«Құтты білік және Мемлекет» атты ғылыми жиыннан туған ойлар
Қырғыз елінің астанасы Бішкек шаһарында ағымдағы жылдың 18-19 қыркүйек күндері Жүсіп Баласағұнның 1000 жылдығына арналған «Құтты білік және мемлекет» атты халықаралық ғылыми-тәжірибелік конференция болып өтті. Конференция Ж.Баласағұн атындағы Қырғыз Ұлттық университетінде «Мурас» қорының ұйымдастыруымен өтті. Қазақстан, Ресей, Түркия, Қытай және басқа елдерден шақырылған, сондай-ақ, басым түрде қырғыз зерттеуші-ғалымдарының белсенді қатынасуымен өткен ғылыми жиынның пленарлық отырысында сегіз, ал секциялық отырыстарында алпыс жеті баяндама тыңдалды.
Қазіргі заманда, Аллаға шүкір, түрлі дәреже-деңгейдегі ғылыми жиындарға тапшылық жоқ. Ал мына аталған жиынның аты да, заты да бөлек еді. Ол өзін түрік тілді өркениетке жатқызатын елдердің тарихы мен мәдениетінде ерекше орны бар, әлемде ұлы ойшыл ретінде мойындалған Жүсіп Хас Қажыб Баласағұнның шығармашылық мұрасына, оның бүгінгі біздің рухани сұранысымызға байланысты атқаратын қызметіне арналды.
Конференция барысында пікір алысу «Жүсіп Баласағұнның «Құтты білік» атты шығармасы бүгінгі біздің қоғамдар үшін несімен құнды?», «шығарма жаңғыру жолында тұрған білім және мәдениетіміздің өмірінде қандай міндеттер атқармақ?» сияқты іргелі сауалдардың төңірегінде өрбіді.
Сонымен, Ж.Баласағұн мұрасының бүгінгі түркілер өркениеті үшін құндылығы жөнінде. Бұл ретте баяндамашылардың пікірі мынадай тұжырымға сайды.
Ортағасырлық түркілер мәдениетінің әлемдік деңгейде танылуы Қарахандар мемлекетінің (840-1212) өмір сүрген мезгіліне тұс келеді. Қарахандар мемлекеті Орталық Азия түркілерінің интеллектуалдық өрлеу мүмкіндігіне жаңа серпіліс берді: билік ресми түрде ислам дінін қабылдады, білім мен ғылымға қолдау жасады, оқу орындарын ашты, сол арқылы қоғамда жаңа рухани құндылықтардың тамыр жаюына пәрменді ықпал жасады, т.с.с. Мемлекеттің руханиятқа көрсеткен бұл қолдауы өз нәтижесін берді. Өмірге Жүсіп Баласағұнның «Құтты білік» (ХІ ғ.), Махмұт Қашқаридың «Түрік сөздігі» (ХІ ғ.) сияқты түркілер өркениетін жалпыадамзаттық кеңістікке алып шыққан классикалық туындылары келді. Түркі халықтары мәдениетінің жаңа сапа және кеңістікке шығуының жинақы көрінісі түрік әдеби тілінің қалыптасуы болды.
Ортаазиялық Әл-Фараби, Ибн-Сина, Ибн Рушд сияқты ой алыптарының қатарында еңбек еткен Ж.Баласағұн мен М.Қашқаридың түркі тілі мен мәдениетін өрістету дәстүрін Қожа Ахмет Иассауи (ХІ ғ.), Әлішер Науаи (ХV ғ.), Мұхаммед Қайдар Дулати (ХVІ ғ.) және басқа ірі шығармашылық иелері жалғастырды. Соның нәтижесінде түркі халықтары әлемдік өркениетте өз орнын анықтады. Басқаша айтқанда, Ж.Баласағұн міне осындай жалпы-өркениеттік маңызға ие іргелі жұмыстың басында тұрған тұлғалардың бірі болды.
Ортаазиялық кеңістікте білім мен ғылымда араб және парсы тілдері үстемдік алып тұрған заманда түркі халықтарының талантты өкілдері бай түркі тілін қасиет тұту, сондай-ақ, оны білім мен ғылым тілі дәрежесіне жеткізу жолына түсті.
