«Карикатура королімен» кездесу
Ықыласпен жасалған адал еңбек қана адамды шыңдап, шыңға шығаратыны ақиқат. Бойыңда жүз жерден талантың буырқанып тасып жатса да, еңбек етіп маңдайың терлемесе табысқа қол жеткізуің мүмкін емес. Суретшілік өнер де – сондай жанкешті еңбектің нәтижесі. Сондықтан жастайынан бейнелеу өнеріне құштар болып, қаламгерлер ортасында шыңдалып, достық әзіл – шарж сала жүріп бүгінде «Карикатура королі» атанған белгілі карикатурашы, ҚР Мәдениет қайраткері Еркін Нұразханмен Алматы қаласы орталықтандырылған кітапханалар жүйесінің №32 бөлімше-кітапханасында әсерлі кездесу өтті.
Кездесуге сондай-ақ шығармашыл тұлғаның достары: жазушы-журналист, филология ғылымдарының докторы, Халықаралық «Алаш» әдеби сыйлығының лауреаты Нұрдәулет Ақыш, тарихшы-этнолог, Ш.Уәлиханов атындағы тарих және этнология институтының жетекші ғылыми қызметкері, тарих ғылымдарының докторы Ахмет Тоқтабай, танымал театр режиссері, Халық әртісі Ерсайын Төлеубай, ақын, мемлекеттік «Серпер» жастар сыйлығының иегері Ержан Жұмабек қатысты.
1953 жылы 17 қаңтарда Шығыс Қазақстан облысы, Тарбағатай ауданы, Жаңғызтал ауылында туған Еркін Ибрагимұлы орта мектепті үздік бітірген соң Н.В. Гоголь атындағы Алматы көркемсурет училищесін, одан кейін Т.Жүргенов атындағы Алматы мемлекеттік театр және көркемсурет институтының көркемсурет факультетін сахнаның суретші-технологы мамандығы бойынша тәмамдайды.
Өзінің айтуынша, жас суретшінің талантын алғаш таныған екі Әлімбаев екен: бірі – «Балдырған» журналының бас редакторы Мұзафар Әлімбаев болса, екіншісі – жанында жүрген курстас досы Мұхамеджан Әлімбаев. Қазақ балаларының рухани атасы болған Мұз-аға 3-курста оқитын Еркінді редакцияға қызметке алып, атақты сатира суретшілері мен Ұлы Отан соғысында фашистерді әжуалап суреттер салған ресейлік «Кукрыниксы» карикатурашылар ұйымының еңбектерімен таныстырып, білім-тәжірибесін шыңдаса, қағілез досы Мұхамеджан «Қазақ әдебиеті» газетінің редакциясына ертіп апарып, жолбарыстай адуынды Шерхан ағасының алдынан бір-ақ шығарған. Бастары табақтай, қарындары қабақтай, өте бір қызық тұрпатта салынған замандас тұлғалар бейнелерін танып, күлкіге қарық болған Шер-аға Еркіннің шарждарын бірден газеттің соңғы бетіне жариялап жібереді. Сол 1982 жылдан бастап «Қазақ әдебиеті» газетінің соңғы бетінде әзіл мен эпиграммалардың шырайын ашатын суретші еңбегіне арналған арнайы рубрика ашылады. Оқырмандардың газет атаулыны соңғы беттен бастап ашатын әдеті сол мезеттен басталған-ау деп топшылаймын өз басым.
Ал батыр партизан жазушы Қасым Қайсеновпен танысуға барғанда, атын естіген ағамыз: «Қазақ әдебиетіне» шығып жатқан сен бе? Міне, сенің альбомыңды жасап қойдым», – деп, газетке шыққан суреттерін қиып, оқушы дәптеріне толтырып жапсырып қойған альбомын ұсыныпты. «Сақтап қой, керек болады. Кітап шығарып, көрме өткізесің», – деп алғаш айтқан сол Қасым аға болатын. Әйтпесе, сурет салына бастағанда осы жанрдың етегінен түпкілікті ұстаймын деп ойлаған жоқпын», – деп еске алды суретші. Кейін «Түркістан» газетінің логотипіне байқау жарияланып, оны тайқазан бейнесінде араб әріптерімен жазған суретшіні сын сардары Қалтай Мұхамеджанов қызметке шақырып, көп бағыт-бағдар беріп, карикатура жанрымен жүйелі түрде айналысуына ықпал еткен.
