Республикалық «Дәстүр» баспасынан жазушы-журналист, академик, мәдениет қайраткері, Халықаралық «Алаш» әдеби сыйлығының лауреаты, «ТҮРКСОЙ» медалінің иегері Зәкір Асабаевтың 80 жасқа толуына орай «Замана тынысы» атты кітабы мемлекеттік тапсырыспен басылып шықты. Бұл автордың аталмыш бағдарлама бойынша жарық көрген жетінші кітабы.

Кітапқа қаламгердің соңғы жылдарда жазып (барлығы да) мерзімдік басылымдарда жарияланған очерк, эссе, кө­семсөз, естеліктер енген. Оқырман әу де­геннен Нұрымбек Жанділдин мен Сат­тар Имашев жайлы сараптама, бел­гілі театртанушы ғұлама-ғалым, көр­нек­ті қоғам және мемлекет қайраткері Әшір­бек Сығаев туралы естелік, ертеректе (1966) жазылып, Сәбит Мұқа­нов­тың батасымен газет-журнал, кітаптарда жа­рияланған «Сәкен Сейфулиннің Үр­жарға келуі», «Роза Бағланованың ал­ғаш­қы махаббаты» атты деректі (көлемді) хикаялармен қауышады. Бұларда не айтылып, не қоятынын, нендей оқиға, жай-жапсар баяндалатынын тақырыптар айтып тұрса, өзге туындылар да оқырман көңілінен шығатынына сенім нық. Мә­селенки, «Маэстро» қалай жазылды» дейтін шығармасында автор СССР және Қазақ ССР халық артисі, Социалистік Ең­бек Ері, сирек баритон, ұлы әнші Ер­мек Серкебаев хақында сыр-сұхбат кітап қалай жазылып, қатарынан үш рет басылғаны жөнінде профессор Шерәлі әл-Қорасанидың сұрақтарына жауап беру тәсілімен баян етеді.
Осылайша «Сәбит Оразбаевтың айт­қаны», «Мәдениет және тұрмыс» жур­на­лы­ның негізін қалап, тұңғыш бас редактор (автор ширек ғасыр орынбасар) бол­ған ұлы тұлға Мұса Дінішев туралы «Ме­нің редакторым», «Әлібек Дінішевке қойылмаған сұрақ», «Сәкен Сейфуллин ұнат­қан екі ән», «Әуезовтің Арагонға ха­ты», «Ришат пен Байғали», «Қазақтар жал­ғыз Абайды да құртып тынбаса не­ғылсын», «Сәкен Сейфуллинді тергеген чекист», «Казактарды қуған қазақтар», «Момышұлының Жанділдинге жауабы», «Абай Бейсенбаев шырқаған «Үкілім-ай», «Нұрқаділовтің екі шапағаты», «Би­бігүл Төлегенованың анасы» сынды туын­дылар өз кезектерімен тізбектеле бе­реді. Сондай-ақ, қоғамдағы көлеңкелі тұс­тарды нақты айғақ, дәлел-дерек­тер­мен сөз ететін жазбалар да бірқауым.
Кітап Герольд Бельгердің жан досы, мар­құм Асқар Сүлейменовтің қызы Қа­ра­көз хақында «Қаракөз салған «Қар­лығаш» атты шағын суреттемемен жабы­лады.
Жинақ қалың оқырманға арналған. Таралымы 5 мың.

М.Шойбекова.