Ж.Баласағұн өз кітабының жазылған тіліне байланысты «кітаптар көп арабша да, тәжікше, біздің тілде бұл жалғыз-ақ әзірше» (үзінділер А.Егеубайдың аудармасы бойынша берілді), – дейді. Ал кітап болса Бура хан билігі тұсында «хан тілінде жазылып һәм таралғанын айтып, Қарахандар мемлекеті кезінде түрік тілінің мемлекеттік дәреже алғандығына нұсқайды. Ал оқырманына «кітапты қабыл алып қарарсың, түркі тілі ғажабына қанарсың», – деп, оны ана тілінен ортақ ләззат алуға шақырады.
Яғни Ж.Баласағұн мен М.Қашқари сияқты алыптар қалыптастырған дәстүр бізді алдымен өз еліңде, ана тіліңде бар рухани құндылықтар мен даналықты танып, көре білуге, сондай-ақ, оларды бойға сіңіруге иландырады. Мәдениет туған еліңнің ғасырлар бойы жүріп өткен жолын білуден және осы жолда қалыптасып, сыннан өткен құндылықтарды күнделікті өмірде тұтынудан басталатындығын еске салады.
Ұлы ойшылдарымыздың бізге жеткен бұл аманатын есте ұстаудың маңызы зор. Өйткені, біз қазақ және қырғыз халықтары дербес мемлекеттігімізге күрделі кезеңде қол жеткізіп отырмыз. Ұлттық мемлекеттер батыста да, шығыста да дағдарыстық жағдайларды бастарынан кешіруде. Олардың әлемдегі алып империялық құрылымдармен және мемлекеттермен бәсекеге түсуге қауқары жете бермейді. Соған байланысты әлгінде ғана алған тәуелсіздігін толық күйінде игеру оларға қиынға соғуда.
Яғни біздің қоғамымыздың осындай қайшылықты жағдайға кезігіп отырғандығын іштей болса да түйсінгендігіміз артық болмайды. Мұндай жеңіл емес жағдайдан абыроймен шығудың жолдарын мемлекет басшылары және басқару органдары білетін болу керек. Ал, біз, ұлт зиялылары әрбір халықтың, әрбір мемлекеттің өздерінің бірегейлігін (идентичность) берік сақтау арқылы ғана өмір сүре алатындығын терең ұғына отырып, оны нығайта түсу және жаңа заманауи сұраныстарға бейімдеу бағытында жұмыс істеуге міндеттіміз.
Елбасы Н.Ә.Назарбаевтың бастауымен және пәрменді қолдауымен бүкілмемлекеттік деңгейде аталып отырған Қазақ хандығының 550 жылдығы осы ойға жетелейді.
Идентичность – әлемдік ғылымда қабылданған және қолданыстағы термин. Ұлт пен оның мемлекеттігінің, ұлт пен қоғамның тұтастығын, бірыңғайлығын білдіреді. Мәселен, қазақ елін оның шексіз де шетсіз Ұлы даласынсыз, өзінің ата кәсібіне, салт-дәстүріне, құндылықтарына, мемлекеттігіне, ұзақ тарихында бірлесіп өмір сүріп келе жатқан басқа да отандас ұлт өкілдеріне деген құрметінсіз елестету мүмкін бе? Әрине, мүмкін емес. Сол сияқты, қырғыз елін оның Алатауы мен әсем Ыстық-көлінсіз, телегей теңіздей «Манасынсыз», дәстүрлі ән-күйінсіз көз алдына келтіру қиын.
Яғни әрбір халықты ұлт дәрежесінде ұйытып тұрған тылсым күш бар. Сол күш қазақты қазақ, қырғызды қырғыз дәрежесіне көтеріп тұр. Осы күшті терең сезінген Мағжан ақын:
Жүрген ескі заңымен,
Алдындағы малымен,
Бірге жусап, бірге өрген,
Алаш деген елім бар.
Неге екенін білмеймін,
Сол елімді сүйемін, –
дейді. Әңгіме тақырыбы болып отырған Ж.Баласағұн шығармасында айтылған ойлар, жасалған тұжырымдар ол өмір сүрген түркі жұртының өмірінен бастау алады. Әрине, үйрену, басқа елдік әдебиеттен хабардар болу бұл табиғи нәрсе және барлық халыққа тән құбылыс. «Құтты білік» төлтума шығарма, жайдақ еліктеуден мұндай ұлы еңбек тумақ емес. «Құтты білікте» халықтың сол бір құнарлы кезеңге дейін жинақталған рухани құндылықтары өз орнын тауып, таңғаларлық үйлесімді баяндалған. Осы ретте оны басқа ғылыми трактат та, көркем туынды да ауыстыра алмас еді.
Конференция барысында оған қатысушылар тарапынан мүдделілік тудырған келесі мәселе ұлы шығарманың бүгінгі сұраныстарға байланысты өзектілігі еді.
