Жазушы, халықаралық «Алаш» әдеби сыйлығының иегері Сәуле Досжан жуырда туған ауылы Ақтамға барып, ауылдастарымен және мектеп ұжымымен кез­десіп қайт­ты. Кез­десуге генерал-полковник Сәт Тоқпақбаев, ақын, Қазақ­стан Жазушылар одағы төрағасының орынбасары Бауыржан Жақып, ауданның құрмет­ті азаматы, осы ауданды ұзақ жылдар басқарған Зәріп Бидайбеков қатарлы елге танымал қонақтар қатысты.

Қонақтарды аудан әкімі Шухрат Нурахунов, аудандық мәслихат­тың төрағасы Нұрәкім Есжанов, білім бөлімінің басшысы Мөлдір Құрманалиева қатарлы атқамінерлер күтіп алды.
Қаламгер Сәуле Досжанова үнемі өз ауылының әлеумет­тік жағдайының оңалуына көмектесіп келеді. Ауылда жаңа мектептің, медпункт­тің салынуына мұрындық болғанын ауыл тұрғындары үнемі айтып жүреді. Алдағы уақыт­та ауылға Мәдениет үйін салдыруды жоспарлап, тиісті мекемелерге хат жазып жүргеніне де біраз уақыт болды. Жазушының өзі салдырған білім ошағында «Мектеп түлегі Сәуле Досжанға арналған мұражай» жұмыс істеп тұр. Мұражай қоры жыл сайын жаңаланып, толықтырылып отырады.
«Ауылға бармасам, көңілім құлазиды. Бәлкім, анам кіндігімді үйдің босағасына көмген шығар… Қолым босай қалса, туған ауылыма, осы Ақтамға қарай құстай ұшамын.
Кезінде қабырғалары қақырап, әбден тозығы жеткен өзім оқыған мектепті көргенде жүрегім ауырды. Облыс әкімдігі мен ҚР Білім және ғылым министрлігінің есігін тоздырып жүріп жаңа мектептің салынуына мұрындық болдым. Мектептің дарынды оқушыларына арнайы шәкіртақы тағайындағанмын. Биыл да соны тапсыруға келдік», – деді жазушы кез­десу барысында.
Биыл жылдағы дәстүр бойынша 11 оқушыға шәкіртақы табысталды. Ауыл халқымен кез­десуде қонақтар тағлымды әңгіме айтып, Сәуле Досжанның шығармашылығы жайында ой қозғады.