Халқымыз өзі қастерлеген тұлғаны көп сөз, әсіре теңеулермен әспет­темей-ақ, бір ғана сөзбен биікке көтерген. Жауқазындай жайқалып, жастық белесіне, өмір қуанышына енді іліне берген шағында, қиянат­тың құрбаны болып, арбаға таңылған тағдырына мойымай, отбасын құрып, екі перзент сүйіп, оларды жетілдіріп қана қоймай, жанашырлыққа зәру мыңдаған адамға аялы алақанын тосып, мейірімін төккен, қиын сәт­те араша бола білген Бибігүл Иманғазинаны халқы қадірлеп, Бибі Ана атап кет­ті.
Бибігүл Иманғазина – талай жанға жігер берген, үміт сәулесін сыйлаған қоғам қайраткері, «Бибі Ана» қайырымдылық қорының басшысы ретінде ғана емес, жазушы ретінде де жақсы таныс. Оның «Тауқымет» романы – қазақ әдебиетіндегі, оқырманы көп шығармалардың бірі.
Өткен жылдың желтоқсан айында Бибігүл Иманғазина 80 жасқа толды. Соған орай, биылғы жаздың жайдары шағында ұл-қызымен бірге Ақтөбеге арнайы келіп, жерлестерінің ортасында болып, өзінің мерейтойына арналған шараларға қатысты.
16 маусым, жұма күні Ақтөбеде Өнер орталығында жазушы, халықаралық «Алаш» әдеби сыйлығының иегері Бибігүл Иманғазинаның шығармашылығына арналған «Биік тұлға — Бибі Ана» ат­ты кеш өт­ті.
Жиналғандарға алдымен «Бибі Ана» деректі фильмі, одан соң «Тауқымет» романының желісімен әзірленген «Асқақ арман» қойылымы (сахналық нұсқаның авторы – Орал Бәйсеңгір, режиссері – Мейрам Хабибуллин, рөлдерде – Т.Ахтанов атындағы облыстық драма театрының артистері) ұсынылды. Фильмде Бибі Ананың қамқорлығын көрген Тайбек Өтегенов, Бағила Бекішова, тағы басқа бірқатар азамат­тардың тағдыры баяндалады.
Алғашқы құт­тықтау сөз облыс әкімі Ералы Тоғжановқа берілді.
– Бүгін біздің ортамызға қазақтың батыр қызы, дана қызы келіп отыр. Өмірден қандай қиындық көрсе де еш мойымай, ешкімнің мүсіркегенін қаламай, өз тағдырын өз қолына алып, керісінше, өзі мыңдаған жанға демеу бола білу, меніңше, бұл – тектілік деген қасиет­тің көрінісі. Бибігүл Иманғазина өзінің «Тауқымет» романында оқырманына өмірді қалай жақсы көру керектігін, өмір үшін қалай күресу керектігін жеткізеді. Өзіне, өз күшіне сену арқылы барлық қиындықты жеңуге болатынын үйретеді. Сіздің өмір жолыңыз – ерлікке толы жол, сондықтан жерлестеріңіздің атынан сізге шын жүректен рақмет айтамын, – деді, Ералы Лұқпанұлы.
Ата-анасының ерке қызы болып өскен Бибігүл қолына ерте қалам алған. Ол алғашқы шығармасын 11 жасында жазған екен.
– «Әңгіме жаздым» деп қуанып, әкеме көрсет­тім. Әрине, 11 жастағы баланың «әңгімесі» ғой. Алайда, әкем қат­ты қуа­нып, «менің қызым жазушы болады» деп сүйіншілеп, бір малын сойып, ағайынға той жасап берді. «Мен актриса боламын, жазушы болмаймын», – деп, әкемді босқа үміт­тендірмейін деген оймен, содан кейін қолыма қалам алмай кет­тім. Бірақ тағдыр кейін осы жазушылық жолға әкелді. Қазір «әкем әулие екен» деп те ойлаймын. Ең бастысы, «Тауқымет» романым тағдыры қиын көп адамға жігер берді, солардың басын біріктірді, солардың пайдасына асты. Арбада отырған бір әйел маған: «Апай, сіздің романыңыз мені бір қыс бойы «бағып шықты», – деді. Сырқат­ты адам түгіл, сау адамның өзі не істерін білмей қалған қиын кез ғой. «Кітап қалай «бағып шығады?» – деп таңғалдым. Сөйтсем, одан кітапты алып оқыған әр адам қайтарып бергенде, қолында барымен бөлісіп отырған екен, – деп еске алды жазушы.
