Сыр маржаны атанған киелі ме­кен – Шиелінің топырағында талай жыр сүлейлері, ақын-жазушылар, бас­қа да өнер майталмандары дүниеге кел­ген. Осы шоқтығы биік өлкенің та­ғы бір дарынды ұлы, қылқаламның хас шебері – Әбілқасым Сәрсен­баев.

Т.Жүргенов атындағы Қазақ Ұлт­тық Өнер академиясының профес­соры, Қазақстан Республикасының мә­дениет қайраткері, Суретшілер ода­ғының мүшесі Әбілқасым Сәр­сен­баевтың есімі – республика жұрт­шылығына кеңінен мәлім. Қылқалам ше­бері ауылдың өмірі мен тыныс-тір­ші­лігін, табиғатын, адамдарын өзінің шы­ғармаларына арқау етіп келеді. Та­лантты суретші сондай-ақ бүкіл Түр­кі әлемінің алып тұлғасы – Мұс­та­фа Шоқайдың графикалық сурет­те­рін, портреттерін салуда үлкен шы­ғар­машылық ізденіс таныта білуде.
«Мұстафа Шоқай жолымен» деп 2008 жылы құрылған экспедицияның мүшесі ретінде Әбілқасым Сәрсенбаев ұлт көсемі басып өткен ізбен жүріп, бірталай елдерді көріп, аралады. Қа­зақ­стан Суретшілер одағының мү­ше­сі, танымал қылқалам шебері Мұс­тафа Шоқайдың туған жері Қы­­­­­­­зыл­орда облысындағы Нар­шо­қы­дан бастап, Парижге дейін барып қайт­ты. Осы сапар барысында «Ұлт тұл­ғасы – Мұстафа Шоқай» және «Мұс­тафа Шоқай суретші көзімен» атты екі бір­дей кітап-альбомы жарық көрді.
2011 жылы еліміздің Тәуел­сіз­дігі­нің 20 жылдығына орай, «Мұстафа Шо­­қай» атты шығармашылық көр­месі үлкен табыспен өтті. Ал 2013 жы­лы «Ұлт тұлғасы – Мұстафа Шо­қай» тақырыбында үш тілде және «Мұс­тафа Шоқай суретші көзімен» де­ген тақырыпта бес тілде көрме ұйым­дастырылды.
Жақында Қызылорда облысы, Шие­лі кентіндегі аудандық Бұдабай Қа­былұлы атындағы Мәдениет үйінде су­ретші Әбілқасым Сәрсенбаевтың Ру­хани жаңғыру аясында «Туған жер­ге тағзым» атты шығармашылық көр­месі өтіп, оған жүзге жуық әртүрлі та­қырыптардағы туындылар қойыл­ды. Ұлттық болмыс пен құн­ды­лық­тарға толы әр тақырыптағы суреттер кө­рермендердің назарын аударып, лайық­ты бағасын алды. Көрмеге бел­гілі қоғам қайраткерлері, ақын-жазу­шылар, суретшілер қатысты.

Доқтырхан Тұрлыбек,
жазушы.
Қызылорда облысы,
Шиелі ауданы.