Ынтымақтастық жөніндегі келісім-шартқа қол қою рәсімі тамыздың 15-і күні Қазақстан Жазушылар одағында (ҚЖО) жалғасын тапты. Бұл күні ЖО-на Түркия Мәдениет министрлігіне қарасты әдеби ұйымның жетекшісі Мехмет Нұри Бармақсыз (Parmaksiz) мырза келді. ҚЖО Басқарамасының төрағасы Ұлықбек Есдәулетпен емен-жарқын әңгімелесе жөнелген Мехмет Нұри ҚР Президенті Назарбаевтың «Болашаққа бағдар: рухани жаңғыру» атты бағдарламалық мақаласы тұтас түркі әлеміне серпіліс әкелгенін айтып тебіренді. Ол әңгіме үстінде: «Рухани жаңғыруға» қосқан үлесіміз болсын, біз Қазақстанға 20 мың кітап сыйға тартамыз», – деді. Мехмет бауыр сөзін одан әрі жалғап, қазақ ақындарын Анадолы жұртына шақыра келгенін, алдағы уақытта қазақтың 100 шайырын түрік тіліне аударуға дайын екендерін айтты. Аз-кем кіріспе сөзден кейін тараптар Ынтымақтастық жөніндегі келісім-шартқа қол қойды.

Мәдениет, өнер, ғылым және әдебиет са­ласындағы Түрік Әдеби және Ғылыми ең­­бектері Авторлар Қоғамы мен Қазақстан Жазу­шылар одағы арасындағы бірлескен жұ­мыстарды қамтитын ынтымақтастық тура­лы келісім-шарт төмендегі пункттерден тұра­ды:
1. Жыл сайын ғылым мен әдебиет сала­сын­дағы бір-екі туындыны екі тараптан ау­дарып, ынтымақтас елдер тілдерінде жа­рия­лау;
2. «XXI ғасырдағы Түркия мен Қазақстан ав­торларының поэзиясы мен әңгімелері ан­тологиясын» бірлесе дайындап, екі тілде жа­риялау;
3. Ынтымақтасқан тараптар ұйым­да­ры­ның құрылымын насихаттауға және Қа­зақ­стан Жазушылар одағы мен İLESAM басып шығаратын басылымдарда немесе журнал­дар­да жариялауға кең көлемде орын бөлу;
4. Қазақстан мен Түркия мемле­кет­терін­де өтетін мәдени және шығармашылық іс-шараларға екі тараптан да жазушылар мен ақын­дардың шақырылуы;
5. Ақындар мен жазушылардың, ғалым­дар мен ойшылдардың өмірбаяндық еңбек­терін басып шығару;
6. Жылына бір рет (бір жыл Қазақстанда, ке­лесі жылы Түркияда) жүйелі түрде жыр фес­тивалін ұйымдастыру;
7. Балалар әдебиеті саласында ынты­мақ­тастық орнату;
8. Жылына бір рет екі жақты келісім ая­сын­да жазушылармен кездесу күндері мен кі­тап тұсаукесерлерін ұйымдастыру.
9. İLESAM ұйымынан сыйға тартылатын 15-20 мың кітапты Қазақстан кітап­ха­нала­ры­на, халыққа тарату ісі бойынша Қазақстан Жазушылар одағымен бірлесе отырып жұ­мыс атқару;
10. Ынтымақтастық жөніндегі бұл ке­лісім-шарт қол қойған күннен бастап кү­ші­не енеді және 10 (он) пункттен тұрады.

Алматы. 2018 жыл, 15 тамыз