Ал әдебиетіміздің классигі Әбдіжәміл Нұрпейісов «Тауқымет» романы жөнінде: «Романда күрделі тағдыр қарапайым тілмен баяндалады. Қарапайым, түсінікті тілде болғандықтан, оқырман жүрегін тез баурап алады» деп пікір айтыпты. Бибігүл Иманғазина сонау 90-жылдардың басында жарық көрген романды толықтырып, 2011 жылы қайта жарыққа шығарған болатын. Кеште әлі де романның жалғасын жазып жатқанын айт­ты.
Шарада Қазақстан Жазушылар одағының төрағасы Мереке Құлкенов, ҚР Парламенті Сенатының депутаты Нұртөре Жүсіп, белгілі ақын Ғалым Жайлыбаев, Қазақстанның еңбек сіңірген қайраткері, әнші Марат Әйтімов, т.б. құт­тықтау сөз сөйледі.
– Ақтөбе жері – халқымыздың даңқты батырлары мен ақындарының отаны. Мұнда Әбілқайыр ханның, ел қорғаған ұлы батырлардың сүйегі жатыр, осы топырақтан Тахауи Ахтанов, Қуандық Шаңғытбаев, Сағи Жиенбаев сынды қаламгерлер шықты. Бибі Ана да – сол даңқты тұлғалардың жалғасы, – деді Мереке Құлкенов.
Ал белгілі ақын, Қазақстан Жазушылар одағы облыстық филиалының басшысы Ертай Ашықбаев кеш иесіне арнаған жырын оқыды.
Ал сенбі күні Бибігүл Иманғазина облыстың әр қиырынан келген мүмкіндігі шектеулі азамат­тармен, сондай-ақ аудандық әкімдіктердің әлеумет­тік салаға жауапты қызметкерлерімен кездесті.
Кездесуге Бибігүл Иманғазинаның көмегін көрген, оның қолдауымен баласын жоғары оқу орнында оқытқан, басқалай жетістікке жеткен жандар да келіп, қаумаласып, рақметін айтысып жат­ты.
Бибігүл Қабиқызы да оларға деген өзінің лебізін жеткізе келіп:
– Мен қаржы мәселесіне байланысты оқуға түсе алмай немесе оқуын жалғастыра алмай қиналған жастарға бірінші кезекте көмектесу керек деп ойлаймын. Өйткені жастар – біздің болашағымыз. Біздің қор 580 жастың диплом алып шығуына ұйытқы болыпты. Әрине, демеушілердің көмегі тиді, жоғары оқу орнының ректорларымен, басшылармен сөйлестік, тіпті өзімнің қымбат бұйымдарымды кепілге қойсам да, оқимын деген балаға қалайда қолдау көрсетуге тырысқан сәт­терім болды. Біз баланың болашағын, ұрпақ алдындағы жауапкершілікті бірінші орынға қоюымыз керек, қолымызда не бар соны, ең алдымен баланың тәр­бие­сіне, білім алуына, ертеңгі күні мықты азамат болып өсуіне жұмсауымыз керек. Бұл – менің басты ұстанымым, – деді.
Ауылдардағы түрлі жазылмайтын сырқатқа ұшырап туған балалар көбіне тиісті ем ала алмайды. Өйткені жақын жерде арнайы орталық, мамандар жоқ. Ал үлкен қалаларға, шетелге апаруға ата-аналардың шамасы жете бермейді.
– Маған баласын емдетуге апарғысы келетінін айтып, көмек сұраған хат­тар жиі келеді. Неге ата-аналар көмекті алыстан іздеуі керек? Аудандардан неге оңалту орталықтары ашылмайды? Мен осы мәселені көтеріп жүрмін. Қазіргі күні Шалқар ауданының орталығынан жер телімі бөлініп, бұл істі де қолға алдық, – деді Бибігүл Қабиқызы.
Жиында мүмкіндігі шектеулі азамат­тардың, ерекше бала бағып отырған ата-аналардың басындағы басқа да мәселелер талқыланды.

Индира ЖАЙМАҒАМБЕТОВА