Қазақстан Жазушылар одағында орыс әдебиетін дамыту мәселелері талқыланды. Онда орыс әдебиетін дамытудың өзекті мәселелері, отандық авторлардың танымалдылығын арт­тыру жөніндегі мәселелер қаралды.

Жиынға Жазушылар одағы бас­шылары, әдебиет­танушылар, ақын-жазушы, аудармашы, журналистер қатысты, сөз сөйледі.
Орыс әдебиеті кеңесінің мүшелері жастар арасында әдебиет­ті дәріптеу, отандық авторлардың шығармаларын шетелде насихат­тау, оқырмандардың көркем әдебиет пен деректі прозаны оқуға деген қызығушылығын оятып, қатарын көбейту қажет­тігін алға тарт­ты. Сондай-ақ «Простор» журналын дамыту, университет­тік және қоғамдық кітапханалармен келісім жасай отырып, кітапхана қорларын кәсіби басылым болып табылатын журналдың кезекті даналарымен толықтыру мәселелері көтерілді.
Одақ басшысы Мереке Құлкенов шығармашылық кештер өткізу және халықаралық ұйымдармен, сондай-ақ, білім беру саласындағы ұйымдармен тығыз ынтымақтастық қарым-қатынас орнату туралы ұсыныстарды қолдады.
«Авторларымыз оқырмандарымен кездесер болса, Қазақстан Жазушылар одағының есігі әрдайым ашық. Сондай-ақ, біз мектептер және жоғары оқу орындарымен тұрақты түрде жұмыс жасап, отандық әдебиет­те болып жатқан ірілі-ұсақты жаңалықтарды ортаға салып, классиктердің өлмес туындыларын жиі талқылауымыз қажет», – деді М.Құлкенов.
Кеңесте Қазақстан Жазушылар одағының мүшелігіне қазір АҚШ-та тұратын ақын, прозашы Бақыт Кенжеевті қабылдау туралы бірауыздан шешім қабылданды. Алматыда әріптестерімен және оның шығармашылығының жанкүйерлерімен кездесу ұйымдастыру жоспарланды.
Жиналыс соңында одақ төрағасы Мереке Құлкенов «Простор» журна­лы­­ның бұрынғы бас редакторы Қайрат Бақбергеновті 70 жылдық мерейтойымен құт­тықтап, дәстүр бойынша иығына шапан жапты.