***

Өмірдегі Чехов өзінің шығармаларындай шырайлы еді. Ол аса кеңпейіл, адал өнегелі, инабатты, сезімтал, жұмсақ мінезді және әдепті, әділетті, ерекше шынайы, қарапайым, сергек, барынша ақиқатшыл, нәзікжанды жайсаң адам болды.

И.Бунин

---

Одан көз жазып, қатты өкініп қала бердік. Әрбір сөзі, қарағаны, жымиғаны, қимылы, жүріс-тұрысы ғажап әсем жаратылысты ақсүйек жан екенін танытатын еді.

А.Куприн

---

Антон ЧЕХОВ:

***

*Егер әйелің саған опасыздық жасаса, онысына қуан, ол Отанға опасыздық жасаған жоқ қой?!
*Университет барлық қырыңды, оның ішінде надандығыңды да жетілдіреді.
*Кейбір жасөспірімге сыртынан қарасаң, сүйкімді, ал ішіне үңілсең, – тозаң.
*Біреуді ұнатар-ұнатпасыңды біле алмасаң, көзіңді тарс жұм да, оны қасыңда да, басқа жерде де жоқ деп ойла. Сонда ол жоқ болады, – рахат!
*Ластан лас болмауды талап етуге болмайды.
*Саусағыңа тікен қадала қалса: «Көзіме қадалмағанын айтсаңшы!» деп қуан.
*Ақымақтар мен әулекілер ғана бәрінбілгіш болады.
*Аурудың ауруды жеңілдететіні болады. Тісі қақсап отырған мысықтың құйрығын басып қалсаң, тісін ұмытып кетеді.
*Ел-жұртсыз, ұшы-қиырсыз тақыр далада талығып жалғыз отырғаннан жоқтан өзгені бұтып-шатып сөйлей беретін сөзжадының жанында отырып сарылған ауыр.
*Бос уақытым көп болсын десең, қыбыр етпей отыр.
*Адам ақылды, ыждағатты болған сайын өмірі мәнді бола түседі.
*Бойыңдағы құлдық сезімің­нен тамшылап болса да шығарып құтыл.
*Малғұн болғысы келгенге бөгет жасама.
*«Циник» – грек сөзі. Орыс тіліне аударғанда: өзінің шошқа екенін басқалар біліп жүрсін дейтін шошқа.
*Егер адам атаулы бір жерге жиналып, адал болуды ұйғарса, ақырзаман жетті дей бер.
*Ресейде талантты адамның таза болуы сирек.
*«Өзіңді өзің тани біл» дегендердің қалай тани білуді үйретпейтіндері өкінішті.
*Парижге әйеліңмен барғаның – Тулаға самауырыңды ала барғаның.
*Әрқашан жақсы сөз айтып, ақыл үйретіп жүретіндердің біразы – надан.
*Түптің түбінде шындық жеңеді деседі, әй, сол сөздің түбі жоқ шығар!
*Өмірдің қадір-қасиетін білмейтіндерге шенеунік болғаннан басқа жол жоқ.
*Ақылдымси беретін ақымақтармен сөйлесіп жарымайсың.
*Жазушы болу оңай. Өзің сияқтыны тауып алып, ұсақ-түйекті бұтып-шатып жаза бер.
*Шығармашылықтың нәрін тата білгенге одан тәтті ештеңе болмақ емес.
*Сұлу сөйлеуді көксеме, түсінікті сөйлеуді ойла.
*Сүйе білу және сүйікті бола білу – нағыз бақыт.
*Қысқа да нұсқа жазу – дарындылық.
*Таза еңбексіз өмір татымды болмайды.
*Өнер, дарын иесіне кәрілік те, жалғыздық та, ауру да жоламайды, ажал аяғын аңдап басады.
*Ресейде философия жоқ, бірақ қылаяғы қиқоңызға дейін философ сияқтанып әуре.
*Кейбір жігіттер сыртынан қарасаң, – сұлтан да, ішіне үңілсең, – жәдігөй.
*«Темекі тартатын қыздың ернін сүю күлсалғышты сүйгенмен бірдей» деп жүретіндердің «күлсалғышты сүйіп» тынатыны қызық!

Орыс тілінен
тәржімалап ұсынған
Ғаббас ҚАБЫШҰЛЫ