АТ ҚҰЛАҒЫНДА ОЙНАЙТЫН КӨКПАРШЫЛАР СЫНҒА ТҮСТІ
Қазанның шуақты күнінде әл-Фараби атындағы Қазақ Ұлттық университетінде «Рухани жаңғыру» бағдарламасы аясында «Жастар Көкпар Лигасы» мен ҚазҰУ-дың ұйымдастыруымен «JKL PROFI 3×3» форматындағы ұлттық көкпар ойыны өтті.
Аламан бәйгені тамашалауға ҚазҰУ ректоры Ғ.Мұтанұлы, Түркі дүниесі журналистері федерациясының президенті Мендерес Демир мырза, түрік делегациясы және «Жастар Көкпар Лига» кеңесінің президенті Данияр Дәукей мен ұлттық спорт жанашырлары жиналды. Биылғы доданың артықшылығы сол – бұл жолы тек студенттерден құралған командалар емес, сонымен қатар, кәсіби көкпар командалары да қатысты. Жарыстың салтанатты ашылуында сөз сөйлеген Ғалымқайыр Мұтанұлы: «Ертеде ата-бабаларымыз жауынгер де, астындағы тұлпар да бабында болуы үшін көкпар ойынын өткізіп тұрған. Көкпар – біздің рухани құндылығымыз. Ендеше, осынау асыл мұрамызды сіз бен біз боп жаңғыртуға атсалысайық», – дей келе, ұлттық спортымызды қолдауға келген көпшілік қауымға алғысын білдірді. Тартысты өткен ойын нәтижесі бойынша «Алмалы» көкпар құрама командасы жеңіске жетті.