Басты мақсат – татулық
15.06.2018
646
0

Алматыда әр үшінші адам сотқа жүгініп дауласып жүр. Даулайтыны жер дауы, ажырасу, алимент өндіру, ағайын-туыспен мұраға таласу, көршісінің көп шуылдайтыны тағысын тағы. Республика бойынша алты миллион адам соттың есігін сығалап жүр. Үш миллионға жуық арыз сотта жатыр.


Қоғамда белең алған осы мәселеге орай, зиялы қауым өкілдері Алматыда « Татуласу: сотқа дейін, сот кезінде» жобасын жүзеге асыру барысында, алғаш рет бас қосты. Кездесу «Бірлесе даму» әлеуметтік кәсіп­кер­лікті дамыту» қоғамдық қорының қол­дауымен өтті. Статистикаға сүйенсек ең даулы қала Алматы көрінеді. 2017 жылы 8024 отбасының шаңырағы шайқалып, 16 мыңға жуық бала жарымжан отбасында қалған. Зиялы қауым бұл жиында осы ауқым­ды проблемаға айналып бара жатқан мәселелерді шешу жолдарын қарастырды. Жоғары Сот төрағасының кеңесшісі Сағатбек Сүлеймен аудан әкімдерінің қарамағындағы ардагерлер кеңесін Билер Кеңесіне өзгертуді ұсынып, дәстүрлі құқық әдісімен дау-дамайдың басын қайтаруға шақырды.
Қазақстан Ұлттық ғылым академия­сының президенті Мұрат Жұрынов:
«Қазір мешітке бара қалсақ жастарды көреміз. Ол біздің халқымызда болашақ бар дегенді көрсетеді. Діндар адамдар имамға барып неге келіспейді? Имамдарды осы іске жұмылдыру керек деп есептеймін. Өйткені бітімгершілік жасайтын адам жү­ре­гі таза, тоқтау айта алатын тұлға болуы керек», – деді.
Жиын модераторы Нұргүл Қарағойшина бұған «алдағы уақытта мешіттерде оқыла­тын уағызға татуласу тақырыбы да қосылуы мүмкін» деп жауап қайтарды.
Өз кезегінде Жазушылар одағы Басқар­ма­­сының тө­ра­ғасы Ұлықбек Есдәулет осы тақырып бойын­ша айтыс ұйымдастырылып, про­за­лық, тіпті жоғалуға айналған детектив
жан­рындағы шығармаларға байқау жа­риялау жайлы ұсыныс айтып, халық есті­генді тез сіңіреді, ал айтыс халықтың та­ным-түйсігіне тікелей әсер ететінін өнер екенін жеткізді.
Ал Қазақстанның Еңбек Ері Аягүл Ми­разова «…шаңырақтың ұйытқысы – қыз бала тәрбиесіне балабақшадан көңіл болу керек», – деп ойын түйіндеді.

Ж.АДЫРБАЙ,
ХАТУ-дың 1 курс студенті.

ПІКІР ҚОСУ

Ваш адрес email не будет опубликован.

Пікір