Қазақстанның Халық жазушысы Мұзафар Әлімбай оның шығармашылығына деген айрықша лебізін «Карикатура королі» деп ризашылықпен білдіруі бояуы қанық, болмысы анық талант иесін жазбай танығаны болса керек. Осылайша, Еркін Нұразханның жанқияр еңбегі турасындағы ағалар лебізі келешек өрісіне жол ашып, қазақ бейнелеу өнеріндегі кенже қалған карикатура жанрын өмірлік мақсат-мұратына айналдырды.
«Карикатура – кейіпкерді күлкі ету емес, оның жүрек түкпіріне үңілу, қоғамдағы орны мен маңызын айшықтау», – дейді Еркін Ибрагимұлы. — Әу баста «Ұнамай қала ма екен?» деген ой болды. Бірақ жазушы Шерхан Мұртаза: «Сенің жұмысың – шарж салу, қалғанына өзім жауап берем» дейтін. Содан кейін де көп уайымдамайтын едім», – деген суретші қызық жайттарды еске түсірді.
Алғашқы салғандары Ғабиден Мұстафин, Оралхан Бөкей, Асқар Сүлейменов екен. Асқар Сүлейменов өзі бейнеленген шарж-портретті қолына алғанда мінезі қияңқы, көп нәрсені жарата бермейтін айна-қатесіз болмысын көріп таңғала: «Мені айнытпай салыпты. Ну что же? Ұқсап тұрғаннан кейін амал не? Бір қарағанда мыстан кемпір сияқты екенмін. Еркін біздің қасиетімізді де, қасиетсіздігімізді де көрсетіп тұр ғой», – деп мейірлене жымиып алыпты.
Сырбай Мәуленов мұны көрсе құшақтап: «Менің суретімді салу үшін туғансың» дейді екен. Ал жазушы Кәдірбек Сегізбаев: «Әй, бауырым, сен ағаңды не істеп қойғансың? Мұржадан шыққан мысықтай қылыпсың ғой. Бұл достық әзіл емес, қастық әзіл ғой», – деп ренжігенін жасырмапты.
Қалтай Мұхамеджанов алғаш танысқанда: «Әлгі шарж салатын сен екенсің ғой. Ойпырм-ой, бір күні «Қазақ әдебиетін» ашып қалсам, үлкен мұрын тұр екен. Бұл кімнің мұрны екен?» деп қарасам, өзімдікі екен», – деп күлген.
Әбу Сәрсенбаев шашы бұйрабас боп тұрғанын көріп: «Еркін мені меринос қой жасапты», – деп күліпті.
Батыр Бауыржан Момышұлы болса: «Бір алқаштың суретін салыпты ғой», – деп мырс етіпті.
Әубәкір Нілібаев деген ақын жерлесі кездескен сайын: «Менің шаржымды қашан саласың?» деп қолқалайды екен. Сол ағасы Үндістанның Джавахарлал Неру атындағы сыйлығына ие болған күні үстіне үндінің киімін кигізіп, бұтын шидей қылып, көзін бақырайтып салады. Түрі тура шегірткенің айғырындай болып шығады. Телефон соғып, «Аға, «Қазақ әдебиетіне» шаржыңыз шықты» десе, «Қай санына шықты? Қазір киоскіге барамын» деп қуанып қалған Әубәкір аға сол кеткеннен мол кетіпті.
«Шарждың жағымды және жағымсыз түрі бар. Жағымдыны жақсы көріп саласың. Мен достарымды, әріптестерімді жылы әзілге орап салсам, саяси тұлғаларды сынап салыппын. Қалай болғанын қайдам, бұл да бір Алла дарытқан қалам құдіреті болар, сол сынап салған сатиралық шарж кейіпкерлерім көп ұзамай халық қазынасын ұрлап-жырғаған жемқор, жағымсыз бейнелер екенін өздерінің ісімен-ақ дәлелдеді, – деді Еркін Нұразхан шығармашылығының сырына үңіліп.
Бұдан соң кездесуге келген қонақтар суретші жайлы жылы лебіздерін білдірсе, мәртебелі қонақтарға кітапхана қызметкерлері ҚР Мәдениет қайраткері, «Құрмет» орденінің иегері Айша Баймаханбетова, Әлия Утеулина, Айжамал Жолдасқызы шексіз алғыстарын жеткізді. Ал кеш иесі жуырда шыққан «Қаһарман Қасым» кітабын кітапхана қорына қолтаңбасын жазып сыйға тартты.
«Бір сурет жүз сөзді алмастырады», – деп бір ойшыл айтқандай, журналистермен бірге қоян-қолтық араласа жүріп, өзінің дара жолын айқындаған суретші еңбегі ұшан-теңіз. Еңбек еленіп, бағалана білсе, ұрпаққа үлгі болатыны анық.
Гүлжанат ШОНАБАЙ