Біз бүгін ХІ ғасырда жазылған Баласағұндық Жүсіптің шығармасын оқи отырып, төл мәдениетіміздің бұдан он ғасыр бұрынғы болмысымен бетпе-бет келгендей, онымен жаңа сапада танысқандай күйге енеміз. Әрине, ХІ ғасырдағы қоғам бұл басқа әлем, өзгеше өмір. Дегенмен, ол орта жөнінде қарабайыр тұжырымдар жасауға ешқандай да негіз жоқ. Әрине, біздердің мүмкіндіктеріміз әр түрлі дәрежеде екендігі рас, дегенмен, ол қоғамдағы адамдар да биік адамгершілікке, этикалық және эстетикалық үлгілерге ұмтылыс жолында тұрғандығына «Құтты білік» арқылы көзіміз жете түседі.
Сондай-ақ, Ж.Баласағұн шығармасында белгіленген құндылықтар жалпы адамзаттық құндылықтарға қайшы келмейді, қайта жалпыәлемдік құндылықтармен үндес, олармен бір арнада. Ол жөнінде Ж.Баласағұн 30 бәйітінде «жақын күллі адамзаттың діліне!» – дейді. Яғни ХІ ғасырдағы түркі халықтары өздерінің территориялық кеңістігін, мемлекеттік құрылымын анықтаумен бірге басқа өркениет, мәдениеттерден өздерін оқшау ұстаған жоқ, қайта қоғамдық дамуда олармен өзара тиімді байланыс орната білген.
Міне осы тұрғыдан алғанда «Құтты білік» біздің мәдениеттерімізге өзінің табиғи арнасына оралуға, сол арқылы жаңа сатыларға көтерілуге қызмет жасайды. Тек өзінің табиғи және тарихи арнасында даму алған мәдениет қана түрлі сындардан сүрінбей өте алады. Ж.Баласағұн шығармасын бүгінгі өзгерістер жағдайында оқи отырып жасауға болатын келесі тұжырым осы болса керек.
Ж.Баласағұн шығармасының өзектілігі туралы айтқанда мынадай бір жағдайға көңіл аударған жөн. Біздің халық және мәдениет ретінде түп тамырымыздың терең және берік екендігін айғақтайтын «Құтты білік» сияқты асылдарымыз бізге жат құндылықтар ретінде ұлттық рухани өндірісте айналымнан шығып қалған. Ауыр, ауыр да болса бұл шындықты мойындағанымыз жөн. Ал оның орнын ойлау жүйемізді бөтен арнаға салуды көздейтін бұлақтар басты. Бізге тура қазіргі уақытта өзіміздің көне замандардан отарлық кезеңге дейін бірде әлсіреп, бірде қайта жаңғырып, бірақ үзіліссіз жалғасып келе жатқан түркілік өзегімізді танып-білуге және оған жаңа да тың серпін беруге бастайтын ойлау мәдениеті қажет. Бұл арада біз жоқтан бар жасау емес, барды өз орны мен дәрежесінде көрсетіп, бағалауға жол ашатын жаңа ойлау жүйесі мен стилін қалыптастыру жөнінде айтып отырмыз.
Патшалық, оның орнын басқан Советтік биліктердің қырғыз және қазақ елдерін басқару ісіндегі басты қателігі олардың күшпен таңған басқару түрі жергілікті халықтың түпкілікті мүддесіне сәйкес келмеді, ал оларды өзара үйлестіру әрекеті қарсылыққа тап болды, тіптен ұлттық басқарушы топқа қарсы бағытталған репрессиялық шараларға ұласып отырды. Ұлттық негізді, ерекшеліктерді ескермеу, тіптен оған тәкаппарлықпен жоғарыдан менсінбей қарау, халықты ешқашан да орындалмайтын қияли бағдарламалармен алдарқату бұл біздің тарихымыздың советтік кезеңіне тән ұстаным болатын.
Енді, міне, біз тәуелсіз мемлекет жағдайында өмір сүрудеміз. Тәуелсіздігімізге сәйкес мемлекет басқару ұстанымы қандай негіздерге сүйенуге тиіс? Бұл қатардағы нәрсе емес. Бұл мәселеге өз елінің азаттығына ғұмырын арнаған талай қайраткер тұлғалар жауап іздеген. Солардың бірі, Куба елінің перзенті Хосе Марти. Ол өзінің «Біздің Америка» атты еңбегінде «Тәуелсіздік мәселесі басқару түрінің алмасуымен шектелмейді, сонымен бірге, басқару рухының да өзгеруі маңызды» деген тұжырымға келеді.
