарушы директор қызметіне жоғарыла­тылды.

Ерболат ЭЖ қай буынында еңбек ет­се де өзін шынайы шеберлік тұрғысынан та­ны­та білді. Әрі сол ортаға сапалы жұ­мыс істеу­дің үлгісін үйретті. Мәселен, электр жүйесі бойынша ТМД елдері арасында 2007 жылы Белоруссияда өт­кен командалар ара­сындағы кәсіби ше­бер­лік жарысында «ШҚ АЭК» АҚ коман­да­сының үшінші орынды иеленіп, қола медальмен марапат­та­луы сол үйрету үл­гі­сінің жемісті нәтижесі еді.

Әріптестері іскерлігі мен ізденгіштігін сүй­сіне әңгіме ететін Әлпиев «ШҚ  АЭЖ»-нің қай аудан,  қай аймағында қыз­мет ат­қар­са да сол желідегі жөндеу, жаб­дықтау са­пасы 20-25 пайызға дейін жақсарып, АЭЖ-дегі тосыннан болатын апат қауіпі 18-28 пайызға дейін құл­ды­рай­ды. Ол өз кәсібінің шебері екенін осылай, көз алдыда атқарған іс-әрекет­те­рімен дәлелдейді. Зай­сан ауданы элек­тр желісін басқара жү­ріп жаңа полигон салдыруы да Ерболаттың салалық ны­сан­­дарға жауапкершілікпен қарайтыны­ның бір көрінісі. Аймақтың бар­лық АЭЖ-де жабдықтар, техкластар ұйы­м­­дас­тыру да оның бүкіл ұжымды кәсі­би ше­берлікке баулуға ұйытқы болудағы бір тә­сілі. Жарма, Шар аудандарында жүр­ге­нінде 40 жыл бойы жүзеге асырылмаған су құбырын тарттыруы көршілес аудан жұрт­шы­лығына аңыз боп тарады.

Осы Әлпиевтің бастамасымен 2009 жы­лы үш АЭЖ желілік бөлімше базаларында техникалық қызметкерлерді оқы­та­тын арнайы жабдықталған техникалық мектеп­тер ашылған. Онда желілік қыз­мет маман­да­ры­ның біліктілігін жетілдіру мәселесі кеңі­нен әрі тиянақты жүргізі­леді. Оқыту сапасы да жоғары деңгейде ұйымдастырыл­ды. Ұзақ жыл тәжірибеден өткен кәсіби шеберлер дәріс оқиды. Соның нәтижесінде жас мамандар дис­петчерліктен бас ин­же­нер­лік, кәсіпорын бастығы қызметіне дейін  көтерілуде.

Ал Ерболаттың өзі дайындаған команда Астана, Талдықорған, Петропавл, Қара­ған­ды қалаларында өткен кәсіби шеберлік байқауларында жүлдері орындарды жеңіп алса, Е.Сайфоллаұлы жа­рыс­тың төрешісі, бас төрешісі міндет­терін атқарды.

– Осынау, бұрынғы жылдары қалала­ры­мыз бен аудан, ауылдарымызда  элек­тр жарығын үнемдеу үшін бірер сағат жарық­ты өшіріп қоятын жағдайлар бол­ған. Ал қазіргі өмір талабы бүтіндей бас­қаша. Технологиялар заманында қас-қағым сәттік үзіліс­тің өзі көптеген жұ­мыстарды ақсата­ды. Монтер, дис­петчер­леріміз кезек-кезе­гі­мен сөткелей жұмыс істейді. Өйткені, халы­қ ал­дын­дағы жауапкершілікті мүлтік­сіз атқару, ел сені­мін ақтау – парызымыз, – дейді Ерболат.

Өз кәсібіне деген мұқияттылықты жа­нына серік етіп, қызметкерлеріне жоғары та­лап қоя білетін Е.Әлпиевтің еңбегі ес­керу­сіз емес. Ол әр жылдары ау­дан, қала, облыс әкімдерінің, республика Президен­тінің Алғыс хаттарымен, мақтау қағаздары­мен марапатталса, 2012 жылы оған «ТМД құрметті энергетигі», 2015 жылы «Қазақстан Республикасына еңбегі сіңген энергетик» атақтары берілді. Облыс халқын электр  жары­­ғы­мен қамтамасыз етудегі ұзақ жыл­ғы табысты еңбектері үшін Аймақтар бойын­ша атқарушы директор «Құрмет» орде­нін кеудесіне тақты.

Міне, бұл халықпен етене байланыста атқарған қызметінің қашан да өз жемісін беретінінің бір үлісі.
Ендеше Ерболат, бұл күндері халқы­мыз­­ға жоқ атаулының бәрі мұң, Шығыс ай­­маққа қалтқысыз да үзіліссіз бер электр­дің жарығын, – дейміз.

Еркiн КІРШІБАЙ.
Шығыс Қазақстан облысы.