ӘДЕБИЕТТЕГІ БЕЙБІТШІЛІК РУХЫ
Токиодан шығатын Жапония мен Еуразия елдерінің ынтымақтастығына бағытталған басылымның №1498 саны жарық көрді. Газеттің үшінші беті толығымен қазақ және жапон халықтарының достығына арналған.
«Көшпенділер мен жапон халқының мәдени байланысын тереңдететін арқау» деп аталатын мақалада журналист Мари Асана биылғы жылдың тамыз айындағы Алматыға сапары аясында қазақ өнерін тамашалағанын жазады. «Қазақстанда көптеген ұлттардың өзара ынтымақ пен бірлікте өмір сүріп жатқаны өнерінен де байқалады», – дейді ол. Журналист Қазақстанды көрген Жапония азаматтары арасында шабыттанып, танка жырын жазғандары бар екенін мақаласында атап көрсеткен. Жапон флейтасы –шякухачи арқылы Жапония ғана емес, шетелдерге де танымал өнерпаз Дайоши Кидзан Жапония мен ұлы дала елін байланыстыратын музыка әлемі жайында мақала жазыпты. 2018 жылдың тамыз айында Алматыға келген сазгер жиырма бір жыл бұрынғы сапарын еске алады. «Алдыңғы сапарымда қазақтың ұлттық аспабы – домбыра шертетін музыкантпен кездесу сәті бұйырып, бірге өнер көрсеткен едім» – деген жапон өнерпазы бұл жолы домбыраны көре алмағанына өкініш білдіреді. Осы беттегі «Әлем – ортақ үйіміз» деген тақырыптағы көлемді мақаланың авторы Шарафат Жылқыбаева жапон және қазақ халықтарының танымындағы бейбітшілік, достық ұғымдарын әдеби-философиялық тұрғыда пайымдаған. Жапонның Шйотоку Тайши заманынан жеткен бірлікке үндейтін мақал-мәтелдерін тілге тиек ете отырып, бүгінгі Жапония Заңынан үзінділер келтірген. «Әр адам құрметтелуі тиіс» деген ойды бейнелейтін Жапонияның Ата Заң тарауларымен қатар ұлтына, дініне, тіліне байланыссыз адам баласы бір-бірін сыйлауы керек деген ежелгі қазақ даналығынан тұжырымдар ұсынады. «Бабаларымыз айтқан өсиет сөз – ұрпақтан-ұрпаққа берілген философиялық ой» – деп жазады автор. Мақалада қазақ даласында ешқашан түрме болмағаны, қазақ халқы бірінші болып ешкімге соғыс ашпағаны туралы айтылған. «Қазақ елі ешқашан басқа елдерге жаугершілік ниетте болмаған, талай қиын-қыстау заманды бастан өткерсе де, бейбітшілік стратегиясын ұстанып келеді» – елінген мақалада. Автор, сондай-ақ, ХХ ғасырдың басында күштеп қоныс аударылған көптеген ұлт өкілдеріне қазақ елі пана болғанын сипаттай келе, халқымыздың төзімділігінің арқасында бүгінде Қазақстан Республикасы Орта Азиядағы ең бейбіт ел ретінде белгілі дейді. Журналист мақаласында тарихтан мысал келтіре отырып, соғыстың қай түрі болса да, адамзатқа қасірет әкеледі деген ой айтады. Жапонтілді қазақ журналисі мақаласын болашақ ұрпақ үшін ойлы өлеңдер қалдырған дана бабамыз, заманында қоғам қайраткері болған Шәкәрім Құдайбердіұлының ой-толғамдарымен түйіндепті.