Түркістан тарихы жайлы қызықты 5 дерек
Төрт қақпалы Түркістан шаһары – Орта Азия бойынша ең көне қалалардың бірі. Өзінің сан ғасырлық тарихында Түркістан түрлі мемлекеттер құрамында болды. Қала іргесі бірнеше рет сөгіліп, бірнеше рет қайта түледі. Назарларыңызға қасиетті мекен хақында қызықты бес деректі ұсынамыз.
Түркістанға 1500 жыл
Қала ежелде Ясы деп аталып, оның төңірегі VII-XII ғасырларда Шауғар өңірі ретінде тарихта қалған. Шауғар саяси-экономикалық орталық болды. Кейбір деректер бойынша, Ясы ежелгі Шауғардың жанындағы қала болған, ал келесі бір пікір бойынша, ол Шауғардың қала-серігі ретінде көрсетіледі.
ХІІ ғасырда мұсылмандар үшін қасиетті мекенге айналды
ХІІ ғасырда сопылық ілімнің белсенді ұстанушысы Қожа Ахмет Яссауи осы қалада жерленді. Яссауи өмірден өткен соң қабірінің басына үлкен мазар тұрғызылады. Мазар мыңдаған мұсылмандардың зиярат ететін орнына айналды. Кесенені тұрғызуға ұйытқы болған Әмір Темір болатын.
Түркістан Қазақ хандығының астанасы болды
XVІ ғасырдың соңында Сырдарияның бойындағы қала Сығанақ өзінің бұрынғы маңызын жоғалта бастады. Ал Түркістан Ахмет Яссауидің әсем де зәулім кесенесінің арқасында Орта Азияның рухани орталығы саналды. 1598-1628 жылдары Есім хан Ясыны Түркістан деп атап, оны Қазақ хандығының орталығы етті. Қазақ хандары XVІІІ ғасырдың соңына дейін билік құрды.
1694 жылдың шілдесінде Түркістанға Ресейден елшілер келді
Қаланы басқарып тұрған Тәуке хан елшілердің іс-әрекетін ұнатпады. Өйткені қабылдау рәсімі кезінде елшілер ханның бас киімін шешуін талап етеді. Ресейде патшаның бұйрығын тек қана бас киімді шешіп отырып тыңдау тәртібі бар-тын. Алайда Тәуке «қазақтар тіпті намаз оқығанда да басындағысын шешпейді», – деп, елшілерге «тәртіпті болуды» үйреткен.
Түркістанда хандар, батырлар мен билер жерленген
Тарихи-мәдени «Әзірет султан» қорық-мұражайының территориясында 164 атақты тұлғалар жерленген. Олар – әртүрлі заманда өмір сүрген күллі қазақ халқының игі-жақсылары. Кесенеде қаз дауысты Қазыбек би, Абылай хан, Есім хан, Хақназар хан, Тәуке хан, Шығай хан, Жәңгір хан, Қанжығалы Бөгенбай, тобықты Мамай, қоңырат Сырғақ жатыр.
Өмірбек Сансызбай