Ал басқару рухы неден басталады? Әрине, сол елдің, сол жұрттың төл тарихына, ана тілінен, шындығынан бастау алады. Үкімет сол елдің перзенті, ал басқару рухы оның халқының рухынан туындаған жөн. Сондықтан да жас буын, болашақта елді басқаратын оқушы және студент жастар өз елінің тарихы мен шындығын түсініп және оларды бойына сіңіре алатындай тәрбие алуға тиіс. Мемлекет құру және дамытуда, әрине, әлемдік тәжірибе ескерілгені жақсы, бірақ ол шешуші фактор бола алмайды, шешуші фактор өз еліңнің әлеуметтік құрылымын және оның түйткіл мәселелерін анықтаудан және оларды шешу жолдарын қарастырудан құралады.
Сонымен, қырғыз зиялылары Жүсіп Баласағұндай арғы тегін еске алып, ұлы ойшылдың мұрасына тәу етті. Жиынға қатынасқан ғалымдар терең ойлы әрі пайдалы баяндамалар жасады. Мұны көріп біз сүйіндік. Өніп-өсу жолына түскен елге тән үлгі көрсетті. Елдің орталық мұражайында тұрған Ж.Баласағұнның Тургунбай Садықовтың салған портреті алғашында түсініксіздеу көрінгенімен, көз үйренген соң кемел мүсіншінің ойын қабыл алып, халыққа соншалықты жақын келгенінен риза болдық. Біздегі Н.С.Гаевтың ұсынған портретінде тоқшылық басымдық алғандай әсерде болдық.
Конференция барысында манасшылардың ең жас буын өкілдері (арасында шығыс түркістандық манасшы Жүсіп Мамайдың ұлы да бар) бірінен соң бірі ұлы Манас жырынан үзінділер оқыды. Дәстүр жалғастығын танытты. «Манас» және манасшылар буыны үзілмей тұрғанда қырғыз елінің мәңгі тірі болатындығын байқатты.
Қазіргі уақытта елімізде Елбасы Н.Ә.Назарбаевтың басшылығымен жүріп жатқан қазақ тарихын заман сұранысына лайық дәрежеде қорытудың көздеген мақсаты ұлттың жүріп өткен жолындағы тарихи тәжірибе мен өнегелі істерді елеп-екшеп қоғамның қажетіне жарату болса керек. Ал ұлттың бүгінгі дүниетанымы мен талғамына сүйеніш бола алатын оның төл тарихындағы өнегелі істер, иншалла, жетіп-артылады. Міне, сондай елдің тарихи танымы мен талғамын қалыптастырып, көңіліндегі күдікті сейілтіп, сенім беретін факторлар тарихымыздың қазақ хандығы кезеңіндегі ұлттық тәжірибемізден молынан табылады. Мәселе осы тарихи құндылықтарымызды жаңа буын ұрпақтың санасына тура жеткізе білуде болса керек.
Қысқа мақаламыздың соңында «Құтты біліктің» өзекті ойы «Қайткенде адам қалады адам болып!» екендігін, осы терең мағыналы ойды біздің заманымызда өз туындылары арқылы айтып өткен ұлы ойшылдардың бірі Шыңғыс Айтматов болғандығын, жазушыға «Ата бейітте» қойылған белгі таста да осы сөздің ойылып жазылғандығын білдіре отырып, адам болмысына ықпалды осындай ойлардың қадыр-барқы төмендемесе екен деп тіледік.
Осы арада бір сауал көңілден кетпейді. Ж.Баласағұн және басқа да ұлы ойшылдарымыз біздің халықтарды өркениетке, яғни болашаққа алып баратын жолға шақырды. Ұзаққа созылатын тоқырау және қанды күрестен соң біз саналы тәуелсіз мемлекеттік кезеңге аяқ тіредік. Осы жолды шынайы баянды да, нәтижелі жолға айналдыра аламыз ба, міне, негізгі сауал осы болса керек.
Қырғыз ағайындардың астанасында өткен ғылыми жиынға қатынасқан біз осындай көңіл-күйде оралдық. Ғылыми жиынды ұйымдастыру ісінде үлкен жұмыс атқарған «Мурас» қоры мен оның жетекшісі, профессор Тыныштықбек Чоротегіге зор ризашылығымызды білдіруді өзімізге парыз санадық.
Мәмбет Қойгелдиев,
профессор.