Ф.Оңғарсынова поэзиясының табиғатын тану – алыптардан бастау алады дейміз. Көрнекті сөз зергерлері Ғ.Мүсірепов («Екі ауыз сөз»), Ә.Тәжібаев («Ой мен сезім нақыш­тары») айтқан бағалы ойлармен қоса М.Қаратаев, С.Сейітов, Ә.Жәмішев,
 С.Қирабаев, Т.Тоқбергенов, Р.Нұрғали, т.б. ғалымдар да өз еңбектерінде
Ф.Оңғарсынова поэзиясына аса үлкен ықылас танытқан болатын. Ақынның өз замандас-қаламдастарынан, жолын қуған іні-сіңлілерінен Ә.Кекілбаев («Нұрлы жүрек туғызған Жыр-құдірет»), Б.Асылжанов («Менде бір тебіреніс бар»), К.Ахметова («Ақынсыз бір сәті, бір күні аңыз»), С.Жұмабеков («Жырлары жанарында жарқыл­даған»), Н.Оразалин («Асқақтық пен Рухты аялаған жыр»), У.Қалижанов («Уақыт үндестігі»), Ә.Бөпежанова («Өжет жырға өлім жоқ»),
Т.Медетбек («Қасіреттен тұрады бақытым да») оның өлеңдеріне тоқтал­мағандары, жоғары бағала­маған­дары кемде-кем. Алайда, Ф.Оңғарсынова мұрасында әлі де жүйелі арнада зерттелмеген саланың бірі – ақынның поэмалары болатын.

Жуырда «Елтаным» баспасынан жа­рық көрген Б.Керімбекованың «Фа­риза Оңғарсынова поэма­ла­рын­дағы идеялық-көркемдік ізденістер» атты монографиясы осы олқылықтың орнын толтырғандай. Еңбекте ақын­ның «Сайраған Жетісудың бұл­бұлы­мын»,  «Тартады бозбаланы магни­тім», «Алмас қылыш немесе мен Ма­хамбет­пен қалай кездестім», «Тың­даңдар, тірі адамдар», «Қасірет пен ерлік жы­ры», т.б. поэмаларының жанрлық-көр­кемдік ерекшеліктері бүгінгі күн тұрғысынан жаңаша ба­ғам­далыпты. Әсіресе, қазақ әйе­лінің ұлттық болмысын таны­тудағы дербес ізденістері мен поэтикалық шеберлік мәселелері Ф.Оңғарсы­нованың «Сырласу немесе ақын әйел­дің анасымен диалогы», «Қыр­да­ғы айқас», «Ақбөбек жыр­лары», «Қар­ғыс», «Дыбыстар әле­мі», «Қа­зақтың бір қызы бар Кәм­шат деген» сынды поэмалары аясында талдап көрсеті­леді. Сондай-ақ, ав­тор Фариза поэма­ларындағы ұлт­тық сипат, мінез дара­лығы, лиризм, психологизм, мотив мәселелеріне де на­зар аударып, тео­рия­лық тұрғыда жүйе­лі талдаулар жүргізген.
Аталған еңбек жоғары оқу орындары филология факультеттерінің сту­денттері мен магистранттарына, сон­дай-ақ, жалпы әдебиетші қауымға ар­налған.

Еркінгүл Солтанаева,
филология ғылымының кандидаты.