Халықаралық саңыраулар күніне орай ұйымдастырылған «DEAF MADE» республикалық инклюзивті фестиваліне еліміздің түкпір-түкпірінен келген студенттер жиналды. Залға кірген сәттен-ақ көрермендерді шығармашылыққа толы орта қарсы алды. Әрбір қатысушы өз өнерін көрсетуге дайын, ал сахнада үнсіздіктің өзі әуенге айналғандай әсер қалдырды.

Алдымен студенттер «Біздің бренд» бейнебаяндамасы арқылы өзін-өзі таныстырды. Жастардың ұрандары мен шығармашылық тұжырымдамалары олардың заманауи ойлауын айқын көрсетті.

Келесі кезекте «Овация» хореографиясы сахнаны жандандырып, ұлттық би дәстүрлері мен заманауи элементтердің үйлесімі көрерменді тәнті етті.
«Экстрабилити» бөлімінде ым-ишара арқылы бейбітшілік, туған жерге сүйіспеншілік және қазіргі заманғы сын-тегеуріндер тақырыбы жеткізілді.

Ал «Заманауи этно-стиль» сән театры ұлттық нақыш пен заманауи сәнді үйлестіріп, ерекше көрініс сыйлады.

Фестивальге Қазақстанның барлық өңірлерінен техникалық және кәсіптік білім беру колледждерінің есту қабілеті нашар студенттері қатысты. Шараны Алматы қаласының техникалық және кәсіптік білім беру басқармасы мен Алматы мемлекеттік технология және флористика колледжі ұйымдастырды.

Бұл күн – жай ғана байқау емес, инклюзивті қоғам құру жолындағы маңызды қадам болды. Әрбір қатысушының өнері үнсіздіктің де өз тілі бар екенін дәлелдеді.
Залда отырған көрермендер жеңімпаздарды ұзақ қол шапалақпен қарсы алып, олардың еңбегін жоғары бағалады. Ұйымдастырушылардың айтуынша, бұл марапаттар – тек жетістік белгісі ғана емес, жастардың шығармашылық жолындағы жаңа бастамаларына серпін беретін маңызды қадам.
«DEAF MADE» фестивалі – әрбір жастың үнін естуге мүмкіндік беретін мәдени алаң. Марапаттау рәсімі осы үнсіздіктің өнерге айналғанын тағы бір мәрте дәлелдеді.